Помощь небесных покровителей. Полный сборник молитв на каждый день года (молитвы общие)

На всяк день и час, в сокрушеннем и смиреннем сердце моем припадая, исповедаюся Тебе, Вседержителю, Господи Иисусе Христе Боже наш, пришедый в мир взыскати заблуждшия и спасти погибшия, от нихже первый есмь аз, заблудих бо от пути праваго, ведущаго в жизнь, и уклонихся в дебрь любострастия, и углебох в тине беззаконий моих, тернием дел моих избодохся; видя же мя враг боляща грехми, еще лютейшими вреды хощет поразити окаянную мою душу. Но Тебе Единаго Избавителя молю, Тебе Всемилостиваго Человеколюбца на помощь призываю: не гнушайся мною грешным, Благоутробне Господи, и не отрини мя от Твоего лица, аще и вся злая пред Тобою сотворих, к Тебе бо прибегаю и вся моя исповедаю содеянныя грехи. Преступих вся заповеди Твоя, похотем безсловесным повинувся, работая плоти, душу оскверних. На Твоя же пребогатыя уповал щедроты, приношу Ти грешный сие моление мое: послушай мене, Господи, обещавыйся послушати верно призывающих Тя: посли ми ангела Твоего, да запретит всем духом злым борющимся со мною, да постыдятся и посрамятся ищущия душу мою, и да потребит от моего сердца всякое подвизание, от неприязненнаго похотения возстающее, да будет всегда со мною храняй мя, и на вся дела добрая наставляяй, и на всяк день недостойныя молитвы моя приносяй Тебе Богу и Творцу. Ты убо, Пресвятый Царю, от всея твари покланяемый, праведныя любяй, никогдаже отступающия от Тебе, и грешныя милуяй, обращающияся в покаянии к Тебе призывающему всех ко спасению, направи ноги моя к заповедем Твоим, пригвозди плоть мою страху Твоему, сердце очисти правоверием, уста исполни благодати, язык укроти смиренно глаголати, душу освяти Духом Святым, мысль исправи не прильпати земным, ум возвыси крилома благоразумия, и всего мя устрой недостойнаго, да явлюся пред Тобою достоин. И яко сподобил мя еси мимошедшия дни преити, тако и грядущия даруй ми, Человеколюбче, без преткновения, мирно и благоугодно преходити; да в жизни сей поминая и величая имя Твое пресвятое, и тем просвещаемь, без всякаго омрачения пребуду даже до дне и часа исхода моего, и егда разлучится душа моя от телесе, даждь ми, Создателю мой преблагий, обрести радость пред величеством славы Твоея в жизни вечней, молитвами рождшия Тя Пречистыя Владычицы нашея Богородицы и Приснодевы Марии, и всех святых, от века Тебе благоугодивших, яко благословен и преславлен еси во веки веков. Аминь.

Молитва ко Господу Богу из службы святым апостолам

Владыко Господи! Твой есть день и Твоя есть нощь, Тебе вся тварь работает, и всякое дыхание славит Тя, аз же окаянный, все житие мое скончав блудно, страхом одержим есмь, яко помянух дни первыя, и доныне, в няже вся безместная сотворих злая, и того ради не имам к Тебе дерзновения, яко беззакония моя велика, и безмерни греси мои, врази же всегда стужают ми. Но, Господи мой, Господи, отверзый, устне немому, и моя уста отверзи, да глаголю в молитве угодная Тебе; се бо душа моя яко земля безводная оста, и не может приносити о себе плода, но даждь ми от семене Святаго Твоего Духа, и напой мя росою благодати Твоея, да принесу Тебе плод покаяния. Господи Иисусе Христе, хотяй всем человеком спастися, услыши молитву мою, молитвами святых апостолов Твоих, яко тии молятся за ны, и аз теми у Тебе прошу прощения, яко тех молитвы присно послушаеши; молением их спасти мя грешнаго, исцели болезни сердца моего, уврачуй струпы души моея, разжзи утробы моя пламенем страха Твоего, да пояст терние грехов моих, и душу мою любовию прохлади, к Тебе бо желаю Истинному Свету и Подателю света, у Тебе единаго прошу милости, спаси мя, насыти алчущую и напой жаждущую душу мою от потока безчисленнаго милосердия Твоего, покрый мя благодатию Твоего человеколюбия от всякаго зла, да Тобою храним, избавлюся от многих сетей лукаваго, по вся дни на мя пропинаемых, и да не похвалятся врази мои о мне рабе Твоем, уповающем на Тя; спаси мя по милости Твоей, да воздам обеты моя, до последняго издыхания каяйся о своих согрешениих, и прославлю пресвятое имя Твое, со Отцем и Святым Духом, ныне и присно и во веки веков. Аминь.

Молитва преподобного Макария Великого к Богу Отцу

Боже вечный и Царю всякаго создания, сподобивый мя даже в час сей доспети, прости ми грехи, яже сотворих в сей день делом, словом и помышлением, и очисти, Господи, смиренную мою душу от всякия скверны плоти и духа. И даждь ми, Господи, в нощи сей сон прейти в мире, да востав от смиреннаго ми ложа, благоугожду пресвятому имени Твоему, во вся дни живота моего, и поперу борющия мя враги плотския и безплотныя. И избави мя, Господи, от помышлений суетных, оскверняющих мя, и похотей лукавых. Яко Твое есть Царство, и сила и слава, Отца и Сына и Святаго Духа, ныне и присно и во веки веков. Аминь.

Молитвы ко Господу Богу из акафиста Всемогущему Богу в нашествии печали

Молитва первая