Часослов с приложением [на ц.-слав. яз.]

В среду вечера Богородичен:

Еди́ну по рождестве́ Пречи́стую Де́ву воспои́м, / я́ко Ма́терь Бо́га Сло́ва, / глаго́люще: сла́ва Тебе́.

В четверток утра Богородичен:

Роди́лся еси́ от Де́вы несказа́нно, Христе́, / и просвети́л еси́ су́щия во тьме, вопию́щия: / Го́споди, сла́ва Тебе́.

В пяток вечера Богородичен:

Я́же еди́на Невмести́маго прии́мши / и ро́ждши Бо́га Сло́ва воплоще́нна, / моли́ спасти́ся душа́м на́шим.

В субботу утра Богородичен:

Моли́, Де́во, / со апо́столы и му́ченики / обрести́ на Суде́ преста́вльшимся / ве́лию ми́лость.

ГЛАС 8

В неделю вечера Богородичен:

Арха́нгела Гаврии́ла глас восприи́мше, рцем: / ра́дуйся, Ма́ти Бо́жия, / Я́же Жизнода́вца Христа́ ми́ру ро́ждши.

В понедельник утра Богородичен:

Небе́сная пою́т Тя, / Обра́дованная, Ма́ти Безневе́стная, / и мы славосло́вим неизсле́дованное Твое́ Рождество́, Богоро́дице, / моли́ спасти́ся душа́м на́шим.

В понедельник вечера Богородичен:

Ра́дуйся, вселе́нныя похвало́; / ра́дуйся, хра́ме Госпо́день; / ра́дуйся, горо́ приосене́нная; / ра́дуйся, всех прибе́жище; / ра́дуйся, све́щниче златы́й; / ра́дуйся, сла́во правосла́вных честна́я; / ра́дуйся, Мари́е, Ма́ти Христа́ Бо́га; / ра́дуйся, раю́; ра́дуйся, Боже́ственная трапе́зо; / ра́дуйся, се́не; ра́дуйся, ру́чко всезлата́я; / ра́дуйся, всех упова́ние.

Во вторник утра Богородичен:

Кров Твой, Богоро́дице Де́во, / врачевство́ есть духо́вное: / в онь бо прибега́юще, / от душе́вных неду́г избавля́емся.

В среду вечера Богородичен:

Аз, Де́во Свята́я Богоро́дице, / к покро́ву Твоему́ прибега́ю, / вем, я́ко обря́щу Тобо́ю спасе́ние, / мо́жеши бо, Чи́стая, помощи́ мне.

В четверток утра Богородичен:

Исхи́ти мя, Влады́чице, / руки́ зми́я человекоуби́йцы, / хотя́ща мя лука́вством поглоти́ти до конца́; / сокруши́ че́люсти его́, молю́ Тя, / и ко́зни разори́, / я́ко да избы́в от ногте́й его́, / велича́ю заступле́ние Твое́.

В пяток вечера Богородичен:

Чи́стая Де́во, / Сло́ва врата́, Бо́га на́шего Ма́ти, / моли́ спасти́ся нам.

В субботу утра Богородичен:

Влады́чице, приими́ моли́твы раб Твои́х / и изба́ви нас / от вся́кия ну́жды и печа́ли.

БОГОРОДИЧНЫ ОТПУСТИТЕЛЬНЫЯ, ПО ТРОПАРЕХ СВЯТЫХ, ПОЕМЫЯ ВО ВСЕ ЛЕТО, В ВЕЧЕРНЮ ЖЕ, И НА БОГ ГОСПОДЬ: НА УТРЕНИ И ПАКИ В КОНЕЦ УТРЕНИ

ГЛАС 1

В неделю вечера и в понедельник на Бог Госпо́дь:

Чу́до чуде́с, Благода́тная, в Тебе́ зря́щи, / тварь ра́дуется, / зачала́ бо еси́ безсе́менно / и родила́ еси́ неизрече́нно / Его́же чинонача́лия А́нгелов ви́дети не мо́гут, / Того́ моли́ о душа́х на́ших.

В конец утрени:

Пречи́стая Богоро́дице, / на Небесе́х благослове́нная и на земли́ славосло́вимая, / ра́дуйся, Неве́сто Неневе́стная.

В понедельник вечера и во вторник на Бог Госпо́дь:

Заче́ншая неопа́льно Огнь Боже́ственный / и ро́ждшая безсе́менно Исто́чника жи́зни, Го́спода, / Благода́тная Богоро́дице, / спаса́й Тя велича́ющия.

В конец утрени:

Безма́терняго на Небеси́, па́че мы́сли и слу́ха, / на земли́ без отца́ родила́ еси́; / Того́, Богоро́дице, / моли́ о душа́х на́ших.

Во вторник вечера и в среду на Бог Госпо́дь:

Твое́ предста́тельство иму́ще, Пречи́стая, / и Твои́ми моли́твами лю́тых избавля́еми, / Кресто́м Сы́на Твоего́ везде́ соблюда́еми, / по до́лгу Тя вси благоче́стно велича́ем.

В конец утрени:

Пречи́стая Богоро́дице, / на Небесе́х благослове́нная и на земли́ славосло́вимая, / ра́дуйся, Неве́сто Неневе́стная.

В среду вечера и в четверток на Бог Госпо́дь:

Заче́ншая неопа́льно Огнь Боже́ственный / и ро́ждшая безсе́менно Исто́чника жи́зни, Го́спода, / Благода́тная Богоро́дице, / спаса́й Тя велича́ющия.

В конец утрени:

Безма́терняго на Небеси́, па́че мы́сли и слу́ха, / на земли́ без отца́ родила́ еси́; / Того́, Богоро́дице, / моли́ о душа́х на́ших.

В четверток вечера и в пяток на Бог Госпо́дь:

Твое́ предста́тельство иму́ще, Пречи́стая, / и Твои́ми моли́твами лю́тых избавля́еми, / Кресто́м Сы́на Твоего́ везде́ соблюда́еми, / по до́лгу Тя вси благоче́стно велича́ем.

В конец утрени:

Пречи́стая Богоро́дице, / на Небесе́х благослове́нная и на земли́ славосло́вимая, / ра́дуйся, Неве́сто Неневе́стная.

В пяток вечера и в субботу на Бог Госпо́дь:

Гаврии́лу веща́вшу Тебе́, Де́во, ра́дуйся, / со гла́сом воплоща́шеся всех Влады́ка / в Тебе́, святе́м киво́те, / я́коже рече́ пра́ведный Дави́д, / яви́лася еси́ ши́ршая Небе́с, / поноси́вши Зижди́теля Твоего́: / сла́ва Все́льшемуся в Тя; / сла́ва Проше́дшему из Тебе́; / сла́ва Свободи́вшему нас Рождество́м Твои́м.

В конец утрени:

Безма́терняго на Небеси́, па́че мы́сли и слу́ха, / на земли́ без отца́ родила́ еси́; / Того́, Богоро́дице, / моли́ о душа́х на́ших.

ГЛАС 2

В неделю вечера и в понедельник на Бог Госпо́дь: