Новый Завет (на цсл., гражданский шрифт, с ударениями)

¹³ Еда́ раздели́ся Христо́с, еда́ Па́вел распя́тся по вас? Или́ во и́мя Па́влово крести́стеся?

¹⁴ Благодарю́ Бо́га, я́ко ни еди́наго от вас крести́х, то́чию Кри́спа и Га́иа,

¹⁵ Да никто́же рече́т, я́ко в мое́ и́мя крести́х.

¹⁶ Крести́х же и Стефани́нов дом, про́чее не вем, а́ще кого́ ина́го крести́х.

¹⁷ Не посла́ бо мене́ Христо́с крести́ти, но благовести́ти, не в прему́дрости сло́ва, да не испраздни́тся крест Христо́в.

¹⁸ Сло́во бо кре́стное погиба́ющим у́бо юро́дство есть, а спаса́емым нам си́ла Бо́жия есть.

¹⁹ Пи́сано бо есть: погублю́ прему́дрость прему́дрых, и ра́зум разу́мных отве́ргу.

²⁰ Где прему́др? Где кни́жник? Где совопро́сник ве́ка сего́? Не обуи́ ли Бог прему́дрость міра сего́?

²¹ Поне́же бо в прему́дрости Бо́жией не разуме́ міръ прему́дростию Бо́га, благоизво́лил Бог бу́йством про́поведи спасти́ ве́рующих.

²² Поне́же и иуде́е зна́мения про́сят, и е́ллини прему́дрости и́щут:

²³ Мы же пропове́дуем Христа́ ра́спята, иуде́ем у́бо собла́зн, е́ллином же безу́мие.

²⁴ Саме́м же зва́нным, иуде́ем же и е́ллином, Христа́, Бо́жию си́лу и Бо́жию прему́дрость.

²⁵ Зане́ бу́ее Бо́жие, прему́дрее челове́к есть, и немощно́е Бо́жие крепча́е челове́к есть.

²⁶ Ви́дите бо зва́ние ва́ше, бра́тие, я́ко не мно́зи ли прему́дри по пло́ти, не мно́зи ли си́льни, не мно́зи ли благородни?

²⁷ Но бу́яя міра избра́ Бог, да прему́дрыя посрами́т, и не́мощная міра избра́ Бог, да посрами́т кре́пкая.

²⁸ И худоро́дная міра, и уничиже́нная избра́ Бог, и не су́щая, да су́щая упраздни́т,

²⁹ Я́ко да не похва́лится вся́ка плоть пред Бо́гом.

³⁰ Из него́же вы есте́ о Христе́ Иису́се и́же бысть нам прему́дрость от Бо́га, пра́вда же и освяще́ние, и избавле́ние.

³¹ Да, я́коже пи́шется, хваля́йся, о Го́споде да хва́лится.

Глава 2

¹ И аз прише́д к вам, бра́тие, приидо́х не по превосхо́дному словеси́, или́ прему́дрости, возвеща́я вам свиде́тельство Бо́жие.

² Не суди́х бо ве́дети что в вас, то́чию Иису́са Христа́, и Сего́ ра́спята.

³ И аз в не́мощи и стра́се и тре́пете мно́зе бых в вас.

⁴ И сло́во мое́ и про́поведь моя́ не в препре́тельных челове́ческия прему́дрости словесе́х, но в явле́нии ду́ха и си́лы,

⁵ Да ве́ра ва́ша не в му́дрости челове́честей, но в си́ле Бо́жией бу́дет.

⁶ Прему́дрость же глаго́лем в соверше́нных, прему́дрость же не ве́ка сего́, ни князе́й ве́ка сего́ престаю́щих,

⁷ Но глаго́лем прему́дрость Бо́жию, в та́йне сокрове́нную, и́же предуста́ви Бог пре́жде век в сла́ву на́шу,

⁸ Ю́же никто́же от князе́й ве́ка сего́ разуме́. А́ще бо бы́ша разуме́ли, не бы́ша Го́спода сла́вы ра́спяли.

