Новый Завет (на цсл., гражданский шрифт, с ударениями)

¹⁷ О́ви же от любве́, ве́дяще, я́ко во отве́те благовествова́ния лежу́. [243]

¹⁸ Что у́бо? Оба́че вся́цем о́бразом, а́ще вино́ю, [244] а́ще и́стиною Христо́с пропове́даемь есть, и о сем ра́дуюся, но и возра́дуюся.

¹⁹ Вем бо, я́ко сие́ сбу́дется ми во спасе́ние ва́шею моли́твою и подая́нием Ду́ха Иису́с Христо́ва,

²⁰ По ча́янию и упова́нию моему́, я́ко ни о еди́ном же постыжу́ся, но во вся́ком дерзнове́нии, я́коже всегда́, и ны́не возвели́чится Христо́с в те́ле мое́м, а́ще живото́м, а́ще ли сме́ртию.

²¹ Мне бо е́же жи́ти, Христо́с, и е́же умре́ти, приобре́тение есть.

²² А́ще ли е́же жи́ти ми те́лом, сие́ мне плод дела́, и что изво́лю, не вем.

²³ Обдержи́мь же есмь от обою́, жела́ние имы́й разреши́тися и со Христо́м бы́ти, мно́го па́че лу́чше,

²⁴ А е́же пребыва́ти во пло́ти, ну́жднейше есть вас ра́ди.

²⁵ И сие́ изве́стне вем, я́ко бу́ду и спребу́ду вам всем в ваш успе́х и ра́дость ве́ры.

²⁶ Я́ко да похвала́ ва́ша избы́точествует о Христе́ Иису́се во мне, мои́м прише́ствием па́ки к вам.

²⁷ То́чию досто́йне благовествова́нию Христо́ву жи́тельствуйте, да а́ще прише́д и ви́дев вас, а́ще и не сый у вас, услы́шу я́же о вас, я́ко и́стиною стоите́ во еди́ном ду́се и единоду́шне сподвиза́ющеся по ве́ре Благовествова́ния во́лею,

²⁸ И не коле́блющеся ни о еди́ном же от сопроти́вных, е́же тем у́бо есть явле́ние поги́бели, вам же спасе́ния, и сие́ от Бо́га.

²⁹ Я́ко вам дарова́ся, е́же о Христе́, не то́кмо е́же в Него́ ве́ровати, но и е́же по Нем страда́ти,

³⁰ То́йже по́двиг иму́ще, яко́в же во мне ви́десте и ны́не слы́шите о мне.

Глава 2

¹ А́ще у́бо ко́е утеше́ние о Христе́, или́ а́ще ка́я уте́ха любве́, а́ще ко́е обще́ние ду́ха, а́ще ко́е милосе́рдие и щедро́ты,

² Испо́лните мою́ ра́дость, да то́жде му́дрствуете, ту́же любо́вь иму́ще, единоду́шни, единому́дренни,

³ Ничто́же по рве́нию или́ тщесла́вию, но смиреному́дрием друг дру́га че́стию бо́льша себе́ творя́ще.

⁴ Не свои́х си ки́йждо, но и дру́жних ки́йждо смотря́йте.

⁵ Сие́ бо да му́дрствуется в вас, е́же и во Христе́ Иису́се,

⁶ И́же во о́бразе Бо́жии сый, не восхище́нием непщева́ бы́ти ра́вен Бо́гу.

⁷ Но Себе́ ума́лил, [245] зрак раба́ прии́м, в подо́бии челове́честем быв, и о́бразом обре́теся я́коже челове́к.

⁸ Смири́л Себе́, послушли́в быв да́же до сме́рти, сме́рти же кре́стныя.

⁹ Те́мже и Бог Его́ превознесе́ и дарова́ Ему́ и́мя, е́же па́че вся́каго и́мене,

¹⁰ Да о и́мени Иису́сове вся́ко коле́но поклони́тся небе́сных и земны́х и преиспо́дних,

¹¹ И всяк язы́к испове́сть, я́ко Госпо́дь Иису́с Христо́с в сла́ву Бо́га Отца́.

