Даниловский молитвослов (СИ)

О преподобне княже Данииле, к иконе твоей притекающе, усердно молим тя: призри на нас (имена), с верою под кров молитв твоих прибегающих. Пролей теплое твое ходатайство ко Спасу всех, яко да утвердит миром приход сей и храм сей добре да сохранит, благочестие и любовь в людех православных насаждая, злобу же, междоусобие и нравов развращение искореняя; всем же нам вся благая ко временному животу и вечному спасению даруй молитвами твоими, яко да прославляем дивнаго во святых своих Христа Бога нашего вкупе со Отцем и Святым Духом во веки веков.

Аминь.

Молитва третия

О угодниче Божий, святый благоверный княже Данииле, сада Христова благовонный цвете, Неба церковнаго кроткая звездо, земли нашея небесный уме, града Москвы и державы нашея мудрый здателю, теплый к Богу молитвенниче, скорый в помощи, милостивый в нуждах! К тебе припадаем и тебе молимся: буди предстатель наш пред Престолом Божия славы неусыпный. Собери нас друг ко другу, да печали ближняго своего кийждо любовию нелицемерною приобщается. Онебеси ум наш, да, иго тяжкое земных попечений отвергше, бремя легкое Христова Евангелия возлюбим. Открый очи наши, да узрим нетленную красоту Господню и да не отчуждени будем жизни Божия. Тихость Духа Божия да соблюдет сердца наша. Весна покаяния да украсит дела наша. Княже милостивый и щедрый, сохрани страну нашу, град твой и зде молящихся тебе от всякия напасти, от враг видимых и невидимых, от губительства и глада, от междоусобныя распри и внезапныя смерти. Отверзи нам двери милосердия Божия и избави нас от всякаго зла. Под крепкий покров благостыни твоея прибегающе, молим: буди нам тихое пристанище в скорбех. Остени нас молитвами твоими. Соблюди нас от падений греховных и заблуждений, да сердцем сокрушенным, духом смиренным в печали и радости присно зовем: Господи, предстательством преподобнаго Твоего помилуй нас.

Аминь.

Преподобноисповедник Георгий Даниловский

Собор новомучеников и исповедников Церкви Русской*,

Собор Московских святых*,

4 июля, 23 сентября

Тропарь и кондак

Тропарь, глас 2

Издетска монашескую жизнь возжелал еси, / преподобне отче Георгие, / в нейже любовь Христову стяжав, / пастырь добрый многим людем был еси, / последи же и изгнание претерпев, / венцем исповедничества украсился еси. / И ныне, предстоя престолу Святыя Троицы, непрестанно моли // спасти и просветити души наша.

Кондак, глас 4

Евангельским словом вооружився, / всяку скорбь жития сего тленнаго и непостояннаго претерпел еси, / утешая чад твоих любовию, яже во Христе Иисусе, / преподобне Георгие, Даниловская похвало, // моли Христа Бога спасти нас, чтущих тя.

Канон

Песнь 1-я

Ирмос: Моисейскую песнь восприимши, возопий, душе: Помощник и Покровитель бысть мне во спасение, сей мой Бог, и прославлю Его.

Преподобне отче наш Георгие, моли Бога о нас.

Отверзи ми устне, Христе Царю, воспети угодника Твоего Георгия преподобнаго, да молитвами своими облак разорит страстей моих.

Преподобне отче наш Георгие, моли Бога о нас.

От юности возлюбил еси монашеское житие, преподобне, и верен был еси до смерти, в терпении стяжав душу твою, темже приемлеши воздаяние ныне от Христа праведнейшее.

Слава:

Издетска во обитель Оптину вселився, кротость, и терпение, и смирение стяжал еси, преподобне, имиже душу к приятию дара любве Христовы уготовал еси.

И ныне:

От враг видимых и невидимых избави, молимся, к Тебе прибегающих, Богородице, и разори всяк совет борющих нас, молитвами Твоими.

Песнь 3-я

Ирмос: Утверди мя, Господи Боже мой, да не похвалится враг мой о мне, Ты бо еси, Господи, утверждение мое, и прибежище, и сила.

Преподобне отче наш Георгие, моли Бога о нас.

Притек во обитель Оптину, духом сущих тамо преподобных отцев напитался еси, блаженне, возращая душу твою на пажитех спасительных, Георгие, таже, плод возрастив, возмогл еси ближнему помощи.

Преподобне отче наш Георгие, моли Бога о нас.

Не может град укрытися, верху горы стояй, сего ради постави тя Господь на свещнице настоятельства, и был еси пастырь добрый не иноком точию, но всем притекающим к тебе.

Слава:

Настоятельствующу ти во обители Мещовстей, глад бысть на месте том; препитавал же еси алчущия люди, зря Христа в притекающих к тебе.

И ныне:

Злое нападение врагов, обышедших нас, яко огнь палящее, ищущих всегда погибели нашей, Дево, росою молитв Твоих угаси.

Песнь 4-я