Новый Завет (на цсл., гражданский шрифт, с ударениями)

¹⁶ Не ве́сте ли, я́ко ему́же представля́ете себе́ рабы́ в послуша́ние, раби́ есте́, его́же послу́шаете, или́ греха́ в смерть, или́ послуша́ния в пра́вду?

¹⁷ Благодари́м у́бо Бо́га, я́ко бе́сте раби́ греху́, послу́шасте же от се́рдца, во́ньже и преда́стеся о́браз уче́ния.

¹⁸ Свобо́ждшеся же от греха́, порабо́тистеся пра́вде.

¹⁹ Челове́ческо глаго́лю, за не́мощь пло́ти ва́шея. Я́коже у́бо предста́висте у́ды ва́ша рабы́ нечистоте́ и беззако́нию в беззако́ние, та́ко ны́не предста́вите у́ды ва́ша рабы́ пра́вде во святы́ню.

²⁰ Егда́ бо раби́ бе́сте греха́, свобо́дни бе́сте от пра́вды.

²¹ Кий у́бо тогда́ име́сте плод? О ни́хже ны́не стыдите́ся, кончи́на бо о́нех, смерть.

²² Ны́не же свобо́ждшеся от греха́, порабо́щшеся же Бо́гови, и́мате плод ваш во святы́ню, кончи́ну же жизнь ве́чную.

²³ Обро́цы бо греха́ смерть: дарова́ние же Бо́жие живо́т ве́чный о Христе́ Иису́се Го́споде на́шем.

Глава 7

¹ Или́ не разуме́ете, бра́тие, [ве́дущим зако́н глаго́лю,] я́ко зако́н облада́ет над челове́ком, во ели́ко вре́мя живе́т?

² И́бо мужа́тая жена́ жи́ву му́жу привя́зана есть зако́ном, а́ще ли же у́мрет муж ея́, разреши́тся от зако́на му́жескаго.

³ Те́мже у́бо, жи́ву су́щу му́жу, прелюбоде́йца быва́ет, а́ще бу́дет му́жеви ино́му, а́ще ли у́мрет муж ея́, свобо́дна есть от зако́на, не бы́ти ей прелюбоде́йце, бы́вшей му́жу ино́му.

⁴ Те́мже, бра́тие моя́, и вы умро́сте зако́ну те́лом Христо́вым, во е́же бы́ти вам ино́му, Воста́вшему из ме́ртвых, да плод принесе́м Бо́гови.

⁵ Егда́ бо бе́хом во пло́ти, стра́сти грехо́вныя, я́же зако́ном, де́йствоваху во у́дех на́ших, во е́же плод твори́ти сме́рти.

⁶ Ны́не же упраздни́хомся от зако́на, уме́рше, и́мже держи́ми бе́хом, я́ко рабо́тати нам [Бо́гови] во обновле́нии ду́ха, а не в ве́тхости пи́смене.

⁷ Что у́бо рече́м? Зако́н ли грех? Да не бу́дет. Но греха́ не знах, то́чию зако́ном, по́хоти же не ве́дах, а́ще не бы зако́н глаго́лаше: не похо́щеши.

⁸ Вину́ же прие́м грех за́поведию, соде́ла во мне вся́ку по́хоть, без зако́на бо грех мертв есть.

⁹ Аз же живя́х кроме́ зако́на иногда́, прише́дши же за́поведи, грех у́бо оживе́,

¹⁰ Аз же умро́х, и обре́теся ми за́поведь, я́же в живо́т, сия́ в смерть.

¹¹ Грех бо вину́ прие́м за́поведию, прельсти́ мя, и то́ю умертви́ мя.

¹² Те́мже у́бо зако́н свят, и за́поведь свята́ и пра́ведна и блага́.

¹³ Благо́е ли у́бо бысть мне смерть? Да не бу́дет, но грех, да яви́тся грех, благи́м ми содева́я смерть, да бу́дет по премно́гу гре́шен грех за́поведию.

¹⁴ Ве́мы бо, я́ко зако́н духо́вен есть, аз же пло́тян есмь, про́дан под грех.

