Минея праздничная

Благода́ть устна́м твои́м, Луко́, / о́гненным язы́ком излия́ся, апо́столе, / и язы́к о́гненный показа́лся еси́, / словеса́ испуща́я све́та, / све́та досто́йным пропове́данием; / стре́лы же паля́щия тмы́ жела́ющим, / пиша́ и уча́ честно́е Ева́нгелие, / и воня́ жи́зненная, / жи́зни вои́стинну хотя́щим яви́лся еси́, / я́коже Па́вел рече́, / его́же име́л еси́ учи́теля: / воня́ же сме́рти па́ки жи́знь не возлюби́вшим. / Но на́м ми́р, и жи́знь, и све́т пода́ждь, / и ве́лию ми́лость.

Сти́х: Небеса́ пове́дают сла́ву Бо́жию, / творе́ние же руку́ Его́ возвеща́ет тве́рдь.

Позна́хом от слове́с твои́х, / я́коже ре́кл еси́, слове́с утвержде́ние, / я́же ре́кл еси́, боже́ственне таи́нниче, / поне́же писа́ти на́м о ве́щех на́чал еси́, / о ни́хже извеще́н бы́л еси́, / и я́коже тебе́ преда́ша, / и́же испе́рва самови́дцы; / и́мже и ты́ ра́вен бы́л еси́, / служи́тель Сло́ва воплоще́ния, / Его́же по воста́нии во Еммау́се ви́дел еси́ / и горя́щим се́рдцем с Клео́пою хле́б я́л еси́. / Того́ боже́ственныя теплоты́ / и на́ша, чту́щих тя́, ду́ши испо́лни.

Сти́х: Во всю́ зе́млю изы́де веща́ние и́х / и в концы́ вселе́нныя глаго́лы и́х.

Ра́дуйся, еди́н, написа́вый на́м, е́же ра́дуйся, / ра́дуяся, Чи́стыя Благове́щение / и сию́ Господороди́тельницу, / ре́кша Крести́теля из чре́ва, / его́же написа́в и зача́тие, и Сло́ва воплоще́ние, / искуше́ния же и чудеса́, словеса́ и стра́сти, / кре́ст и сме́рть, и воста́ние, / е́же ви́дел еси́, и восхо́д, / Ду́ха же соше́ствие, / пропове́дник же дея́ния, / и изря́днее же Па́влова, / его́же показа́лся еси́ соше́ственник, / вра́чь же и таи́нник, / и свети́льник Це́ркве, ю́же соблюда́й всегда́.

Сла́ва,гла́с 6: Всему́дрый ло́вче, святы́й учениче́, де́лателю Спа́сов и пропове́дниче Того́ страсте́й, и́же тва́рь ве́рою претеки́й и от пре́лести язы́ки собра́в, и Бо́гу приве́л, я́ко воню́ добру́, на небеса́ пости́гл еси́. Те́м, предстоя́ Судии́ все́х, моли́ся изба́вити ны́ от беззако́ний на́ших и в де́нь Суда́ свободи́тися от му́ки.

И ны́не,Богоро́дичен: Вели́ких дарова́ний, Чи́стая Де́во Богома́ти, Ты́ сподо́билася еси́, я́ко родила́ еси́ пло́тию Еди́наго от Тро́ицы, Христа́ Жизнода́вца, во спасе́ние ду́ш на́ших.

Тропа́рь, гла́с 3: Апо́столе святый и евангели́сте Луко́, моли́ ми́лостиваго Бо́га, да прегреше́ний оставле́ние пода́ст душа́м на́шим.

Или́ се́й, гла́с 5: Апо́стольских дея́ний сказа́теля и Ева́нгелия Христо́ва све́тла списа́теля, Луку́ препе́таго, неиспи́санна су́ща Христо́ве Це́ркви, пе́сньми свяще́нными свята́го апо́стола похва́лим, я́ко врача́ су́ща, челове́ческия не́мощи, естества́ неду́ги и я́зи ду́ш исцеля́юща и моля́щася непреста́нно за ду́ши на́ша.

Сла́ва, и ны́не,Богоро́дичен воскресен.

На утрени

На Бо́г Госпо́дь: тропа́рь, глас 5:

Апо́стольских дея́ний сказа́теля и Ева́нгелия Христо́ва све́тла списа́теля, Луку́ препе́таго, неиспи́санна су́ща Христо́ве Це́ркви, пе́сньми свяще́нными свята́го апо́стола похва́лим, я́ко врача́ су́ща, челове́ческия не́мощи, естества́ неду́ги и я́зи ду́ш исцеля́юща и моля́щася непреста́нно за ду́ши на́ша. Дважды.

Сла́ва, и ны́не,Богоро́дичен, глас тойже:

Ра́дуйся, две́ре Госпо́дня непроходи́мая; / ра́дуйся, стено́ и покро́ве притека́ющих к Тебе́; / ра́дуйся, необурева́емое приста́нище и Неискусобра́чная, / ро́ждшая пло́тию Творца́ Твоего́ и Бо́га, / моля́щи не оскудева́й о воспева́ющих / и кла́няющихся Рождеству́ Твоему́.

По 1-й стихоло́гии, седа́лен, гла́с 3:

Прииди́те вси́, апо́стола Луку́ восхва́лим, я́ко ко́рмчия, и́дольскую бо ле́сть упраздни́ и к све́ту жи́зни возведе́, и в Тро́ицу ве́ровати научи́. Те́мже дне́сь благоче́стно того́ почита́юще ве́рнии, сла́вим Христа́ Бо́га на́шего. Два́жды.

Сла́ва, и ны́не,Богоро́дичен:

Ра́дуйся, Мари́е, Де́во Ма́ти, горо́ свята́я, Еде́мский раю́, из Нея́же роди́ся Христо́с Бо́г, безсе́менное Сло́во, Имже жи́знь мíрови прозябе́.

По 2-й стихоло́гии, седа́лен, гла́с 3. Подо́бен: Красоте́ де́вства:

Путеше́ствовав ты́ по воста́нии, Луко́ всесвяще́нне, с Клео́пою про́чее во гра́д Еммау́с, вопроше́ние творя́щу ти́, предста́ Госпо́дь о́бразом прикрове́н, а́бие же прие́м хле́ба пода́ние, позна́л еси́ Спа́са, Его́же моли́ дарова́ти на́м ве́лию ми́лость. Два́жды.

Сла́ва, и ны́не,Богоро́дичен:

Яко невозде́ланная, Де́во, лоза́, красне́йший Гро́здь прозябла́ еси́, источа́ющь на́м вино́ спасе́ния, все́х веселя́щее ду́ши же и телеса́. Те́мже я́ко вину́ Тя до́брых блажа́ще при́сно, со а́нгелом вопие́м Ти́: ра́дуйся, Обра́дованная.

Полиелей и величание:

Велича́ем тя, / Апо́столе Христо́в и Евангели́сте Луко́, / и чтим боле́зни и труды́ твоя́, / и́миже труди́лся еси́ / во благове́стии Христо́ве.

Псалом избранный.