Новый Завет (на цсл., гражданский шрифт, с ударениями)

²³ Всяк отмета́яйся Сы́на, ни Отца́ и́мать, а испове́даяй Сы́на, и Отца́ и́мать.

²⁴ Вы у́бо е́же слы́шасте испе́рва, в вас да пребыва́ет, и а́ще в вас пребу́дет, е́же испе́рва слы́шасте, и вы в Сы́не и Отце́ пребу́дете.

²⁵ И сие́ есть обетова́ние, е́же Сам обеща́ нам, живо́т ве́чный.

²⁶ Сия́ писа́х вам о льстя́щих вас.

²⁷ И вы е́же пома́зание е́же прия́сте от Него́, в вас пребыва́ет, и не тре́буете, да кто учи́т вы, но я́ко то са́мо пома́зание учи́т вы о всем, и и́стинно есть, и несть ло́жно, и я́коже научи́ вас, пребыва́йте в нем.

²⁸ И ны́не ча́дца, пребыва́йте в Нем, да егда́ яви́тся, и́мамы дерзнове́ние и не посрами́мся от Него́ в прише́ствии Его́.

²⁹ А́ще ве́сте, я́ко пра́ведник есть, разуме́йте, я́ко всяк творя́й пра́вду от Него́ роди́ся.

Глава 3

¹ Ви́дите, какову́ любо́вь дал есть Оте́ц нам, да ча́да Бо́жия нарече́мся, и есмы́. Сего́ ра́ди міръ не зна́ет нас, зане́ не позна́ Его́.

² Возлю́бленнии, ны́не ча́да Бо́жия есмы́, и не у́ яви́ся, что́ бу́дем: ве́мы же, я́ко егда́ яви́тся, подо́бни Ему́ бу́дем, и у́зрим Его́, я́коже есть.

³ И всяк име́яй наде́жду сию́ Нань, очища́ет себе́, я́коже Он чист есть.

⁴ Всяк творя́й грех, и беззако́ние твори́т, и грех есть беззако́ние.

⁵ И ве́сте, я́ко Он яви́ся, да грехи́ на́ша во́змет, и греха́ в Нем несть.

⁶ Всяк, и́же в Нем пребыва́яй, не согреша́ет, всяк согреша́яй не ви́де Его́, ни позна́ Его́.

⁷ Ча́дца, никто́же да льстит вас. Творя́й пра́вду пра́ведник есть, я́коже Он пра́веден есть.

⁸ Творя́й грех от диа́вола есть, я́ко испе́рва диа́вол согреша́ет. Сего́ ра́ди яви́ся Сын Бо́жий да разруши́т дела́ диа́воля.

⁹ Всяк рожде́нный от Бо́га греха́ не твори́т, я́ко се́мя Его́ в нем пребыва́ет, и не мо́жет согреша́ти, я́ко от Бо́га рожде́н есть.

¹⁰ Сего́ ра́ди явле́на суть ча́да Бо́жия и ча́да диа́воля: всяк не творя́й пра́вды несть от Бо́га, и не любя́й бра́та своего́.

¹¹ Я́ко се есть завеща́ние, е́же слы́шасте испе́рва, да лю́бим друг дру́га,

¹² Не я́коже Ка́ин от лука́ваго бе и закла́ бра́та своего́. За ку́ю вину́ закла́ его́? Я́ко дела́ его́ лука́ва бе́ша, а бра́та его́ пра́ведна.

¹³ Не чуди́теся, бра́тие моя́, а́ще ненави́дит вас міръ.

¹⁴ Мы ве́мы, я́ко преидо́хом от сме́рти в живо́т, я́ко лю́бим бра́тию, не любя́й бо бра́та пребыва́ет в сме́рти.

¹⁵ Всяк ненави́дяй бра́та своего́ человекоуби́йца есть, и ве́сте, я́ко всяк человекоуби́йца не и́мать живота́ ве́чнаго в себе́ пребыва́юща.

¹⁶ О сем позна́хом любо́вь, я́ко Он по нас ду́шу Свою́ положи́, и мы до́лжни есмы́ по бра́тии ду́ши полага́ти.

