Новый Завет (на цсл., гражданский шрифт, с ударениями)

³⁹ Он же отвеща́в рече́ им: род лука́в и прелюбоде́й зна́мения и́щет, и зна́мение не да́стся ему́, то́кмо зна́мение Ио́ны проро́ка.

⁴⁰ Я́коже бо бе Ио́на во чре́ве ки́тове три дни и три но́щи, та́ко бу́дет и Сын Челове́ческий в се́рдцы земли́ три дни и три но́щи.

⁴¹ Му́жие Ниневи́тстии воста́нут на суд с ро́дом сим и осу́дят его́, я́ко пока́яшася про́поведию Ио́ниною, и се бо́ле Ио́ны зде.

⁴² Цари́ца ю́жская воста́нет на суд с ро́дом сим и осу́дит и я́ко прии́де от коне́ц земли́ слы́шати прему́дрость Соломо́нову, и се бо́ле Соломо́на зде.

⁴³ Егда́ же нечи́стый дух изы́дет от челове́ка, прехо́дит сквозе́ безво́дная ме́ста, ищя́ поко́я, и не обрета́ет.

⁴⁴ Тогда́ рече́т: возвращу́ся в дом мой, отню́дуже изыдо́х. И прише́д обря́щет пра́зден, помете́н и укра́шен.

⁴⁵ Тогда́ и́дет и по́ймет с собо́ю седмь ины́х духо́в люте́йших себе́, и вше́дше живу́т ту, и бу́дут после́дняя челове́ку тому́ го́рша пе́рвых. Та́ко бу́дет и ро́ду сему́ лука́вому.

⁴⁶ Еще́ же Ему́ глаго́лющу к наро́дом, се Ма́ти Его́ и бра́тия Его́ стоя́ху вне, и́щуще глаго́лати Ему́.

⁴⁷ Рече́ же не́кий Ему́: се Ма́ти Твоя́ и бра́тия Твоя́ вне стоя́т, хотя́ще глаго́лати Тебе́.

⁴⁸ Он же отвеща́в рече́ ко глаго́лющему Ему́: кто есть Ма́ти Моя́, и кто суть бра́тия Моя́?

⁴⁹ И просте́р ру́ку Свою́ на ученики́ Своя́, рече́: се ма́ти Моя́ и бра́тия Моя́.

⁵⁰ И́же бо а́ще сотвори́т во́лю Отца́ Моего́, И́же есть на небесе́х, той брат Мой, и сестра́, и ма́ти Ми есть.

Глава 13

¹ В день же той изше́д Иису́с из до́му, седя́ше при мо́ри.

² И собра́шася к Нему́ наро́ди мно́зи, я́коже Ему́ в кора́бль вле́зти и се́сти, и весь наро́д на бре́зе стоя́ше.

³ И глаго́ла им при́тчами мно́го, глаго́ля: се изы́де се́яй, да се́ет.

⁴ И се́ющу ему́, о́ва падо́ша при пути́, и приидо́ша пти́цы и позоба́ша я́.

⁵ Друга́я же падо́ша на ка́менных, иде́же не име́яше земли́ мно́ги, и а́бие прозябо́ша, зане́ не име́яше глубины́ земли́.

⁶ Со́лнцу же возсия́вшу присвя́нуша, и зане́ не име́яху коре́ния, изсхо́ша.

⁷ Друга́я же падо́ша в те́рнии, и взы́де те́рние и подави́ их.

⁸ Друга́я же падо́ша на земли́ до́брей и дая́ху плод, о́во у́бо сто, о́во же шестьдеся́т, о́во же три́десять.

⁹ Име́яй у́ши слы́шати да слы́шит.

¹⁰ И приступи́вше ученицы́ [Его́] реко́ша Ему́: почто́ при́тчами глаго́леши им?

¹¹ Он же отвеща́в рече́ им: я́ко вам дано́ есть разуме́ти та́йны Ца́рствия Небе́снаго, о́нем же не дано́ есть.

