Полный Тропарион. Том I

Влады́ка вчера́ нам пло́тию прихожда́ше,/ и раб днесь от пло́ти исхожда́ше;/ вчера́ Ца́рствуяй пло́тию роди́ся,/ днесь раб ка́мением побива́ется./ Того́ ра́ди и скончава́ется первому́ченик и боже́ственный Стефа́н.

Ин кондак, глас 6

Пе́рвый се́ялся еси́ на земли́ Небе́сным Де́лателем,/ всехва́льне Стефа́не,/ пе́рвый на земли́ за Христа́ кровь излия́л еси́, блаже́нне,/ пе́рвый от Него́ побе́ды венце́м увя́злся еси́ на небесе́х,/ страда́льцев нача́ло,/ вене́чниче му́чеников, первострада́льне.

Величание

Велича́ем тя,/ первому́чениче архидиа́коне Стефа́не,/ и чтим честна́я страда́ния твоя́,/ я́же за Христа́/ претерпе́л еси́.

Тропарь преподобному Феодору Начертанному, исповеднику, глас 8

Правосла́вия наста́вниче,/ благоче́стия учи́телю и чистоты́,/ вселе́нныя свети́льниче,/ мона́шествующих Богодохнове́нное удобре́ние,/ Фео́доре прему́дре,/ уче́ньми твои́ми вся просвети́л еси́, цевни́це духо́вная;/ моли́ Христа́ Бо́га спасти́ся душа́м на́шим.

Тропарь преподобному Ферапонту Можайскому, Белоезерскому, Лужецкому чудотворцу, глас 4

Житие́м чи́стым просвети́вся,/ в моли́твах и посте́х пусты́ни яви́лся еси́ до́брое прозябе́ние/ и, духо́вному твоему́ учи́телю после́дствуя,/ ум свой к Небе́сным упра́вль,/ ста́ду твоему́ наста́вник был еси́,/ тем тя мо́лим, о́тче Ферапо́нте,/ моли́ Христа́ Бо́га спасти́ся душа́м на́шим.

Кондак, глас тойже

Преблаги́й Спас наш Христо́с/ умно́жил есть ми́лость Свою́ к нам,/ дарова́в нам в засту́пника и цели́теля/ преподо́бного отца́ на́шего Ферапо́нта,/ и́же просвеща́ет нас о́бразом свята́го жития́ своего́/ и ны́не моли́твами свои́ми огражда́ет оби́тель свою́ от враго́в и от разруше́ния,/ страну́ сию́ от гла́да и напра́сныя сме́рти,/ чту́щих же па́мять его́ всех/ от боле́зней и от лю́тых страсте́й.

Ин кондак, глас тойже

Христо́вым жела́нием распали́вся,/ стра́сти плотски́я воздержа́нием оттря́с,/ по́стническое стяжа́в жи́тельство, преподо́бне ,/ сего́ ра́ди Госпо́дь труды́ твоя́ ви́дев,/ да́ром чуде́с обогати́ тя,/ источа́еши бо исцеле́ния и мо́лишися о нас к Бо́гу,/ мы же, ра́дующеся, вопие́м ти:/ ра́дуйся, Ферапо́нте, о́тче наш.

Величание

Ублажа́ем тя,/ преподо́бне о́тче Ферапо́нте,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

28/10 Мучеников 20 000, в Никомидии в церкви сожженных, и прочих, тамо же вне церкви пострадавших (302).

Тропарь мученикам, в Никомидии пострадавшим, глас 2

Страстоте́рпцы Госпо́дни,/ блаже́нна земля́, напи́вшаяся кровьми́ ва́шими,/ и свя́та селе́ния, прии́мшая телеса́ ва́ша:/ в по́двизе бо врага́ победи́сте/ и Христа́ со дерзнове́нием пропове́даете./ Того́, я́ко Бла́га, моли́те/ спасти́ся, мо́лимся, душа́м на́шим.

Кондак, глас тойже

Тве́рди душе́ю по ве́ре, святи́и,/ огне́м страда́ния прие́мше две тьмы33 страда́лец,/ вопию́ще Ро́ждшемуся от Де́вы:/ приими́ всесожже́ния на́ша за Тя,/ я́коже да́ры пе́рсских царе́й, зла́то и сми́рну, и Лива́н,/ Преве́чный Бо́же.

Величание

Велича́ем вас,/ страстоте́рпцы святи́и Никомиди́йстии,/ и чтим честна́я страда́ния ва́ша,/ я́же за Христа́/ претерпе́ли есте́.

29/11 Мучеников 14 000 младенцев, от Ирода в Вифлееме избиенных (I). Преподобного Маркелла, игумена обители «Неусыпающих» (485). Преподобных Марка гробокопателя, Феофила и Иоанна Печерских, в Ближних пещерах почивающих (XI-XII).

Тропарь мученикам младенцам, от Ирода в Вифлееме избиенных, глас 1

Боле́зньми святы́х, и́миже о Тебе́ пострада́ша,/ умоле́н бу́ди, Го́споди,/ и вся на́ша боле́зни исцели́,/ Человеколю́бче, мо́лимся.

Кондак, глас 4

Звезда́ волхвы́ посла́ к Ро́ждшемуся,/ и и́род непра́ведное во́инство посла́ лю́то,/ уби́ти мня во я́слех,/ я́ко Младе́нца лежа́ща.

Ин кондак, глас 6

В Вифлее́ме ро́ждшуся Царю́, волсви́ от Перси́ды с да́ры прихо́дят,/ звездо́ю свы́ше наставля́еми,/ но И́род смуща́ется и пожина́ет младе́нцы, я́ко пшени́цу,/ и рыда́ет себе́,/ я́ко держа́ва его́ вско́ре разори́тся.

Величание

Велича́ем вас,/ святи́и младе́нцы четырена́десяти тысящ, в Вифлее́ме Иуде́йстем Христа́ ра́ди от и́рода избие́ннии,/ и чтим честна́я страда́ния ва́ша,/ я́же за Христа́/ претерпе́ли есте́.

Тропарь преподобному Маркеллу, игумену обители «Неусыпающих», глас 8

В тебе́, о́тче, изве́стно спасе́ся... (общий преподобному).

Кондак, глас тойже

Я́ко звезда́, кра́сно сия́я,/ от Ефе́са провозсия́л еси́ нам, всеблаже́нне, пости́жно,/ и доброде́тельми возгреме́л еси́,/ наста́вник и́ноком мно́гим быв, преподо́бне ,/ того́ ра́ди и ца́рствующий град просвети́л еси́,/ и сего́ ра́ди вопие́м ти:/ ра́дуйся, о́тче всеблаже́нне Марке́лле.

Величание

Ублажа́ем тя,/ преподо́бне о́тче Марке́лле,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.