Блаженная Ксения Петербургская: Жизнь, чудеса, святыни

Избранная угоднице и Христа ради юродивая, святая блаженная мати Ксение, избравшая подвиг терпения и злострадания, хвалебное пение приносим ти, чтущия святую память твою: ты же заступай нас от враг видимых и невидимых, да зовем ти:

Радуйся, Ксение блаженная, молитвеннице о душах наших.

Икос 1

Равноангельскаго жития взыскала еси, блаженная мати, егда по успении мужа твоего отвергла еси Mиpa сего красоту и вся яже в нем: похоть плоти, похоть очес и гордость житейскую, юродством бо Христа ради и креста ношением разум Христов стяжала еси, и тем безумную мудрость мирскую посрамила еси: того ради, блаженная, услыши от нас похвалы сицевыя:

Радуйся, житием твоим Андрею, Христа ради юродивому, равная:

Радуйся, отрекшаяся имени твоего, себя же умершею именовавшая.

Радуйся, в юродстве твоем имя мужа твоего Андреа приявшая:

Радуйся, назвавшаяся именем мужеским, немощи женской отрешившаяся.

Радуйся, вся имения твоя добрым людем и нищим раздавшая:

Радуйся, нищету добровольную приявшая Христа ради.

Радуйся, юродством твоим научившая века сего суемудрия отвергати:

Радуйся, благая утешительнице всех, в молитве к тебе прибегающих.

Радуйся, Ксение блаженная, молитвеннице о душах наших.

Кондак 2

Видя странное твое житие, яко ты презрела еси дом твой и мирское богатство, родныя ти по плоти мнили тя безумною быти, не ведяще силы Божия и промысла Его: людие же стольнаго града, видя смирение твое и вольную нищету, воспета Богу: Аллилуиа.

Икос 2

Разум ти данный от Бога, Ксение блаженная, в мнимом безумии сокрыла еси: в суете же града велика аки пустынница пребыла еси, терпя искушения, и молитвы Богу вознося непрестанно: мы же, дивящеся таковому житию твоему, взываем ти хвалебно:

Радуйся, крест юродства, от Бога ти данный, на рама своя приявшая:

Радуйся, под мнимым безумием твоим свет благодати скрывавшая.

Радуйся, смирением и молитвою стяжавшая дар прозорливости:

Радуйся, даром сим помогавшая бедным и убогим.

Радуйся, страдания людей предзревшая и молившая Бога о милости:

Радуйся, жене доброй о рождении сына ея предрекшая.

Радуйся, яко той жене и чадо у Бога испросившая:

Радуйся, всех к Богу в молитве прибегати научающая.

Радуйся, Ксение блаженная, молитвеннице о душах наших.

Кондак 3

Силою свыше, от Бога ти дарованней, блаженная, зной и стужу мужественне терпела еси, распиная плоть свою со страстьми и похотьми: темже, Духом Святым просвещаема, в скорби взывала еси к Богу: Аллилуиа.

Икос 3

Имея, о блаженная, небо покровом, землю ложем, отвергла еси плотоугодие ради царства Божия: мы же, зряще таковое твое житие, со умилением зовем ти:

Радуйся, жилище свое земное людям отдавшая:

Радуйся, небеснаго крова взыскавшая и получившая.

Радуйся, ни что же земное вменившая, но всех духовно богатящая:

Радуйся, житием твоим терпению нас поучающая.

Радуйся, любовь Божию людям показующая:

Радуйся, плодами благочестия украшенная.

Радуйся, терпение и незлобие Mиpy явившая:

Радуйся, теплая предстательнице наша пред престолом Всевышняго.

Радуйся, Ксение блаженная, молитвеннице о душах наших.

Кондак 4

Бури житейския, во граде стольнем мятущияся, кротостию и незлобием твоим укрощала еси, о блаженная мати, безстрастие же к Mиpy сему тленному стяжала еси: темже и ныне поеши со ангелы Богу: Аллилуиа.

Внутренний вид часовни блаженной Ксении

Икос 4

Слыша о тебе, яко ты, злостражда Христа ради, скорбных утешаеши, немощных укреплявши, заблуждших на путь правый наставляеши, людие страждущия к помощи твоей прибегаху, воспевающе ти сице:

Радуйся, путь Христов всем сердцем возлюбившая:

Радуйся, крест Христов радостно понесшая.

Радуйся, всякое поношение от Mиpa, плоти и диавола претерпевшая:

Радуйся, даров Божиих преисполненная.

Радуйся, любовь небесную к ближним явившая:

Радуйся, страждущим людем утешение подавающая.

Радуйся, слезу плачущих отершая:

Радуйся, благодатию Духа Святаго чудесно согреваемая.

Радуйся, Ксение блаженная, молитвеннице о душах наших.

Кондак 5

Боготечною звездою святость твоя просияла еси, Ксение блаженная, небо осветивши царскаго града: людем бо, в безумии греха погибающим, путь спасения явила еси, к покаянию призывая всех, во еже пети Богу: Аллилуиа.

Икос 5

Видяще подвиги твоя в молитве, терпении хлада и зноя, благочестивыя люди хотяху утишити страдания твоя, одежду и пищу тебе приносяще: ты же вся сия нищим раздавала еси, хотя подвиг свой в тайне сохранити: мы же, дивяся вольней твоей нищете, взываем ти сице:

Радуйся, зной и стужу Христа ради терпевшая добровольце:

Радуйся, непрестанно подвизавшаяся в молитве.

Радуйся, град Петров нощным бдением от бед ограждавшая:

Радуйся, гнев Божий многажды от него отвратившая.

Радуйся, по вся дни и ночи в поле молившаяся Богу:

Радуйся, в нищете духовней вкусившая райскую сладость.

Радуйся, яко от сладости сей вся земная оставившая:

Радуйся, яко вся в Боге пребываеши.

Радуйся, Ксение блаженная, молитвеннице о душах наших.

Кондак 6