¹² И́же бо и́мать, да́стся ему́ и преизбу́дет ему́, а и́же не и́мать, и е́же и́мать, во́змется от него́.

¹³ Сего́ ра́ди в при́тчах глаго́лю им, я́ко ви́дяще не ви́дят, и слы́шаще не слы́шат, ни разуме́ют.

¹⁴ И сбыва́ется в них проро́чество Иса́иино, глаго́лющее: слу́хом услы́шите, и не и́мате разуме́ти, и зря́ще у́зрите, и не и́мате ви́дети.

¹⁵ Отолсте́ бо се́рдце люде́й сих, и уши́ма тя́жко слы́шаша, и о́чи свои́ смежи́ша, да не когда́ у́зрят очи́ма, и уши́ма услы́шат, и се́рдцем уразуме́ют, и обратя́тся, и изцелю́ их.

¹⁶ Ва́ша же блаже́нна очеса́, я́ко ви́дят, и у́ши ва́ши, я́ко слы́шат.

¹⁷ Ами́нь бо глаго́лю вам, я́ко мно́зи проро́цы и пра́ведницы вожделе́ша ви́дети, я́же ви́дите, и не ви́деша, и слы́шати, я́же слы́шите, и не слы́шаша.

¹⁸ Вы же услы́шите при́тчу се́ющаго.

¹⁹ Вся́кому слы́шащему сло́во Ца́рствия и не разумева́ющу, прихо́дит лука́вый и восхища́ет все́янное в се́рдце его́, сие́ есть, [и́же] при пути́ се́янное.

²⁰ А на ка́мени се́янное, сие́ есть слы́шай сло́во и а́бие с ра́достию прие́млет е́;

²¹ Не и́мать же ко́рене в себе́, но привре́менен есть, бы́вши же печа́ли или́ гоне́нию словесе́ ра́ди, а́бие соблажня́ется.

²² А се́янное в те́рнии, се есть слы́шай сло́во, и печа́ль ве́ка сего́ и лесть бога́тства подавля́ет сло́во, и без плода́ быва́ет.

²³ А се́янное на до́брей земли́, се есть слы́шай сло́во и разумева́я, и́же у́бо плод прино́сит и твори́т о́во сто, о́во же шестьдеся́т, о́во три́десять.

²⁴ И́ну при́тчу предложи́ им, глаго́ля: уподо́бися Ца́рствие Небе́сное челове́ку, се́явшу до́брое се́мя на селе́ [17] свое́м.

²⁵ Спя́щим же челове́ком, прии́де враг его́ и все́я пле́велы посреде́ пшени́цы и оты́де.

²⁶ Егда́ же прозябе́ трава́ и плод сотвори́, тогда́ яви́шася и пле́велие.

²⁷ Прише́дше же раби́ господи́на, ре́ша ему́: го́споди, не до́брое ли се́мя сеял еси́ на селе́ [твое́м]? Отку́ду у́бо и́мать пле́велы?

²⁸ Он же рече́ им: враг челове́к сие́ сотвори́. Раби́ же ре́ша ему́: хо́щеши ли у́бо, да ше́дше исплеве́м я́?

²⁹ Он же рече́ [им]: ни, да не когда́ восторга́юще пле́велы, восто́ргнете ку́пно с ни́ми [и] пшени́цу.

³⁰ Оста́вите расти́ обое́ ку́пно до жа́твы, и во вре́мя жа́твы реку́ жа́телем: собери́те пе́рвее пле́велы и свяжи́те их в снопы́, я́ко сожещи́ я́, а пшени́цу собери́те в жи́тницу мою́.

³¹ И́ну при́тчу предложи́ им, глаго́ля: подо́бно есть Ца́рствие Небе́сное зе́рну гору́шичну, е́же взем челове́к все́я на селе́ свое́м.

³² Е́же ма́лейше у́бо есть от всех се́мен, егда́ же возрасте́т, бо́лее [всех] зе́лий есть и быва́ет дре́во, я́ко приити́ пти́цам небе́сным и вита́ти на ве́твех его́.