Хрестоматия по истории СССР. Том 1

В лето 6496, иде Володимер с вой[25] на Корсунь², град гречьский, и затворишася корсуняне в граде; и ста Володимер об он пол города в лимени³, дали града стрелище едино⁴, и боряхуся крепко из града, Володимер же обьстоя⁵ град. Изнемогаху в граде людье, и рече Володимер к гражаном: «аще ся не вдасте, имам стояти и за 3 лета». Они же не послушаша того. Володимер же изряди воа своа, и повеле приспу сыпати⁶ к граду. Сим же спущим⁷, корсуняне, подъкопавше стену градьскую, крадуще сыплемую перьсть, и ношаху к собе в град, сыплюще посреде града; воини же присыпаху боле, а Володимер стояше. И [се] мужь корсунянин стрели, имянем Настас, напсав⁸ сице на стреле: «кладязи, яже суть за тобою от въстока, ис того вода идеть по трубе, копав перейми». Володимер же, се слышав, возрев на небо, рече «аще се ся сбудеть, и сам ся крещю». И ту абье повеле копати преки⁹ трубам, и преяша воду; людье изнемогоша водною жажею и предашася. Вниде Володимер в град и дружина его, и посла Володимер ко царема, Василью и Костянтину¹⁰, глаголя сице: «се град ваю славный взях; слышю же се, яко сестру имата девою, да аще ее не вдаста за мя, створю граду вашему, якоже и сему створих». И слышаста царя, быста печальна и въздаста весть, сице глаголюща: «не достоить хрестеяном за поганыя¹¹ даяти; аще ся крестиши, то и се получишь, и царство небесное приимеши, и с нами единоверник будеши; аще ли сего не хощеши створити, не можем дата сестры своее за тя». Си слышав Володимер, рече посланым от царю: «глаголите царема тако: яко аз крещюся, яко испытах преже сих дний закон вашь, и есть ми люба вера ваша и служенье, еже бо ми споведаша послании нами мужи». И си слышавша царя рада быста, и умолиста сестру свою, имянем Аньну, и посласта к Володимеру, глаголюща: «крестися, и тогда послеве сестру свою к тебе». Рече же Володимер: «да пришедъше с сестрою вашею крестять мя». И послушаста царя [и] посласти сестру свою, сановники некия и прозвутеры¹²; она же не хотяше ити: «яко в полон»¹³, рече, «иду, луче бы ми еде умрете». И реста ей брата: «еда како обратить бог тобою Рускую землю в покаянье, а Гречаськую землю избавишь от лютыя рати; видиши ли, колько зла створиша Русь греком? и ныне аще не идеши, тоже имут створити нам»; и одва ю принудиша. Она же, седъши в кубару¹⁴, целовавши ужики¹⁵ своя с плачем, поиде крес море; и приде к Корсуню, и изидоша корсуняне с поклоном, и въведоша ю в град, и посадиша ю в полате…

Епископ же Корсуньский с попы царицины, огласив, крести Володимира… Се же видсвше дружина его, мнози крестишася. Крести же ся в церкви святаго Василья, и есть цери та стоящи в Корсуне граде, на месте посреди града, идеже торг деють корсуняне; полата же Володимеря с края церкве стоить и де сего дне, а царицина полата за олтарем. По крещеньи же приведе царицю на браченье. Се же, не сведуще право¹⁶, глаголють, яко крестилъся есть в Киеве; инии же реша: [в] Василеве; друзии же инако скажють…

Володимер… приде Киеву. Яко приде¹⁷, повеле кумиры испроврещи, овы исещи, а другия огневи предати; Перуна же повеле привязати коневи к хвосту и влеши с горы по Боричеву на Ручай¹⁸, 12 мужа пристави тети¹⁹ жезльем…

Влекому же ему по Ручаю к Днепру, плакахуся его невернии людье, еще бо не бяху прияли святаго крещенья; и привлекше, вринуша и²⁰ в Днепр. И пристави Володимер, рек: «аще кде пристанеть, вы отревайте²¹ его от берега, дондеже порогы проидеть; то тогда охабитеся его»²². Они же повелевая створиша. Яко пустиша и, пройде сквозе порогы, изверже и ветр на рень, и оттоле прослу Перуня Рень²³, якоже и до сего дне словеть. Посемь же Володимир посла по всему граду, глаголя: «аще не обрящеться кто [заутра на] реце, богат ли, ли убог, или нищь, ли работник, противен мне да будеть»…

И повеле рубити церкви и поставляти по местом, идеже стояху кумиры; и постави церковь святаго Василья на холме, идеже стояше кумир Перун и прочий, идеже творяху потребы²⁴ князь и людье; и нача ставити по градом церкви и попы и люди на крещенье приводити по всем градом и селом. Послав нача поимати у нарочитые чади дети, и даяти нача на ученье книжное; матере же чад сих плакахуся по них, еще бо не бяху ся утвердили верою, но акы по мертвых плакахуся.

ОСАДА КОРСУНЯ ВЛАДИМИРОМ И КРЕЩЕНИЕ РУСИ(Перевод)