Ермак. Покоритель Сибири

И по поле воде доспели себе легкие струги, и поплыша вниз, с покорных беруще ясак. Роман же, князець их лутчей, бежал с жилья своего вверх по Ковде к Пелыми с родом своим лыжами и нартами. Егда же доплыша Рачева городища, и ту котелние шейтанъшики – збиратели со всех юрт на молбише к шейтану Рачю, и в зборе их многое, – вси утекоша в лес до единаго, в частой ельник, и жертву покинуша всю; и ждаша сутки и не дождався, ехали, собирающи ясак.

Прочие же скопишася между дву мысов горы Иртыша выше Цыньялы реки, злобящеся в уском месте, мняще, что Бог их, казаков, стругами не пропустит дале ехать вниз, ту остановит, да побьют всех. И умыслиша в ущине оружье себе коварно, крюки и укрюки, засеку и веревки, да удержат. Богдан же с товарищи, слыша скоп их зле, остановишася и молебъствоваша. И на всходе солнца пустишася напоплав и доплыша ту быстрины; остяцы же крюками своими и укрюками хотя хапати, они ж удариша вкруг из ружья на обе стороны, и повалишася, собою мятуще друг друга. И проплыша до Цыньялы и Нарымъскаго городка, а в городке точию жены их и дети и от страха омертвеша, плача, крыча и бегая. Тии же вымышленники в вечеру приходяще един по единому, оглядаяся и виде, яко не бьют жен их и детей, точию ласкают, во утрии собрашася с вси. Овии же разыдошася, оставшие же любезно данью и есаком поклонишася.

Прияше же ясак майя в 9 день и поплыша вниз до Колпуховы волости и сотника их и молбища шейтанскаго, и учиниша бой часа с три, и видеша убиенных, и здашася, и ясак даша доволно. И того числа поплыша до Колпухова городка, беруще ясак з боем и без бою. И маия в 20 день доплыша до Самара княжца, и ту в сборе 8 княжцов, ждуще побити силою. Богдан же с таварищи, моляся Богу, в день неделный приплыша протокою под самой Самар, и засташа многих остяков на карауле спящих твердо без опасения. Егда же на стоящих удариша из ружья и убиша княжца Самару и с родом его, прочие же в собрании в разбех разлучишася по своим жильям. А жителей осталося малое число, и принесоша ясак с поклоном и шерстоваша ту. Богдан же поживе неделю и поставиша князя болшего Алачея болшим, яко богата суща, и отпустиша со своими честно.

И оттоль поидоша на Обь и виде много пустово места и жилья мало, и присташа на Белогорье; ту бо у них молбище болшее богыне древней: нага с сыном на стуле седящая; приемлюще дары от своих, и дающе ей статки во всяком промысле, а еже кто по обету не даст, мучит и томит, а хто принесет жалеючи к ней, тот пред нею пад умрет, имяше бо жрение и съезд великии. Егда же вниде им в слух приезд Богдана, велела спрятатися и всем бежати, и многое собрание кумирское спряташа и до сего дни.

Богдан же виде пустоту жилья, и размыслиша с таварищи ехать дале не по што, а возвратишася, пождав на месте три дни, в Сибирь град. А кои бои и были по дороге, на низ пловучи, и тех всех описать трудно подробну: вои убитых нет, а раненых – кажной многаши. И приехали в радости маия 29 день сь есаком, и едучи по погромленным городкам, смотря. Мнози утвердишася жити постоянно во всем покорни, стречаше и провожающе казаков и с провожатыми – честно, а егда же приносяще ясак, и приемъшики вси в наряде – в цветном платье, чтуще честь, царскаго величества славу. И со зборщиками доехавши к Ермаку здраво и в честности, в радости вси прославиша Бога.

По взятии Сибири 92-го (1584), августа 6 день, по ведомости оманшиков, поехали Ермак с казаки с тремя сты человек стретить прикочевных бухарцов со многими тавары, а Кучюм де стоит далече в урочище Вагая реки. Егда же поидоша вверх по Иртышу, и все волости покорни беша во всем, а слыху никакова о Кучюме и бухарцах не обретоша. И прогребли вверх по Иртышу до Сартезеря и до болшего князя Бегиша Княжева городка и ту учиниша великий бой со зборными тотары и с карачинцы; у Бегиша же две пушки железные из Казани привезены, их же казаки умолвиша, и не могоша лунуть на казаков вдругорядь, и спехнуша их прямо в Ыртыш под гору; и ту прибиша всех с ярости без остатку, а малое число утекли; и взяша имения много и закопаша в погребы с пожитки. И погребоша к Шамше и Крянчикам, и в Салахе беша малой бой; и погребоша в Каурдак, ту бо татара вси спряташася в темной елник и болота; и догребоша до старости древняго поставления царя Саргачика Ишимскаго, и з боем взяша его, смиряюще.