¹⁷ И́же у́бо и́мать бога́тство міра сего́, и ви́дит бра́та своего́ тре́бующа, и затвори́т утро́бу свою́ от него́, ка́ко любы́ Бо́жия пребыва́ет в нем?

¹⁸ Ча́дца моя́, не лю́бим сло́вом ниже́ язы́ком, но де́лом и и́стиною.

¹⁹ И о сем разуме́ем, я́ко от и́стины есмы́, и пред Ним смиря́ем сердца́ на́ша,

²⁰ Зане́ а́ще зазира́ет нам се́рдце на́ше, я́ко бо́лий есть Бог се́рдца на́шего и весть вся.

²¹ Возлю́бленнии, а́ще се́рдце на́ше не за́зрит нам, дерзнове́ние и́мамы к Бо́гу.

²² И его́же а́ще про́сим, прие́млем от Него́, я́ко за́поведи Его́ соблюда́ем, и уго́дная пред Ним твори́м.

²³ И сия́ есть за́поведь Его́, да ве́руем во И́мя Сы́на Его́ Иису́са Христа́ и лю́бим друг дру́га, я́коже дал есть за́поведь нам.

²⁴ И соблюда́яй за́поведи Его́, в Нем пребыва́ет, и Той в нем, и о сем разуме́ем, я́ко пребыва́ет в нас, от Ду́ха, Его́же дал есть нам.

Глава 4

¹ Возлю́бленнии, не вся́кому ду́ху ве́руйте, но искуша́йте ду́хи, а́ще от Бо́га суть, я́ко мно́зи лжепроро́цы изыдо́ша в міръ.

² О сем познава́йте Ду́ха Бо́жия и ду́ха ле́стча: всяк дух, и́же испове́дует Иису́са Христа́ во пло́ти прише́дша, от Бо́га есть.

³ И всяк дух, и́же не испове́дует Иису́са Христа́ во пло́ти прише́дша, от Бо́га несть, и сей есть анти́христов, его́же слы́шасте, я́ко гряде́т, и ны́не в міре есть уже́.

⁴ Вы от Бо́га есте́, ча́дца, и победи́сте тех, я́ко бо́лий есть И́же в вас, не́жели и́же в міре.

⁵ Они́ от міра суть, сего́ ра́ди от міра глаго́лют, и міръ тех послу́шает.

⁶ Мы от Бо́га есмы́, и́же зна́ет Бо́га, послу́шает нас, и и́же несть от Бо́га, не послу́шает нас. О сем познава́ем Ду́ха И́стины и ду́ха ле́стча.

⁷ Возлю́бленнии, возлю́бим друг дру́га, я́ко любы́ от Бо́га е́сть, и всяк любя́й от Бо́га рожде́н есть, и зна́ет Бо́га.

⁸ А не любя́й не позна́ Бо́га, я́ко Бог любы́ есть.

⁹ О сем яви́ся любы́ Бо́жия в нас, я́ко Сы́на Своего́ Единоро́днаго посла́ Бог в міръ, да жи́ви бу́дем им.

¹⁰ О сем есть любы́, не я́ко мы возлюби́хом Бо́га, но я́ко Той возлюби́ нас, и посла́ Сы́на Своего́ очище́ние о гресе́х на́ших.

¹¹ Возлю́бленнии, а́ще си́це возлюби́л есть нас Бог, и мы до́лжни есмы́ друг дру́га люби́ти.

¹² Бо́га никто́же нигде́же ви́де. А́ще друг дру́га лю́бим, Бог в нас пребыва́ет, и любы́ Его́ соверше́нна есть в нас.

¹³ О сем разуме́ем, я́ко в Нем пребыва́ем и Той в нас, я́ко от Ду́ха Своего́ дал есть нам.

¹⁴ И мы ви́дехом и свиде́тельствуем, я́ко Оте́ц посла́ Сы́на Спаси́теля міру.

¹⁵ И́же а́ще испове́сть, я́ко Иису́с есть Сын Бо́жий, Бог в нем пребыва́ет, и той в Бо́зе.