¹⁵ Е́же бо содева́ю, не разуме́ю, не е́же бо хощу́, сие́ творю́, но е́же ненави́жду, то соде́ловаю.

¹⁶ А́ще ли, е́же не хощу́, сие́ творю́, хвалю́ зако́н я́ко добр.

¹⁷ Ны́не же не ктому́ аз сие́ содева́ю, но живы́й во мне грех.

¹⁸ Вем бо, я́ко не живе́т во мне, си́речь во пло́ти мое́й, до́брое: е́же бо хоте́ти прилежи́т ми, а е́же соде́яти до́брое, не обрета́ю.

¹⁹ Не е́же бо хощу́ до́брое, творю́, но е́же не хощу́ зло́е, сие́ содева́ю.

²⁰ А́ще ли, е́же не хощу́ аз, сие́ творю́, уже́ не аз сие́ творю́, но живы́й во мне грех.

²¹ Обрета́ю у́бо зако́н, хотя́щу ми твори́ти до́брое, я́ко мне зло́е прилежи́т.

²² Соуслажда́юся бо зако́ну Бо́жию по вну́треннему челове́ку.

²³ Ви́жду же ин зако́н во у́дех мои́х, проти́ву вою́ющь зако́ну ума́ моего́ и пленя́ющь мя зако́ном грехо́вным, су́щим во у́дех мои́х.

²⁴ Окая́нен аз челове́к, кто мя изба́вит от те́ла сме́рти сея́?

²⁵ Благодарю́ Бо́га моего́ Иису́с Христо́м Го́сподем на́шим. Те́мже у́бо сам аз умо́м мои́м рабо́таю зако́ну Бо́жию, пло́тию же зако́ну грехо́вному.

Глава 8

¹ Ни еди́но у́бо ны́не осужде́ние су́щим о Христе́ Иису́се не по пло́ти ходя́щим, но по ду́ху.

² Зако́н бо ду́ха жи́зни о Христе́ Иису́се свободи́л мя есть от зако́на грехо́внаго и сме́рти.

³ Немощно́е бо зако́на, в не́мже немоществова́ше пло́тию, Бог Сы́на Своего́ посла́ в подо́бии пло́ти греха́, и о гресе́ осуди́ грех во пло́ти,

⁴ Да оправда́ние зако́на испо́лнится в нас, не по пло́ти ходя́щих, но по ду́ху.

⁵ Су́щии бо по пло́ти, плотска́я му́дрствуют. А и́же по ду́ху, духо́вная.

⁶ Мудрова́ние бо плотско́е смерть есть, а мудрова́ние духо́вное живо́т и мир.

⁷ Зане́ мудрова́ние плотско́е вражда́ на Бо́га, зако́ну бо Бо́жию не покаря́ется, ниже́ бо мо́жет.

⁸ Су́щии же во пло́ти, Бо́гу угоди́ти не мо́гут.

⁹ Вы же не́сте во пло́ти, но в ду́се, поне́же Дух Бо́жий живе́т в вас. А́ще же кто Ду́ха Христо́ва не и́мать, сей несть Его́в.

¹⁰ А́ще ли Христо́с в вас, плоть у́бо мертва́ греха́ ра́ди, дух же живе́т пра́вды ра́ди.

¹¹ А́ще ли же Дух Воскреси́вшаго Иису́са от ме́ртвых живе́т в вас, Воздви́гий Христа́ из ме́ртвых оживотвори́т и ме́ртвенная телеса́ ва́ша, живу́щим Ду́хом Его́ в вас.

¹² Те́мже у́бо, бра́тие, до́лжни есмы́ не пло́ти, е́же по пло́ти жи́ти.

¹³ А́ще бо по пло́ти живете́, и́мате умре́ти, а́ще ли ду́хом дея́ния плотска́я умерщвля́ете, жи́ви бу́дете.

¹⁴ Ели́цы бо Ду́хом Бо́жиим во́дятся, си́и суть сы́нове Бо́жии.

¹⁵ Не прия́сте бо ду́ха рабо́ты па́ки в боя́знь, но прия́сте Ду́ха сыноположе́ния, о Не́мже вопие́м: А́вва О́тче.