Читаем Полный Тропарион. Том I полностью

Полный Тропарион. Том I

Пусты́нный жи́тель и в телеси́ а́нгел, и чудотво́рец показа́лся еси́, Богоно́се о́тче наш Кириа́че,/ посто́м, бде́нием, моли́твою небе́сная дарова́ния прии́м,/ исцеля́еши неду́жныя и ду́ши ве́рою притека́ющих к тебе́./ Сла́ва Да́вшему тебе́ кре́пость,/ сла́ва Венча́вшему тя,/ сла́ва Де́йствующему тобо́ю всем исцеле́ния.

Кондак, глас 8

Я́ко побо́рника кре́пкаго и засту́пника,/ чту́щи тя свяще́нная Ла́вра всегда́,/ пра́зднует ле́тне* па́мяти,/ но, я́ко име́я дерзнове́ние ко Го́споду,/ от враго́в находя́щих соблюди́ ны, да зове́м:/ ра́дуйся, о́тче треблаже́нне.

Ин кондак, глас тойже

Чистото́ю душе́вною боже́ственно вооружи́вся/ и непреста́нную моли́тву, я́ко копие́ вручи́в, кре́пко ссекл еси́ де́монская ополче́ния,/ Кириа́че о́тче наш, моли́ся непреста́нно о всех нас.

Величание

Ублажа́ем тя,/ преподо́бне о́тче Кириа́че,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

30/13 Священномученика Григория епископа, просветителя Великой Армении (ок. 335). Преподобного Григория Пелыпемского, Вологодского чудотворца (1442). Святителя Михаила, первого митрополита Киевского (992).

Тропарь священномученику Григорию епископу, просветителю Великой Армении, глас 4

И нра́вом прича́стник, И престо́лом наме́стник... (общий священномученику).

Кондак, глас 2

Благосла́внаго и священнонача́льника вси, я́ко страда́льца и́стины,/ днесь, ве́рнии, в пе́снех и песнопе́ниих восхва́лим,/ бо́драго па́стыря и учи́теля, Григо́рия,/ всеми́рнаго свети́льника и побо́рника:/ Христу́ бо мо́лится, е́же спасти́ся нам.

Величание

Велича́ем тя,/ священному́чениче Григо́рие,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь преподобному Григорию Пельшемскому, Вологодскому чудотворцу, глас 8

Любо́вию Христо́вою, Богому́дре, просвети́вся,/ доброде́тельми облиста́л еси́,/ и вся́кое наслажде́ние плотско́е возненави́дев,/ и в пусты́ню всели́вся, в не́йже вельми́ подвиза́лся еси́ в жи́зни сей вре́менней/ в пе́ниих и во бде́ниих, и в поще́ниих./ Сего́ ра́ди и Христо́с да́ром чуде́с обогати́ тя./ Но помина́й нас, чту́щих пресве́тлую па́мять твою́, преподо́бне о́тче Григо́рие,/ и моли́ Христа́ Бо́га спасти́ся душа́м на́шим.

Кондак, глас тойже

Христо́вою любо́вию уязви́вся, преподо́бне,/ и Тому́ невозвра́тным жела́нием после́довал еси́,/ вся́кое наслажде́ние плотско́е возненави́дев,/ и в пусты́ню всели́вся, в ней вельми́ подвиза́лся еси́./ Тем и Христо́с да́ром чуде́с обогати́ тя, помина́й нас, чту́щих пресве́тлую па́мять твою́, да зове́м ти:/ ра́дуйся, преподо́бне Григо́рие, о́тче наш.

Величание

Ублажа́ем тя,/ преподо́бне о́тче Григо́рие,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь святителю Михаилу, первому митрополиту Киевскому, глас 4

Днесь проро́чествие во апо́столех Первозва́ннаго испо́лнися,/ се бо на сих гора́х возсия́ благода́ть и ве́ра умно́жися:/ и, и́же неве́рием обветша́вший, Боже́ственною купе́лию отроди́шася,/ и бы́ша лю́дие обновле́ния, ца́рское свяще́ние, язы́к свят, Христо́во ста́до,/ Ему́же ты пе́рвый па́стырь яви́лся еси́, я́ко пе́рвее Креще́нием послужи́вый./ И ны́не, предстоя́ Влады́це Христу́ Бо́гу, моли́ всем сыно́м росси́йским спасти́ся,/ и́маши бо дерзнове́ние, я́ко иера́рх Бо́жий и священнослужи́тель.

Кондак, глас 2

Моисе́й вторы́й Росси́и яви́лся еси́, о́тче,/ пренесы́й мы́сленный виногра́д от еги́петскаго идолослуже́ния в зе́млю, проро́чествием предуви́денную./ Бу́дет, рече́, утвержде́ние ве́ры на земли́,/ и на версе́х гор Ки́евских превознесе́тся па́че Лива́на плод, пита́ющ ми́ра всего́,/ от него́же вкуси́вше, ублажа́ем тя, Михаи́ле, Бо́жий иера́рше.