Читаем Полный Тропарион. Том I полностью

Полный Тропарион. Том I

Преподо́бному во всех де́лех Го́сподеви преи́скренне рабо́тая,/ и О́наго всегда́ в це́ркви преподо́бных Свои́х/ преподо́бным воспева́я гла́сом,/ насле́дил еси́, преподо́бие Мерку́рие, часть преподо́бных,/ с ни́миже моли́ся о всех нас.

Величание

Ублажа́ем тя,/ преподо́бие о́тче Мерку́рие,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь блаженному Симону, Христа ради юродивому, Юрьевецкому, глас 8

Ако вои́стинну гла́са апо́стольскаго/ послу́шатель был еси́, блаже́нне Си́моне,/ Христа́ бо ра́ди изво́лив име́ти бу́йство,/ в не́мже соблю́л еси́ твоя́ к Бо́гу доброде́тели, посреде́ молв некра́домы,/ терпе́нием у́бо пачеесте́ственным Христа́ подража́в,/ посрами́л еси́ льсти́ваго всю горды́ню,/ тем и в лю́тых ра́нах, я́коже дре́вний Ла́зарь,/ в не́дра Авраа́мля пресели́лся еси́,/ иде́же и ны́не утеша́яся, посеща́й град твой,/ почита́ющий любо́вию святу́ю па́мять твою́.

Кондак, глас 4

Возгоре́вся раче́нием Го́рним,/ жестость* во́льнаго юро́дства па́че всех сла́дких ми́ра предпоче́л еси́,/ отону́дуже повину́ся ти о́гнь,/ от его́же запале́ния град твой Ю́рьевец изба́вил еси́,/ и во́ды немо́кренно, я́ко по су́ху, преше́л еси́,/ и хотя́щия быти предре́кл еси́,/ просла́вльшу тя та́ко Бо́гу,/ к Нему́же моля́ся и о нас, пою́щих тя,/ блаже́нне Си́моне, помина́й.

Величание

Ублажа́ем тя,/ святы́й пра́ведный Си́моне,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь священноиноку Григорию, глас 4

Боже́ственную ти ра́ку обстоя́ще, прему́дре,/ зове́м ти, преподо́бне:/ ко Влады́це всех и Зижди́телю моли́ся,/ изба́вити нас от бед,/ и́же ве́рою и любо́вию тебе́/ душа́ми и сердцы́ воспева́юще досто́йно:/ сла́ва ти, преподо́бне всеблаже́нне Григо́рие.

Кондак, глас 8

Го́рдаго врага́ ты низложи́л еси́/ посо́бием держа́вне Боже́ственнаго Ду́ха/ и побе́ду прие́м кре́пце,/ му́ченическим одея́вся неувяда́емым венце́м свы́ше, Богому́дре, всеблаже́нне,/сего́ же ра́ди зове́м ти:/ ра́дуйся, о́тче Григо́рие.

Величание

Ублажа́ем тя,/ преподо́бне о́тче Григо́рие,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

5/18 Мучеников Галактиона и Епистимии (III). Святителя Ионы, архиепископа Новгородского (1470).

Тропарь мученикам Галактиону и Епистимии, глас 4

Му́ченицы Твои́, Го́споди... (общий мученикам).

Кондак, глас 2

Му́ченик Христо́вых полко́м причто́стеся,/ до́бре хра́брствовавшим,/ све́тло подвиза́вшеся, Галактио́не сла́вне,/ с честно́ю супру́жницею и сострада́вшею тебе́ Еписти́миею,/ Еди́ному Бо́гу непреста́нно моли́теся о всех нас.

Величание

Велича́ем вас,/ страстоте́рпцы святи́и Галактио́не и Еписти́мие,/ и чтим честна́я страда́ния ва́ша,/ я́же за Христа́/ претерпе́ли есте́.

Тропарь святителю Ионе, архиепископу Новгородскому, глас 4

Исправле́ние* ве́ры, и о́браз кро́тости,/ и я́коже сад посреде́ рая́,/ преподо́бными де́лы твои́ми мир просвеща́еши./ И сего́ ра́ди к тебе́ любо́вию прибега́ем и ве́рно вопие́м:/ предста́ни в по́мощь воспева́ющим па́мять твою́ светоно́сную, о́тче Ио́но,/ и моли́ спасти́ся душа́м на́шим.

Кондак, глас тойже

Свы́ше прия́л еси́ Боже́ственную благода́ть,/ хода́тайствовати Бо́гу и челове́ком,/ я́ко архиере́й возноше́ние вознося́,/ и мир лю́дем твои́м снося́,/ и оби́лие плодо́в, Ио́но блаже́нне,/ ты бо еси́ Вели́каго Нова́града похвала́,/ и су́щих о нем ра́дость.

Величание

Велича́ем тя,/ святи́телю о́тче Ио́но,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

6/19 Святителя Павла, патриарха Константинопольского, исповедника (350). Преставление преподобного Варлаама Хутынского, Новгородского чудотворца (1192). Святителя Германа, архиепископа Казанского и Свияжского (1567). Преподобного Варлаама Керетского (XVI).

Тропарь святителю Павлу, патриарху Константинопольскому, исповеднику, глас 3

Боже́ственныя ве́ры испове́данием,/ друга́го Па́вла тя Це́рковь ревни́теля во свяще́нницех показа́,/ свозопие́т ти и Авель ко Го́споду,/ и Заха́риина кровь пра́ведная,/ о́тче преподо́бне, Христа́ Бо́га моли́/ дарова́тися нам ве́лией ми́лости.

Кондак, глас 2

Облиста́вый на земли́, я́ко звезда́ Небосве́тлая,/ Кафоли́ческую просвеща́еши Це́рковь ны́не,/ о не́йже страда́льчествовал еси́,/ ду́шу твою́, Па́вле, предложи́в:/ и я́коже Заха́риина и Авелева,/ я́сно вопие́т твоя́ кровь ко Го́споду.