Неисповедимы судьбы Твои, Господи, неизследимы пути Твои! Даяй дыхание всякой твари и вся от несущих в бытие приведый, Ты овому посылаеша Ангела смерти в день, егоже не весть, и в час, егоже не чает; оваго же исхищаеши из руки смерти, даруеши живот при последнем издыхании; овому долго-терпиши и даеши время на покаяние; оваго же, яко злак, сечеши мечем смерти во едином часе, во мгновении ока; оваго поражаеши громом и молниею; оваго сожигаеши пламенем, оваго же предаеши в снедь зверем дубравниим; овых повелеваеши поглотити волнам и безднам морским и пропастям земным; овых похищаеши язвою губительною, идеже смерть, яко жнец, пожинает и разлучает отца или матерь от чад их, брата от брата, супруга от супруги, младенца отторгает от лона матернего, бездыха-ханными повергает сильных земли, богатых и убогих. Чтоубо сие есть? Дивное и недоумеваемое нами смотрение Твое, Боже! Но Господи, Господи! Ты токмо един, ведый вся, веси, чесо ради бывает сия и чесо ради бысть яко раб Твой (раба Твоя) (имя) во едино мгновение ока пожерт(та) бысть зиянием смерти. Аще наказуеши за многия, тяжкия прегрешения его (ея), молим Тя, Многомилостиве и Всемилостиве Господи, да не яростию Твое. Обличиши его (ю) и накажеши вконец, но, по благости Твоей и по бесприкладному Твоему милосердию, яви ему (ей) велию милость Твою в прощении и оставлении грехов. Аще ли же усопший(ая) раб Твой (раба Твоя) в житии сем помышляя день судный, позна свое окаянство, и возжела принести Тебе плоды достойные покаяния, но не достиже сего, зане позван(на) бысть Тобою в день, егожа не веда и в час, егоже не жда, того убо ради паче молим Тя, Преблагий и Премилосердный Господи, несоделанное покаяние, еже видесте очи Твои, и неоконченное дело спасения его (ея), исправи, устрой, соверши Твоею неизреченною благостию и человеколюбием; едину бо надежду имамы на Твое бесконечное милосердие; у Тебе бо суд и наказание, у Тебе правда и неистощимая милость; Ты наказуеши, вкупе же и милуеши, биеши, вкупе же и приемлеши; прилежно молим Тя, Господи Боже наш, не накажи внезапу позванного(ую) к Тебе Страшным судом Твоим, но пощади, пощади его (ю) и не отрини от лица Твоего. О, страшно внезапу впасти в руце Твои, Господи. И предстати на суд Твой нелицеприятный! Страшно отыти к Тебе без благодатнаго напутствия, без покаяния и причащения святых Твоих страшных и животворящих Тайн, Господи! Аще внезапу усопший(ая) поминаемый(ая) нами раб Твой (раба Твоя) многопогрешен (на) есть, повинен(на) есть осуждению на Твоем праведном суде, молим Тя, умилосердися над ним (нею), не осуди его (ю) на вечное мучение, на вечную смерть; потерпи нам еще, даждь нам долготу дней наших, еже молитися по вся дни о усопшем(ей) рабе Твоем(ей), дондеже услышиши нас и приимеши милостию Твоею внезапу отшедшаго(ую) к тебе; и даждь нам, Владыко, омыти грехи его (ея) слезами согрешения и воздыханиями нашими пред Тобою, да не низведен(на) будет по грехам своим на место мучения раб Твой (раба Твоя), но да вселится в место упокоения. Ты Сам, Господи, повелеваюши ударяти в двери милосердия Твоего, молим Тя убо, Прещедрый Царю, и не престанем умоляти Твое милосердие и взывати с кающимся Давидом: помилуй, помилуй раба Твоего (рабу Твою), Боже, по велицей Твоей милости. Аще же недовольно Ти словес наших, сего малаго моления нашего, умоляем Тя, Господи, верою в спасительныя заслуги Твои, упованием на искупительную и чудодейственную силу Твоея жертвы, принесенныя Тобою за грехи всего мира. Молим Тя, о Сладчайший Иисусе! Ты еси Агнец Божий, внемляй грехи мира, распныйся ради нашего спасения! Молим Тя, яко Спасителя и Искупителя нашего, спаси и помилуй и вечныя муки избави душу поминаемаго (ыя) нами, внезапо усопшаго(ия) раба Твоего (рабы Твоей) (имя), не остави его (ю) погибнути во веки, не сподоби достигнути тихаго пристанища Твоего и упокой тамо, идеже все святии Твои упокоиваются. Вкупе же молим Тя, Господи Иисусе Христе Боже наш, прими милостию Твоею и всех внезапу преставльшихся к Тебе, рабов Твоих (имена), ихже вода покры, трус объят, убийцы убиша, огнь попали, град, снег, мраз, голоть и дух бурен умертвиша, гром и молния попали, губительная язва порази или иною коею виною умроша, по Твоему изволению и попущению, молим Тя, прими их Твоим благоутробием и воскреси их в жизнь вечную, святую и блаженную. Аминь.
