Город Старица и местночтимая подвижница Пелагия

Он же, слышав совет благ от уст самодержавных, вельми возрадовася душею, ведый, яко Божиим хотением сицево тщание бысть и вера благочестиваго царя. Вкупе ж и сам Богом подвизаем трудолюбным подвигом и великим радением, возвещает благое трудолубие у Христолюбиваго царя святейшему Вселенскому патриарху Константинопольскому кир Иеремию. И совета блага просит от его понеже и сам от многаго благого.

Слышав же се святейший Вселенский патриарх Иеремие, вельми возрадовась душею и благодарная воздате всесильному и премудрому Богу о благости Господня и всемощныя его силы, иже от своего исполнения преподатетолико благосердие и веру о Святем Дусе сыну своему, Богом венчанному царю и государю великому князю Феодору Ивановичю всеа Русии самодержцу, такоже и тебе, правителю Руския земли и искреннему доброхоту царскому, толико попечением и трудолюбезный подвиг ко исполнению православныя христианския веры и к велелепию и к превысочайшей чести святыя превеликия соборныя апостольския церкви; благодатию же Пресвятого и животво-рящаго Духа и праведныя ради веры самодержавнаго государя желание сердец ваших исполнит премилосердный Бог, по реченному: «Аще что просите с верою, во имя мое, дасться вам».

И Божиим превысоким человеколюбием, и изволением о Святем Дусе блаженныя памяти сына моего, Богом венчаннаго царя и государя великого князя Феодора Ивановича всеа Русии самодержца, паче ж попечением и труды истиннаго по благочестии поборника, искренняго доброхота и ближнего приятеля царева, о Святем Дусе присно возлюбленнаго ми сына и государя правителя Руския земли Бориса Феодоровича, ныне же, Божиею милостию, Богом венчаннаго царя и государя и самодержца всея Руския земли, благословением и рукоположением святейшего Вселенского патриарха Константинопольского кир Иеремия, по уставу и по правилом божественных апостол и святых отец, и по совету преосвященных митрополитов, и архиепископов, и епископов, и всего освященнаго собора великого Росийского скифетродержания и Греческаго, аз, смиренный Иев, избран и поставлен на патриаршество в преименитом и царствующем граде Москве в соборной апостольской церкви пречистыя Богородица честнаго и славнаго ея Успения на превысочайший престол руских первопрестольников и великих святителей и чюдотворцев Петра, и Алексея, и Ионы в лето 7097 (1589) генваря в 26 день на память пРеподобнаго отца нашего Ксенефонта и чад его.

По поставлении же нашего смирения на патриаршество, отец мой и брат о Святем Духе святейший Вселенский патриарх кир Иеремия свои престол в Констянтинъград отъиде. И тамо, созвавшу ему собор святейших вселенских патриархов Александрейского, и Антиохейского, и Ерусалимского, такоже и преосвященных митрополитов, и архиепископов, и епископов греческих, иже под их областию сущих, и соборне о поставлении нашего смирения великим утверждением утвердиша и писмены написаша, яко и по нас в род и род Росийской церкве патриаршеским благолепием украшатися и поставлятись патриархом в царствующем граде Москве избранием и повелением благочестивых царей и великих князей всеа Русии от сущих ту митрополитов, и архиепископов, и епископов, иже под нашим патриаршеством во области Росийскаго скифетродержания. И таковое писание своими руками подписаша и печатьми запечатлеша, яко и во веки быти тому непоколебиму и неподвижиму. И прислаша к самодержавному великому государю царю и великому князю Феодору Ивановичю всеа Русии самодержцу с преосвященным Дионисием митрополитом Терновским на большее утверждение.

Повнегда же приимшу ми той превеликий престол и правящу, пребых на нем лет…

(далее в подлиннике оставлено пустое место, ибо дни жизни и патриаршества Иова еще не были отмерены).

Весть же Бог, в колико рыдание и слезы впадох, отнеле ж взыде на мя сан святительства, ово немощи ради своея, понеж не имущу ми довола духовнаго, ино ж о бедах человеческих паствы моея много болезновах и лютыми напастьми погружаем бых. Еще ж к сим в многи скорби и в печали впадох о преставлении о Святем Дусе сына моего, благовернаго и благороднаго христолюбового царя и великого князя Феодора Ивановича, государя и самодержца всеа Русии. И всяко вещем сопротивное нападе на мя: озлобление и клеветы, укоризны, рыдания ж и слезы — сия убо вся мене смиренаго достигоша.