Битва на Калке. 1223 г.

Предваряше же тогда гладъ велии. Всѣми же сими знаменми и скорбьми преблагии Богъ хотя насъ свободити отъ работы грѣховныя, мы же не наказахомся. И попусти на ны приити языкомъ незнаемымъ, иже суть безбожнии моавитяне, рекомии татарове, их же добрѣ ясно никто же не вѣсть, кто суть, и откуду приидошя, и что языкъ ихъ и вѣра. Нѣции же зовутъ ихъ таумены, а друзии — печенѣзи, инии же глаголють, яко суть о них же свидѣтельствуетъ писание Мефодиа, епископа Патаромскаго, яко вышли суть ис пустыни Евтириискиа, сущи межю въстока и сѣвера, идѣже загна ихъ Гедеонъ, и явитися имъ къ скончанию времени, и поплѣнятъ всю землю отъ въстока до Ефрата и отъ Тигръ до Понтиискаго моря кромѣ Ефиопиа. О сихъ слышахомъ, яко многиа страны поплѣниша: Ясы, Обезы и Касоги. Приидоша же на землю Половецкую, и многи половци изъбиени быша. Прочии же бѣжашя, гоними до рѣки Днѣпра, инии же по Дону разгнани бышя в луку моря и тамо изомрошя, убиваеми гнѣвомъ Божиимъ и Пречистыя Его Матери, понеже много зла сътворишя половци в Русьстѣи земли, его же ради всемилостивыи Богъ хотя погубити безбожныя сыны Измаиловы куманы, отмщая кровь христианьскую.

Князь же половецкии именемъ Коньстантинъ и с прочими князьми прибѣжа на Русь к зятю своему князю Мстиславу Мстиславичю, тестю великаго князя Ярослава Всеволодича, и къ всѣмъ русьскимъ княземъ съ многими дарми и съ многимъ молениемъ, помощи прося. Мстислав же Мстиславич Галичьскии, и Мстиславъ Романовичь Киевъскии, и Михаилъ Черниговьскии и инии младии князи Божиимъ попущениемъ идошя на помощь половцемъ за Днѣпръ рѣку, инии же выидоша Днѣпромъ в море и внидоша в ту же рѣку Днѣпръ, и възведошя пороги, и сташа у рѣки Хортици на бродѣ. И вкупѣ русь и половци доидоша татаръ и побиваху ихъ крѣпко, осмь днеи гоняще ихъ за [С. 495] рѣку Калку; преидошя за ними мѣсяца июня 16. И тамо грѣхъ ради нашихъ бысть сѣча зла и побѣда губителна на князи русьскиа, иже не бысть такова отъ начала Русьскиа земли, идѣже и Александръ Поповичь убиенъ бысть, с ним же и инѣхъ 70 храбрыхъ. Глаголаху же, яко единѣхъ князеи погибе тогда 1000, кроме Мстислава Галичьскаго, и Михаила Черниговьскаго, и Владимира Рюриковича Киевьскаго, сии князи токмо убѣжаша. Сию же злобу попусти на нас Богъ и недоумѣние вложи в насъ за грѣхи наша. Ожидаше же покаяниа нашего, и възврати ихъ вспять от рѣки Днѣпра на землю въсточную; и повоеваша ю. Сихъ же злыхъ татаръ таурменъ никто же вѣсть, откуду приидошя и паки камо ся дѣли. Всего же русьскаго воиньства токмо десятая часть приидоша въ свояси.

Велиции же князи Георгии и Ярославъ Всеволодичи не быша на брани тои, но кождо въ своеи дръжавѣ».

Список первой половины 1560-х гг.

Полное собрание русских летописей. Т. XV. Рогожский летописец. Тверской сборник. М., 2000. Стб. 27–28 (первой пагинации). (Рогожский летописец)

[Стб. 27] «На Калцѣ побоище. Въ лѣто 6734 прїидоша Татарове на землю Половечьскую и на вежи ихъ, а Котянъ князь Половечьскыи бѣ тесть Мьстиславу князю Черниговьскому и посла Котянъ къ зятю своему Мьстиславу съ поклономъ и дары многы злато, кони, паволокы и рыкыи (sic) сице: „шли дары по Русскымъ княземъ, днесь насъ не будетъ, а вас заутра“. И съвокупишася князи Роусстїи съ силою многою и се слышавше Татарове прислаша 10 мужъ съ поклономъ: „мы васъ не заимаемъ, ни градовъ вашихъ, нъ идемъ на свои конюси, на Половци“. И не послушаша ихъ князи Роусстїи, а ту 10 мужъ оубиша. И поидоша Русь противу съ силою своею 17 днїи и се оувѣдавше Татарове прислаша къ кня[земъ] роусскымъ глаголюще: „мы на васъ не посягли ни чимже [а вы] на насъ идете, да судитъ Богъ между вами и намї“ и по[идоша] Татарове противу имъ и съступившимься [Стб. 28] [имъ обоимъ] и бысть побоище страшно на рецѣ Калцѣ и [побїени б] ыша Половци отъ Татаръ и потомъ Русь и [князей па]де множество, а людїи бес числа, а иныхъ […изы]маша. Тогда оубиша Александра Попо[вича. Сїе зло бысть] июнїа 16».

Список второй четверти XV в.

Полное собрание русских летописей. Т. XVI. Летописный сборник, именуемый летописью Авраамки. М., 2000. Стб. 49–50