Минея праздничная

Сла́ва,глас 6: Всегда́ иму́ще Христа́, де́йствующа в вас,/ святи́и безсре́бреницы,/ чудоде́йствуете в мíре,/ немощству́ющия врачу́ете,/ и́бо врачевство́ ва́ше исто́чник есть неисчерпа́емый:/ че́рплемь же, па́че преистека́ет/ и, излива́емь, изоби́лует;/ на ки́йждо день истощава́емь, и умножа́ется,/ всем подая́ и неоскудева́емь пребыва́я;/ и че́рплющии насыща́ются врачева́ний,/ то́йжде пребыва́ет неиждиву́щ./ Что у́бо вас нарече́м?/ Цели́тельных ли враче́в душ же и теле́с?/ Цели́телей страсте́й неисце́льных,/ ту́не исцеля́ющих всех,/ прие́мших дарова́ние от Спа́са Христа́,/ подаю́щаго нам ве́лию ми́лость.

И ны́не,Богоро́дичен: Никто́же, притека́яй к Тебе́,/ посра́млен от Тебе́ исхо́дит,/ Пречи́стая Богоро́дице Де́во,/ но про́сит благода́ти/ и прие́млет дарова́ние к поле́зному проше́нию.

Или́ Крестобогоро́дичен. Подо́бен: Тридне́вен:

Ви́дящи Тя распина́ема, Христе́,/ Тебе́ Ро́ждшая вопия́ше:/ что стра́нное е́же ви́жу та́инство, Сы́не Мой?/ Ка́ко на Дре́ве умира́еши, пло́тию пове́шен,/ Жи́зни Пода́телю?

Тропа́рь, глас 8: Святи́и безсре́бреницы и чудотво́рцы, Космо́ и Дамиа́не,/ посети́те не́мощи на́ша:/ ту́не прия́сте, ту́не дади́те нам.

На утрени

На Бог Госпо́дь: тропа́рь святы́х, глас 8:

Святи́и безсре́бреницы и чудотво́рцы, Космо́ и Дамиа́не,/ посети́те не́мощи на́ша:/ ту́не прия́сте, ту́не дади́те нам. Дважды.

Сла́ва, и ны́не,Богородичен воскресен:

И́же нас ра́ди рожде́йся от Де́вы / и распя́тие претерпе́в, Благи́й, / испрове́ргий сме́ртию смерть, / и воскресе́ние явле́й, я́ко Бог, / не пре́зри, я́же созда́л еси́ руко́ю Твое́ю; / яви́ человеколю́бие Твое́, Ми́лостиве, / приими́ ро́ждшую Тя Богоро́дицу, моля́щуюся за ны, / и спаси́, Спа́се наш, лю́ди отча́янныя.

По 1-й кафи́зме седа́лен Окто́иха или́ святы́х, глас 4. Подо́бен: Ско́ро предвари́:

В мíре Богоуго́дно житие́ стяжа́вше, богатносве́тнии,/ исцеле́ния нам, ра́дость прие́млющим,/ извеще́ние святы́м, че́стне научи́вшеся, подаете́:/ яви́стеся бо, пресла́внии, вра́чеве боля́щих,/ Христу́, споспешеству́ющу вам, Космо́ и Дамиа́не, святи́и безме́здницы. Дважды.

Сла́ва, и ны́не,Богоро́дичен: Пое́м тя, Богоневе́сто и Ма́ти Христа́ Бо́га,/ сла́вяще Рождество́ Твое́ непостижи́мое,/ и́мже изба́вихомся от ле́сти диа́воли и вся́ческих бед,/ Влады́чице Богоро́дице, и ве́рно взыва́ем:/ поми́луй ста́до Твое́, Еди́на Всепе́тая.

По 2-й кафи́зме седа́лен, глас 8. Подо́бен: Повеле́нное та́йно:

От безме́здных сокро́вищ чудеса́ содева́юще,/ пречи́стых даро́в благода́тных яви́стеся раче́нием Боголе́пне,/ бога́тство восприе́мше Небе́сное и сла́ву оста́вльше земну́ю./ Тем песнь прино́сим всех Соде́телю,/ благода́ть дарова́вшему вам исцеле́ний. Дважды.

Сла́ва, и ны́не,Богоро́дичен: Непреме́ннаго Бога я́ко ро́ждшая,/ измене́ннаго мя при́сно грехо́м,/ утверди́ се́рдце мое́, Блага́я, моли́твами ма́терними Твои́ми,/ я́ко да и аз зову́ Ти, Богоро́дице Мари́е:/ поми́луй ста́до Твое, е́же стяжа́ла еси́, Всенепоро́чная.

Полиелей и велича́ние:

Велича́ем вас,/ чудотво́рцы сла́внии, Космо́ и Дамиа́не,/ и чтим святу́ю па́мять ва́шу,/ наста́вницы заблу́ждшим, исцели́тели боля́щим/ и собесе́дницы А́нгелом.

Псалом избранный.

¹ Бог нам Прибе́жище и Си́ла.

² Помо́щник в ско́рбех обре́тших ны зело́.

¹ Сего́ ра́ди не убои́мся, внегда́ смуща́ется земля́.

² Бо́же, кто уподо́бится Тебе́; да не премолчи́ши, ниже́ укроти́ши, Бо́же.

¹ Я́ко се врази́ Твои́ возшуме́ша, и ненави́дящии Тя воздвиго́ша главу́.

² На лю́ди Твоя́ лука́вноваша во́лею, и совеща́ша на святы́я Твоя́.

¹ Положи́ша тру́пия рабо́в Твои́х, бра́шна пти́цам небе́сным.

² Пло́ти преподо́бных Твои́х звере́м земны́м.

¹ Пролия́ша кровь их я́ко во́ду.

² Я́ко Тебе́ ра́ди умерщвля́еми есмы́ весь день.

¹ Вмени́хомся я́ко о́вцы заколе́ния.

² Положи́л еси́ нас в при́тчу во язы́цех.

¹ И бых я́звен весь день.

² Разже́гл еси́ ны, я́коже разжиза́ется сребро́.

¹ Проидо́хом сквозе́ огнь и во́ду, и изве́л еси́ нас в поко́й.

² Весели́теся о Го́споде, и ра́дуйтеся пра́веднии.

¹ Я́ко Госпо́дь в ро́де пра́ведных.

² И насле́дие их в век бу́дет.

¹ Воззва́ша пра́веднии и Госпо́дь услы́ша их.

² Свет возсия́ пра́веднику и пра́вым се́рдцем весе́лие.

¹ В па́мять ве́чную бу́дет пра́ведник.

² Святы́м, и́же суть на земли́ Его́, удиви́ Госпо́дь вся хоте́ния Своя́ в них.

¹ Ди́вен Бог во святы́х Свои́х.

² Пра́ведник я́ко фи́никс процвете́т, я́ко кедр, и́же в Лива́не, умно́жится.

¹ Возвесели́тся пра́ведник о Го́споде и упова́ет на Него́.

² И похва́лятся вси пра́вии се́рдцем.

Сла́ва, и ны́не: Аллилу́иа, трижды.

По полиеле́и седа́лен, глас 8. Подо́бен: Прему́дрости: