Помощь небесных покровителей. Полный сборник молитв на каждый день года (молитвы общие)

Господи Иисусе Христе, Боже мой, покрый мя и раб Твоих (имена) от злобы супостата нашего, зане сила его крепка, естество же наше страстно и сила наша немощна. Ты убо, о Благий, сохрани мя от смущения помыслов и потопа страстей. Господи, Пресладкий мой Иисусе, помилуй и спаси мя и рабов Твоих (имена). Аминь.

Молитва третья

Господи Иисусе Христе, хотяй всем человеком спастися, услыши молитву мою, молитвами святых апостол Твоих, яко тии молятся за ны, молением их спаси мя, грешнаго, и рабов Божиих (имена), исцели болезни сердца моего, уврачуй струпы души моея, покрый мя и раб Твоих (имена) благодатию Твоего человеколюбия от всякаго зла, да Тобою храними, избавимся от многих сетей лукаваго. Спаси мя и раб Твоих (имена) по милости Твоей, да прославлю Пресвятое имя Твое со Отцем и Святым Духом, ныне и присно и во веки веков. Аминь.

Молитва четвертая

Владыко Господи! Простри руку Твою невидимую от святаго жилища Твоего и благослови вся ны и прости нам всякое согрешение вольное и невольное, словом или делом содеянное. Даруй нам, Господи, умиление и слезы сокрушения во очищение многих грехов наших, даруй нам, рабам Твоим (имена) велию милость Твою. Яко благословенно и препрославленно есть имя Твое, ныне и присно и во веки веков. Аминь.

Молитва пятая

О Господи Иисусе Христе! Не отврати лица Твоего от нас, рабов Твоих (имена) и уклонися гневом от рабов Твоих: помощник нам буди, не отрини нас и не остави нас. Аминь.

Молитва шестая

Господи Иисусе Христе, Спасителю наш! Пред иконою Твоею припадающе, всеусердно молим Тя: помилуй и спаси нас, недостойных раб Твоих (имена), от внезапныя смерти и от человеческаго оклеветания; и от всякаго зла защити и помилуй нас, Господи. Яко Ты еси Бог наш, да не погубиши нас во веки веков. Аминь.

Молитва седьмая

Многомилостивый и Прещедрый Господи, рекий: просите и приимите; и аз, надеяся тому словеси, понудихся проглаголати молитвы сии. Темже сице в которой молитве изгрубих или со другом глаголя праздными беседы, или в помыслех, прости ми, и всегда угодно буди Твоему человеколюбию и спаси мя, раба Твоего, по милости Твоей и даруй ми добродетели: смирение, любовь, кротость, и рассудительность, да выну хвалю Тя до издыхания моего ныне и присно и во веки веков. Аминь.

* * *

Покаянная молитва, читаемая в церквах России во дни смуты

Господи, Боже, Вседержителю, призри на нас грешных и недостойных чад Твоих, согрешивших пред Тобою, прогневавших благость Твою, навлекших гнев Твой праведный на ны, падших во глубину греховную. Ты зриши, Господи, немощь нашу и скорбь душевную, веси растление умов и сердец наших, оскудение веры, отступление от заповедей Твоих, умножение нестроений семейных, разъединения и раздоры церковныя, Ты зриши печали и скорби наша, от болезней, гладов, потопления, запаления и междоусобныя брани происходящая. Но, Премилостивый и Человеколюбивый Господи, вразуми, настави и помилуй нас, недостойных. Исправи жизнь нашу греховную, утоли раздоры и нестроения, собери расточенныя, соедини разсеянныя, подаждь мир стране нашей и благоденствие, избави ю от всяких бед и несчастий. Всесвятый Владыко, просвети разум наш светом учения Евангельскаго, возгрей сердца наша теплотою благодати Твоея и направи я к деланию заповедей Твоих, да прославится в нас всесвятое и преславное имя Твое, Отца и Сына и Святаго Духа, ныне и во веки веков. Аминь.

Молитва ко Господу Богу за русский народ

Всемогущий Боже, Ты – Кто сотворил небо и землю со всяким дыханием, – умилосердись над бедным Русским народом и дай ему познать, на что Ты его сотворил!

Спаситель мира, Иисусе Христе, Ты отверз очи слепорожденному – открой глаза и нашему Русскому народу, дабы он познал волю Твою святую, отрекся от всего дурного и стал народом богобоязненным, разумным, трезвым, трудолюбивым и честным!

Душе Святый, Утешителю, Ты, Который в пятидесятый день сошел на апостолов, прииди и вселися в нас! Согрей святою ревностью сердца духовных пастырей наших и всего народа, дабы свет Божественного учения разлился по Земле Русской, а с ним низпошли на нее все блага земные и небесные! Аминь.

Молитва, или Краткое страстей Христовых воспоминание творение святителя Димитрия Ростовского

Радуйся, всем властем трепетная Господа нашего Иисуса Христа главо, нас ради за власы терзанная, тернием венчанная, тростию биенная, и даже до мозгу избоденная.

Радуйся, предрагое Спасителя нашего лице, добротою паче всех сынов человеческих краснейшее, Божественным зраком сияющее, Ангелом приникнути желаемое, и всем удивительное, нас ради оплеванное, безчестне прикровенное, пястьми биенное, все изсинелое, видения доброты не имущее.

Радуйтеся, всемилостивии очи, паче солнца светлейшии, зрением всех сердца к себе влекущии, и умиляющии, нас ради слезами облияннии, и кровию затекшии.