Библия (на цсл. гражданским шрифтом)

29 От тех же поставлени над сосуды и над всеми сосуды святыми, и над мукою пшеничною и вином и елеем, и фимиамом и ароматы.

30 От сынов же священнических беша мироварцы, миро соделоваху из аромат.

31 И маттафиа от левит, сей первенец селлуму кореанину, емуже вверена дела жертвы сковрадныя великаго жерца:

32 и ванеа каафитянин от братий их над хлебы предложения, еже уготовляти в субботы и субботы.

33 И сии псалмопевцы князи отечеств левитских, определени почередно во храминах, повседневно, яко да день и нощь свое служение отслуживают.

34 Сии князи отечеств левитских по племенем своим, началницы сии пребываху во Иерусалиме.

35 В гаваоне же живяше отец гаваонь иеиль: и имя жене его мааха:

36 и сын первенец его авдон, и сур и кис, и ваель и нир, и надав

37 и гедор, и братия его аиун и зехриа и макелоф.

38 Макелоф же роди саму: и сии вселишася посреде братий своих во Иерусалиме с братиями своими.

39 Нир же роди киса, и кис роди саула, и саул роди ионафана и мелхисуа, и аминадава и иесваала.

40 Сын же ионафань мемфиваал: и мемфиваал роди миху.

41 Сынове же михи: филоф и мелхиил, и фараа и хааз.

42 Хааз же роди иаду, иада же роди алефа и асмофа и замвриа: замврий же роди месу,

43 меса же роди ваану: рафеа сын его, еласа сын его, асаил сын его.

44 Асаилу же (быша) шесть сынов, и сия имена их: езрикам первенец его, и исмаил и азариа, и авдиа и анан и аса: сии сынове асаиловы.

Глава 10

1 Филистими же воеваша противу израиля, и бежаша мужие израилевы от лица иноплеменническа и падоша ранени на горе гелвуи.

2 И погнаша иноплеменницы вслед саула и вслед сынов его: и убиша иноплеменницы ионафана и аминадава и мелхисуа, сынов сауловых.

3 И отягчися брань на саула, и обретоша его стрелцы в луках и в трудех, и изнеможе от стрел.

4 И рече саул к носящему оружие его: извлецы мечь твой и прободи мя им, да не когда приидут необрезаннии сии и поругаются мне. И не восхоте носяй оружие его, яко убояся зело. И взя саул мечь и нападе нань.

5 И виде носяй оружие его, яко умре саул, и нападе и он на мечь свой и умре.

6 И умре саул и три сына его в день он: и весь дом его купно умре.

7 И видеша вси мужие израилевы, иже во юдоли, яко побежа израиль, и яко умре саул и сынове его, и оставиша грады своя и побегоша: и приидоша иноплеменницы и вселишася в них.

8 И бысть заутра, и приидоша иноплеменницы совлачати падших корысти, и обретоша саула и сынов его падших на горе гелвуи:

9 и обнажиша его, и взяша главу его и оружие его, и послаша в землю иноплеменничу, да обносится (и покажется) идолом их и людем:

10 оружия же их положиша в капищи бога своего: и главу его поткнуша в капищи дагонове.

11 И услышаша вси живущии во иависе галаадстем вся, яже филистими сотвориша саулу и сыном его и израилю:

12 и восташа от галаада вси мужие крепцыи, и приидоша и взяша труп саулов и труп сынов его, и принесоша их во иавис, и погребоша кости их под дубом во иависе: и постишася седмь дний.

13 И умре саул за беззакония своя, имиже беззаконнова Господеви по словеси Господню, понеже не сохрани, яко вопроси саул волшебницы еже вопросити, и отвеща ему самуил пророк.

14 И не взыска Господа саул: сего ради уби его и возврати царство его давиду сыну иессееву.

Глава 11

1 И собрася весь израиль к давиду в хеврон, глаголюще: се, кости твоя и плоть твоя мы:

2 вчера же и третияго дне, егда еще царствоваше саул, ты был еси изводяй и вводяй израиля, и тебе рече Господь Бог твой: ты упасеши люди моя израиля, и ты будеши князь над людьми моими израилем.

3 И приидоша вси старейшины израилевы ко царю в хеврон: и утверди давид с ними завет в хевроне пред Господем: и помазаша давида в царя над израилем по словеси Господню, (еже глагола) рукою самуиловою.

4 И иде царь давид и весь израиль во Иерусалим, сей есть иевус, идеже бяху иевусее жителие земли.

5 Рекоша же давиду, иже обиташа в иевусе: не внидеши семо. И взя давид крепость сионю, яже есть град давидов.

6 Рече же давид: всяк иже убиет иевусеа в первых, будет князь и воевода. И взыде нань прежде иоав сын саруиев и бысть князем.

7 И седе давид во обдержании: сего ради именова е град давидов.

8 И созда град окрест от маала даже да окружения: иоав же прочее града сострои: и воева и взя град.

9 Преспеваше же давид идый и растый, и Господь вседержитель бе с ним.

10 Сии же князи сильных давидовых, иже помогаху ему в царстве его со всем израилем, да царь будет по словеси Господню, над израилем,

11 и сие число крепких давидовых: иесваал сын ахамань, первый между тридесятми: той извлече мечь свой единожды на триста язвеных во едино время.

12 И по нем елеазар, сын додеа ахохии: сей бе между треми сильными:

13 сей бе с давидом в фасодомине, идеже иноплеменницы собрани быша на брань, и бе часть нивы полна ячменя, и людие побегоша от лица иноплеменнича:

14 и ста посреде части и защити ю, и изби иноплеменники, и сотвори Господь спасение велие (людем своим).

15 Снидоша же тии трие от тридесяти князей на камень ко давиду в пещеру одолламлю, а полк иноплеменничь стояше во юдоли гигантов.

16 Давид же бе тогда в крепости, полк же иноплеменничь бе тогда в вифлееме.