Библия (на цсл. гражданским шрифтом)

2 Наказуяй сына своего насладится о нем и посреде знаемых о нем похвалится.

3 Учай сына своего раздражит врага и пред други о нем возрадуется.

4 Умре отец его, и аки не умре: подобна бо себе остави по себе.

5 Во житии своем виде и возвеселися о нем и при кончине своей не оскорбися:

6 противу врагом остави местника и другом воздающа благодать.

7 Угождаяй сыну обяжет струпы его, и о всяцем вопли возмятется утроба его.

8 Конь неукрощен свиреп бывает, и сын самовольный продерз будет.

9 Ласкай чадо, и устрашит тя, играй с ним, и опечалит тя.

10 Не смейся с ним, да не поболиши о нем и на последок стиснеши зубы твоя.

11 Не даждь ему власти в юности и не презри неведения его:

12 сляцы выю его в юности и сокруши ребра его, дондеже млад есть, да не когда ожестев не покориттися.

13 Накажи сына твоего и делай им, да не в безстудии его поткнешися.

14 Лучше нищь здрав и крепок в силе своей, нежели богат уранен телом своим.

15 Здравие и крепость лучше есть всякаго злата, и тело здравое, нежели богатство безчисленное.

16 Несть богатство лучше здравия телеснаго, и несть веселие паче радости сердечныя.

17 Лучше есть смерть паче живота горька или недуга долгаго.

18 Благая излиянная пред усты затворенными предложения брашен предлежащая у гроба.

19 Кая польза идолу от жертвы? не имать бо ясти, ни обоняти:

20 тако гонимый от Господа,

21 зряй очима и стеняй, якоже евнух осязаяй девицу и воздыхаяй.

22 Не вдаждь в печаль душу твою и не оскорби себе советом твоим.

23 Веселие сердца живот человека, и радование мужа долгоденствие.

24 Люби душу твою и утешай сердце твое, и печаль от себе отрини далече:

25 многи бо печаль уби, и несть пользы в ней.

26 Рвение и ярость умаляют дни, и печаль прежде времене старость наводит.

27 Светло сердце и благо о брашне и о яди своей попечется.

Глава 31

1 Бдение богатства растлевает плоти, и попечение его отгонит сон:

2 печаль бдения отторгает дремание, и недуг лют отимает сон.

3 Трудится богатый в собирании богатства и в покои насыщается сладостей своих:

4 трудится убогий во умалении жития, и в покои скудный бывает.

5 Любяй злато не оправдится, и гоняй растление сим насытится.

6 Мнози падоша злата ради, и бысть пагуба их прямо лицу их.

7 Древо претыкания есть всем жрущым ему, и всяк безумлив ят будет им.

8 Блажен богатый, иже обретеся без порока и иже вслед злата не иде.

9 Кто есть сей? и ублажим его, сотвори бо дивная в людех своих.

10 Кто искушен им и совершен бысть? и будет на похваление.

11 Кто могл преступити, и не преступи, и зло сотворити, и не сотвори?

12 Утвердятся благая его, и милостыни его исповесть собрание.

13 Сел ли еси при трапезе велицей, не разверзи на ней гортани твоего

14 и не рцы: много на ней есть. Помяни, яко зло есть око лукаво.

15 Лукавнее ока что есть создано? сего ради о коей либо вещи слезит.

16 Идеже аще узриши, не простирай руки и не гнетися с ним в солило.

17 Разсуждай, яже суть искренняго, от тебе самаго, и о всяцей вещи размышляй.

18 Яждь яко человек предлежащее ти и не пресыщайся, да не возненавиден будеши.

19 Престани первый ради наказания и не пресыщайся, да не преткнешися:

20 и аще сядеши посреде многих, первее их не простри руки твоея.

21 Коль доволно человеку наказанному малое, и на одре своем не постраждет зла.

22 Сон здравый от чрева умеренна: воста заутра, и душа его с ним:

23 труд бдения и холера и чревоболение с мужем ненасытным.

24 И аще отяготился еси брашны, востани от трапезы и почиеши.

25 Послушай мене, чадо, и не уничижи мене, и на последок обрящеши словеса моя.

26 Во всех делех твоих буди тщателен, и всяк недуг не имать приступити к тебе.

27 Щедраго хлебами благословят устне, и послушество доброты его верно.

28 На скупаго в хлебех поропщет град, и послушество злобы его известно.

29 В вине не мужайся, многих бо погуби вино.

30 Пещь искушает железо в калении, тако вино сердца гордых во пиянстве.

31 Полезно вино животу человечу, аще пиеши е в меру его.

32 Кий живот побеждаемому вином? сие бо на веселие человеком создано есть.

33 Радование сердца и веселие души вино пиемо во время прилично:

34 горесть души вино пиемо много в распри и клевете:

35 умножает пиянство ярость безумнаго на претыкание, умаляя крепость и сотворяя струпия.

36 В пире вина не обличай искренняго и не уничижи его в веселии его:

37 словесе поносна не рцы ему и не оскорби его во истязании.

Глава 32

1 Старейшину ли тя поставиша, не возносися, но буди в них яко един от них:

2 попецыся ими, и тако сяди. И всю потребу твою сотворив возлязи,

3 да возвеселишися их ради и красоты ради приимеши венец.

4 Глаголи, старейшино, подобает бо ти,

5 испытною хитростию и не возбрани мусикии:

6 идеже слушание (будет), не изливай беседы и без времене не мудрися.

7 Печать анфракса на украшении злате, и сладкогласие мусикиев в пиршестве вина.

8 Во украшении златем печать смарагдова, сладкопение мусикиев по сладцем вине.

9 Глаголи, юноше, аще тебе есть потреба, едва дващи, аще вопрошен будеши:

10 сократи слово, малыми многая (изглаголи): буди яко ведый и вкупе молчя.

11 Посреде вельмож не равен творися и иному глаголющу не многослови.