Минея праздничная

Днесь благоволе́ния Бо́жия предображе́ние / и челове́ков спасе́ния пропове́дание / в хра́ме Бо́жии я́сно Де́ва явля́ется / и Христа́ всем предвозвеща́ет. / Той и мы велегла́сно возопии́м: / ра́дуйся, смотре́ния Зижди́телева исполне́ние. Трижды. [47]

На утрени

На Бог Госпо́дь: тропарь, глас 4:

Днесь благоволе́ния Бо́жия предображе́ние / и челове́ков спасе́ния пропове́дание / в хра́ме Бо́жии я́сно Де́ва явля́ется / и Христа́ всем предвозвеща́ет. / Той и мы велегла́сно возопии́м: / ра́дуйся, смотре́ния Зижди́телева исполне́ние. Трижды.

По 1-м стихословии седален, глас 1. Подобен: Лик А́нгельский:

Пра́ведных плод, Иоаки́ма и А́нны, прино́сится Бо́гу во святи́лище свято́е, / пло́тию младе́нствующи, Пита́тельница Жи́зни на́шея, / Ю́же благослови́ свяще́нный Заха́рия: / Сию́ вси я́ко Ма́терь Бо́жию ве́рно да ублажи́м.

Сла́ва, и ны́не,тойже.

По 2-м стихословии седален, глас 4. Подобен: Удиви́ся Ио́сиф:

Пре́жде зача́тия, Чи́стая, освяти́лася еси́ Бо́гу / и, ро́ждшися на земли́, дар принесла́ся еси́ ны́не Ему́, / исполня́ющи оте́ческое обеща́ние: / в Боже́ственнем же хра́ме, я́ко су́що Боже́ственный храм, / от младе́нства чи́сте, со свеща́ми све́тлыми отдана́ бы́вши, / яви́лася еси́ Прия́телище Непристу́пнаго и Боже́ственнаго Све́та. / Вели́ко вои́стинну предше́ствие Твое́, / еди́на Богоневе́сто и Присноде́во.

Сла́ва, и ны́не,тойже.

Полиелей и величание:

Велича́ем Тя, / Пресвята́я Де́во, / Богоизбра́нная Отрокови́це, / и чтим е́же в храм Госпо́день / вхожде́ние Твое́.

Псалом избранный.

¹ Ве́лий Госпо́дь и хва́лен зело́, во гра́де Бо́га на́шего, в горе́ святе́й Его́.

² Благокоре́нным ра́дованием всея́ земли́.

¹ Пресла́вное глаго́лашася о тебе́, гра́де Бо́жий.

² Град Царя́ вели́каго.

¹ Я́коже слы́шахом, та́ко и ви́дехом.

² Во гра́де Го́спода сил, во гра́де Бо́га на́шего.

¹ Бог основа́ и в век.

² Освяти́л есть селе́ние Свое́ Вы́шний.

¹ Святы́ня и великоле́пие во святи́ле Его́.

² Свят храм Твой, ди́вен в пра́вде.

¹ Сия́ врата́ Госпо́дня, пра́веднии вни́дут в ня.

² Предста́ Цари́ца одесну́ю Тебе́.

¹ В ри́зах позлаще́нных оде́яна, преиспещре́на.

² Лицу́ Твоему́ помо́лятся бога́тии в лю́дстии.

¹ Дще́ри царе́й в че́сти Твое́й.

² Вся сла́ва Дще́ре Царе́вы внутрь.

¹ Ря́сны златы́ми оде́яна и преиспещре́на.

² Приведу́тся Царю́ де́вы в след Ея́.

¹ Бли́жняя Ея́ приведу́тся Тебе́.

² Приведу́тся в весе́лии и ра́довании, введу́тся в храм Царе́в.

¹ Слы́ши Дщи и виждь, и приклони́ у́хо Твое́.

² И забу́ди лю́ди Твоя́, и дом отца́ Твоего́.

¹ И возжела́ет Царь добро́ты Твоея́.

² Помяну́ и́мя Твое́ во вся́ком ро́де и ро́де.

¹ Восприя́хом, Бо́же, ми́лость Твою́, посреде́ люде́й Твои́х.

² Сего́ ра́ди лю́дие испове́дятся Тебе́ в век, и в век ве́ка.

Сла́ва, и ны́не: Аллилу́иа, трижды.

По полиелеи седален, глас 8. Подобен: Повеле́нное та́йно:

Да ра́дуется Дави́д песнопи́сец, / и да ликовству́ет Иоаки́м со А́нною, / я́ко плод святы́й из них произы́де, / Мари́я светоно́сная, Боже́ственная свеща́, / и ра́дуется, входя́щи в храм, / Ю́же и, зря, благослови́ Варахи́ин сын / и, ра́дуяся, взыва́ше: / ра́дуйся, Чу́до всемíрное.

Сла́ва, и ны́не,тойже.

Степенна, 1-й антифон 4-го гласа:

От ю́ности моея́ / мно́зи бо́рют мя стра́сти, / но Сам мя заступи́, / и спаси́, Спа́се мой.

Ненави́дящии Сио́на, / посрами́теся от Го́спода, / я́ко трава́ бо огне́м / бу́дете изсо́хше.

Сла́ва, и ны́не: Святы́м Ду́хом / вся́ка душа́ живи́тся, / и чистото́ю возвыша́ется, / светле́ется Тро́ическим Еди́нством священнота́йне.

Прокимен, глас 4: Слы́ши, Дщи, и виждь, и приклони́ у́хо Твое́.

Стих: Отры́гну се́рдце мое сло́во бла́го, глаго́лю аз дела́ моя Царе́ви.

Другий прокимен: Вся́кое дыха́ние / да хва́лит Го́спода.

Стих: Хвали́те Бо́га во святы́х Его́, хвали́те Его́ в утверже́нии си́лы Его́.

Евангелие от Луки, зачало 4 (Лк 1:39–49, 56).