Юрий Звенигородский. Великий князь Московский

Данный список духовной грамоты XV века хранится ныне в РГАДА (Российском государственном архиве древних актов).

Во имя Отца и Сына и Святаго Духа, се яз, грешный и худыи раб Божий Юрьи Дмитриевич, пишю грамоту душевную в своем смысле. Даю ряд детем своим, Василью, и Дмитрею, и Дмитрею Меншему.

Приказываю детем своим, Василью, Дмитрею, и Дмитрею Меншему, вотчину свою, в Москве свои жеребей, чем мя благословил отец мои, князь великий Дмитреи Иванович, в городе, и в станех, и в пошлинах в городских, и в тамзе, и в восмьничем, и в численых людех, и в мытех, свои жеребей трема сыном моим на трое.

А се даю сыну своему Василью: своего удела, Звенигород с волостми, и с тамгою, и с мыты, и з бортми, и с селы, и со всеми пошлинами. А Звенигородский волости: Угожа и з бортники, Плеснь и з бортники, Дмитреева слободка, Троена, Негуча, Ондреевьское. А из Московьских сел даю сыну своему Василью: село Домантовьское, и з деревнями, и со всем, что к нему потягло, как и за мною было. Да даю сыну своему Василью дуги Тамашиньскии в Перерве.

А се даю сыну своему Дмитрею: город Рузу, и с волостми, и с тамгою, и с мыты, и з бортью, и с селы, и со всеми пошлинами. А волости Рузский: Юрьева слобода, Замошье, Кремична и з бортники Кремиченьскими, Скирманово с Белми, Ростовци, Фоминьское, да село Михаиловьское, да Микифоровьское, и со всеми деревнями. А из Московского даю сыну своему Дмитрею бортники на оной стороне Москвы, как и за мною были, что ся есмя розделили с своею братьею, по душевной грамоте отца своего, да луг противу города.

А се благословляю сына своего Дмитрея Меншаго: Вышегород и со всеми пошлинами, и с мыты, и з бортью, и с селы, и с Коситьским селом, и з деревнями. Да к тому есми дал ему: Суходол с-Ыстьею, и с-Ыстервою, и с Уборичною слободкою, и з Боровковою, и з бортники, и со всеми селы. Да дал есми ему Смоляную, и с селы, и з бортми. А из Московьских сел даю сыну своему Дмитрею: село Михалевьское, и з деревнями, и з бортники Михалевьскими, и со всем, что к нему потягло, как и за мною было, да селце, что у города, Сущевьское, да Доблиньскии соколники и бортники, и со псари, и как и за мною было, да луг Ходыньскои.

А чем мя Бог пожаловал и царь, Дмитровом, и с Московьскими волостми, и с селы, что было за братом за моим, за князем за Петром, чем его отец мои благословил, князь великий Дмитреи, и яз тем благословляю трех своих сынов, Василья, Дмитрея и Дмитрея Меншего, в городе, и в станех, и с селы, и з бортники, и тем дети мои поделятся ровно.

А из волостей из Дмитровьских даю сыну своему Василью: Селну, Гуслицю, Вохну, Загарье, Рогожь, Кунеи, или что будет в тех волостех села или пути, а то все даю сыну своему Василью.

А Дмитрею, сыну своему, даю Дмитровьскии волости: Городок, Шорна, Корзенево, Воря, Вышегород, Инобажь, и что в тех волостех села и пути, и то все даю сыну своему Дмитрею.

А Дмитрею, сыну своему, даю волости Дмитровьскии: Ижво, Мушкова, Раменка, Берендеево с слободкою с Кузмидемьяньскою, Лутосна, Куликово, и что в тех волостех села, или пути, или бортники, а то все даю сыну своему Дмитрею Меншему.

А се даю трем своим сыном, Василью, Дмитрею, да Дмитрею Меншему, Вятку з городы и волости, а тем ся дети мои поделять межи собе ровно.

А чем мя благословил отец мои, князь великий Дмитреи, Галичем, деда своего куплею, и яз благословляю сына своего Дмитрея Меншего городом Галичем, и с станы городскими, и со всеми волостми, и Солью с варницами, и с серебром, что на людех, опричь церковных варниць.

А се даю сыном своим, Василью, Дмитрею, да Дмитрею Меншему, двор свои да сад за городом на посаде, да садец меншеи, а тем ся дети мои поделят межи собе без обиды, ровно.

А коли будет детем моим дати дань великому князю с своей отчины, с Звенигорода и з Галича, ино имется Звенигороду в семтысячнои выход пятьсот руб. и одиннатцать руб., и дети мои то розведуг на свои уделы по тому окладу, колко на которой волости яз имал. А с Сурожика, и с Лу-чиньского, и с Шепковы дети мои то розведут по тому окладу, как яз имал у своего брата, у князя у Костянтина. А Галичю имается в семтысячнои выход пятсот руб. и пол-30 руб., и ис того сын мои Дмитреи возмет с Шачебала и с Ликурги четвертую чясть да отведет в болшюю казну, а останок того сын мои Дмитреи розведет на Галич, на свои удел, по тому окладу, колко на которой волости яз имал, да то отдасть.

А благословляю сына своего Василья икона Пречистая Богородица окована золотом, Смоленьская. А благословляю сына своего Дмитрея икона Спас окована, что мя ею благословила княгини Марь… Данилова. А благословляю сына своего Дмитрея Меншего икона Пречистая золотом окована, что мя благословила мати моя, княгини великая.