¹² Те́мже, возлю́бленнии мои́, я́коже всегда́ послу́шасте мене́, не я́коже в прише́ствии мое́м то́чию, но ны́не мно́го па́че во отше́ствии мое́м, со стра́хом и тре́петом свое́ спасе́ние содева́йте.

¹³ Бог бо есть де́йствуяй в вас и е́же хоте́ти и е́же де́яти о благоволе́нии.

¹⁴ Вся твори́те без ропта́ния и размышле́ния,

¹⁵ Да бу́дете непоро́чни и це́ли, ча́да Бо́жия непоро́чна посреде́ ро́да стропти́ва и развраще́на, в ни́хже явля́етеся я́коже свети́ла в міре,

¹⁶ Сло́во живо́тно предержа́ще, в похвалу́ мне в день Христо́в. Я́ко не вотще́ теко́х, ни вотще́ труди́хся.

¹⁷ Но а́ще и жрен быва́ю о же́ртве и слу́жбе ве́ры ва́шея, ра́дуюся и сра́дуюся всем вам.

¹⁸ Та́кожде и вы ра́дуйтеся и сра́дуйте ми ся.

¹⁹ Упова́ю же о Го́споде Иису́се Тимофе́а вско́ре посла́ти к вам, да и аз благоду́шствую, уве́дев я́же о вас.

²⁰ Ни еди́наго бо и́мам равноду́шна, и́же при́снее о вас попече́тся,

²¹ Вси бо свои́х си и́щут, а не я́же Христа́ Иису́са.

²² Иску́сство же его́ зна́ете, зане́ я́коже отцу́ ча́до, со мно́ю порабо́тал в благове́стии.

²³ Сего́ же у́бо упова́ю посла́ти а́бие, по внегда́ уве́м я́же о мне.

²⁴ Наде́юся же о Го́споде, я́ко и сам ско́ро прииду́ к вам.

²⁵ Потре́бнее же возмне́х Епафроди́та бра́та и споспе́шника и сво́инника моего́, ва́шего же посла́нника и служи́теля потре́бе мое́й, посла́ти к вам.

²⁶ Поне́же жела́нием жела́ше ви́дети всех вас, и тужа́ше, зане́ слы́шасте, я́ко боле́.

²⁷ И́бо боле́ близ сме́рти, но Бог поми́лова его́, не его́ же то́кмо, но и мене́, да не скорбь на скорбь прииму́.

²⁸ Скоре́е у́бо посла́х его́, да ви́девше его́ па́ки, возра́дуетеся, и аз безпеча́лен пребу́ду.

²⁹ Приими́те у́бо его́ о Го́споде со вся́кою ра́достию, и таковы́я че́стны име́йте,

³⁰ Зане́ за де́ло Христо́во да́же до сме́рти прибли́жися, пону́див себе́ вседу́шно, [246] да испо́лнит ва́ше лише́ние, е́же к мое́й слу́жбе.

Глава 3

¹ Про́чее же, бра́тие моя́, ра́дуйтеся о Го́споде. Та́яжде бо писа́ти вам, мне у́бо неле́ностно, вам же тве́рдо.

² Блюди́теся от псов, блюди́теся от злых де́лателей, блюди́теся от сече́ния неве́рных.

³ Мы бо есмы́ обре́зание, и́же ду́хом Бо́гу слу́жим и хва́лимся о Христе́ Иису́се, а не в пло́ти наде́емся.

⁴ И́бо и аз име́ю наде́яние во пло́ти. А́ще кто ин мнит наде́ятися во пло́ти, аз па́че.

⁵ Обре́зан осмодне́вно, от ро́да Изра́илева, коле́на Вениами́нова, евре́ин от евре́й, по зако́ну фарисе́й.

⁶ По ре́вности гони́х Це́рковь Бо́жию, по пра́вде зако́нней быв непоро́чен.