Минея праздничная

Ирмос: Колесницегони́теля фарао́ня погрузи́ / чудотворя́й иногда́ / Моисе́йский жезл, крестообра́зно порази́в / и раздели́в мо́ре: / Изра́иля же беглеца́, пешехо́дца спасе́, / песнь Бо́гови воспева́юща.

Припев: Преподо́бне о́тче на́ш Амвро́сие, моли́ Бо́га о на́с.

Це́рковь ны́не торжеству́ет, / све́тло пра́зднующи твою́ святу́ю па́мять, / и с ра́достию воспева́ет ти хвале́бную песнь, / сла́вящи Го́спода, ди́внаго во святы́х Свои́х.

Позна́л еси́ сла́дость жи́зни во Христе́ / и не обину́яся оста́вил еси́ пре́лесть земны́х благ и суету́ мíра, / всего́ себе́ покори́в Бо́гу.

Кто изочте́т по́двиги твоя́, / я́же поне́сл еси́ ра́ди Ца́рствия Небе́снаго, / в пе́нии, бде́нии и поще́нии утвержда́я дух свой?

Слава: Восходи́л еси́ от си́лы в си́лу в доброде́лании за́поведей Христо́вых / и стяжа́л еси́ дар Ду́ха Свята́го, / Его́же де́йствием спасл еси́ мно́гия ду́ши христиа́нския.

И ныне,Богородичен: Богоро́дице Присноде́во Мари́е, / простри́ ми ми́лостивне десни́цу на по́мощь, / умоля́ющи Сы́на Твоего́ и Бо́га, / я́ко уя́звен есмь лю́те / и на Тя то́чию наде́жду мою́ положи́х, / Ты мя уще́дри.

Катавасия: Отве́рзу уста́ моя́, / и напо́лнятся Ду́ха, / и сло́во отры́гну Цари́це Ма́тери, / и явлю́ся, све́тло торжеству́я, / и воспою́, ра́дуяся, Тоя́ чудеса́.

Песнь 3

Ирмос: Утвержде́й в нача́ле небеса́ ра́зумом / и зе́млю на вода́х основа́вый, / на ка́мени мя, Христе́, за́поведей Твои́х утверди́: / я́ко несть свят, па́че Тебе́, Еди́не Человеколю́бче.

Припев: Преподо́бне о́тче на́ш Амвро́сие, моли́ Бо́га о на́с.

Послуша́нием соверше́нным отве́рглся еси́ во́ли своея́ / и тем стра́сти существа́ па́дшаго Ада́ма отри́нул еси́, / всего́ себе́ преда́в води́тельству богому́дрых ста́рцев и отце́в пу́стыни, / и́же и возрасти́ша тя в ме́ру во́зраста духо́внаго.

Целому́дрия красоту́ стяжа́ла есть твоя́ чи́стая душа́, / си́лою покая́ния совле́кшися ве́тхаго челове́ка / и в духо́внем преуспе́янии обле́кшися во Христа́.

Бо́га́тства тле́ннаго мíра возненави́дел еси́ / и был еси́ я́ко стра́нник и пришле́ц на земли́, / взыску́я Гра́да Небе́снаго, / те́мже Домовлады́ка введе́ тя в черто́г сла́вы Своея́.

Слава: Христо́с Бог обогати́ тя да́ром чуде́с, / и мно́гия боле́зни стра́ждущих исцели́л еси́, / не оста́ви нас, ча́ющих от тебе́ благода́тныя по́мощи.

И ныне,Богородичен: Наде́ждо и упова́ние на́ше, / Влады́чице мíра, блага́я Помо́щнице, / спаси́, и в кре́пости рог вознеси́ правосла́вных, / и лю́ди на́ша от вся́ких бед и от разли́чных обстоя́ний свободи́.

Катавасия: Твоя́ песносло́вцы, Богоро́дице, / живы́й и незави́стный Исто́чниче, / лик себе́ совоку́пльшия, духо́вно утверди́, / в Боже́ственней Твое́й сла́ве / венце́в сла́вы сподо́би.

Седален, глас 4:

Лик мона́хов ны́не славосло́вит тя, / преподо́бне о́тче наш Амвро́сие, / ублажа́я честну́ю па́мять твою́, / и вся оби́тель в ра́дости торжеству́ет, / почита́ющи твое́ чи́стое в доброде́телех житие́ / и мно́жество чудотворе́ний, тобо́ю преизлива́емых. / Те́мже мы вси вку́пе вопие́м: / спаса́й нас моли́твами твои́ми, Амвро́сие, о́тче наш. Дважды.

Слава, и ныне,Богородичен: Под Твое́ благоутро́бие притека́юще, / мо́лим, Богоро́дице Де́во, / не пре́зри пла́ча на́шего и моли́твы, / но ускори́ изба́вити от бед и скорбе́й лю́ди безотве́тныя: / Ты бо еди́на еси́ изве́стнейшее христиа́ном упова́ние, / и к Тебе́ прибега́юще, вси спаса́емся.

Песнь 4

Ирмос: Ты моя́ кре́пость, Го́споди, / Ты моя́ и си́ла, / Ты мой Бог, Ты мое́ ра́дование, / не оста́вль не́дра О́тча / и на́шу нищету́ посети́в. / Тем с проро́ком Авваку́мом зову́ Ти: / си́ле Твое́й сла́ва, Человеколю́бче.

Припев: Преподо́бне о́тче на́ш Амвро́сие, моли́ Бо́га о на́с.

Избра́нный сосу́д Ду́ха Свята́го был еси́ / и то́ки чуде́с изли́л еси́. / Приими́ на́ша моли́твы / и исцели́ нас от ран грехо́вных и страсте́й.

Позна́вый си́лу моли́твы во спасе́ние души́, / научи́ нас душеполе́зно моли́тися / ко Изба́вителю всех ми́лостивому Иису́су.

Ве́ру и́стинную правосла́вную утверди́ в лю́дех твои́х, / чту́щих тя я́ко ревни́теля уче́ния Христо́ва.

Слава: Что воздади́м ти, преблаже́нне о́тче наш, / за вся, я́же возда́л еси́ нам, ча́дом твои́м, / чту́щим твою́ честну́ю па́мять?

И ныне,Богородичен: Из твоего́ пречи́стаго чре́ва, Богороди́тельнице, / Сло́во Бо́жие произы́де несказа́нно, / Его́же объе́мши, от зол изба́вити умоли́ зову́щих: / сла́ва си́ле Твое́й, Го́споди.

Катавасия: Седя́й в Сла́ве / на Престо́ле Божества́ / во о́блаце ле́гце, / прии́де Иису́с Пребоже́ственный, / Нетле́нною Дла́нию / и спасе́ зову́щия: / сла́ва, Христе́, си́ле Твое́й.

Песнь 5

Ирмос: Вску́ю мя отри́нул еси́ / от лица́ Твоего́, Све́те незаходи́мый? / И покры́ла мя есть чужда́я тьма, окая́ннаго. / Но обрати́ мя и к све́ту за́поведей Твои́х / пути́ моя́ напра́ви, молю́ся.

Припев: Преподо́бне о́тче на́ш Амвро́сие, моли́ Бо́га о на́с.