⁹ Но я́коже есть пи́сано: и́хже о́ко не ви́де, и у́хо не слы́ша, и на се́рдце челове́ку не взыдо́ша, я́же угото́ва Бог лю́бящим Его́.

¹⁰ Нам же Бог откры́л есть Ду́хом Свои́м: Дух бо вся испыту́ет, и глубины́ Бо́жия.

¹¹ Кто́ бо весть от челове́к, я́же в челове́це, то́чию дух челове́ка, живу́щий в нем? Та́кожде и Бо́жия никто́же весть, то́чию Дух Бо́жий.

¹² Мы же не дух міра сего́ прия́хом, но Дух и́же от Бо́га, да ве́мы я́же от Бо́га дарова́нная нам.

¹³ Я́же и глаго́лем не в науче́ных челове́ческия прему́дрости словесе́х, но в науче́ных Ду́ха Свята́го, духо́вная духо́вными сразсужда́юще.

¹⁴ Душе́вен же челове́к не прие́млет я́же Ду́ха Бо́жия: юро́дство бо ему́ есть, и не мо́жет разуме́ти, зане́ духо́вне востязу́ется.

¹⁵ Духо́вный же востязу́ет у́бо вся, а сам той ни от еди́наго востязу́ется.

¹⁶ Кто бо разуме́ ум Госпо́день, и́же изъясни́т и? Мы же ум Христо́в и́мамы.

Глава 3

¹ И аз, бра́тие, не мого́х вам глаго́лати я́ко духо́вным, но я́ко пло́тяным, я́ко младе́нцем о Христе́.

² Млеко́м вы напои́х, а не бра́шном, не у́бо можа́сте, но ни еще́ мо́жете ны́не,

³ Еще́ бо пло́тстии есте́. Иде́же бо в вас за́висти, и рве́ния, и ра́спри, не пло́тстии ли есте́ и по челове́ку хо́дите?

⁴ Егда́ бо глаго́лет кто: аз у́бо есмь Па́влов, други́й же: аз Аполло́сов, не пло́тстии ли есте́?

⁵ Кто у́бо есть Па́вел? Кто же ли Аполло́с? Но то́чию служи́теле, и́миже ве́ровасте, и кому́ждо я́коже Госпо́дь даде́.

⁶ Аз насади́х, Аполло́с напои́, Бог же возрасти́.

⁷ Те́мже ни насажда́яй есть что, ни напая́яй, но возраща́яй Бог.

⁸ Насажда́яй же и напая́яй еди́но еста́, ки́йждо же свою́ мзду прии́мет по своему́ труду́.

⁹ Бо́гу бо есмы́ споспе́шницы: Бо́жие тяжа́ние, Бо́жие зда́ние есте́.

¹⁰ По благода́ти Бо́жией да́нней мне, я́ко прему́др архите́ктон основа́ние положи́х, ин же назида́ет, ки́йждо же да блюде́т, ка́ко назида́ет.

¹¹ Основа́ния бо ина́го никто́же мо́жет положи́ти па́че лежа́щаго, е́же есть Иису́с Христо́с.

¹² А́ще ли кто назида́ет на основа́нии сем зла́то, сребро́, ка́мение честно́е, дрова́, се́но, тро́стие,

¹³ Кого́ждо де́ло явле́но бу́дет, день бо яви́т, зане́ огне́м открыва́ется, и кого́ждо де́ло, яково́же есть, огнь иску́сит.

¹⁴ И его́же а́ще де́ло пребу́дет, его́же назда́, мзду прии́мет.

¹⁵ А его́же де́ло сгори́т, отщети́тся: сам же спасе́тся, та́кожде я́коже огне́м.

¹⁶ Не ве́сте ли, я́ко храм Бо́жий есте́, и Дух Бо́жий живе́т в вас?

¹⁷ А́ще кто Бо́жий храм растли́т, растли́т сего́ Бог, храм бо Бо́жий свят есть, и́же есте́ вы.