Помощь небесных покровителей. Полный сборник молитв на каждый день года (молитвы общие)

О Пресвятая Госпоже, Владычице Богородице! Приими недостойную молитву нашу: (просьба), и сохрани раб Божиих (имена) от навета злых человек и от внезапныя смерти и даруй им прежде конца покаяние. На моление наше умилосердися и радость вместо печали даруй. И избави их, Госпоже, от всякия беды и напасти, скорби и болезни и от всякаго зла. И сподоби ны, грешныя рабы Твоя, одесную стати во Втором пришествии Сына Твоего, Христа Бога нашего, и наследники быти Царствия Небеснаго и жизни вечныя со всеми святыми в безконечныя веки веков. Аминь.

Молитва пятнадцатая

Надеждо всем концем земли и рабам Твоим (имена). Ты, Пречистая Дево, Госпоже Богородице, утешение наше! Не гнушайся рабов Твоих (имена), грешных, на Твою бо милость уповающих: (просьба), и угаси в них пламень греховный и покаянием ороси изсохшия сердца их, очисти ум от греховных помыслов; приими воздыхание от души и сердца мольбу Ти приносящих. Буди за них Ходатаица к Сыну Твоему и Богу, и укроти ярость Его праведную Матерними Твоими молитвами. Душевныя и телесныя язвы исцели, Госпоже Богородице, утоли болезни душ и телес, утиши бурю злых нападений вражеских; отими бремя грехов рабов Твоих и не остави их до конца погибнути. Ты бо еси возведение человеческому роду, в печали скорая Помощница. Мати истинная Христа Бога нашего, помогай грешным рабам Твоим всегда, и ныне и присно, и во веки веков. Аминь.

Молитва шестнадцатая

Приими, о Всеблагословенная и Всемощная Госпоже Владычице Богородице Дево, сия молитвы за недостойных рабов Твоих (имена), со слезами Тебе ныне приносимыя от нас, ко Твоему цельбоносному образу пение возсылающих со умилением, яко Тебе Самой зде сущей и внемлющей молению нашему: (просьба), по коемуждо бо прошению исполнение твориши, скорби облегчаеши, немощным здравие даруеши, разслабленныя и недужныя исцеляеши, от бесных бесы прогоняеши, обидимыя от обид избавляеши, прокаженныя очищаеши и малыя дети милуеши; еще же, Госпоже Владычице Богородице, и от уз и темниц свобож даеши и всякия многоразличныя страсти врачуеши; вся бо суть возможна ходатайством Твоим к Сыну Твоему, Христу Богу нашему. О Всепетая Мати, Пресвятая Богородице! Не престай молитися о недостойных рабех Твоих, славящих Тя и почитающих Тя, и покланяющихся со умилением пречистому образу Твоему, и надежду имущих невозвратну и веру несумненну к Тебе, Приснодеве Преславней и Непорочней, ныне и присно и во веки веков. Аминь.

Молитва семнадцатая

Мати Господа небесе и земли, подаждь заступление рабам Твоим (имена) по исходе от временныя жизни сия, помози им безбедно прейти вся воздушныя мытарства миродержителя тьмы века сего и в райских обителех со избранными вселитися сподоби, да во светлостех святых воспевают великолепое имя Отца и Сына и Святаго Духа, ныне и присно, и во веки веков. Аминь.

Молитва восемнадцатая

Госпоже Богородице, всесмиренно взываю к Тебе: услыши мя, вонми молению и прошению моему: (просьба), и да исправится молитва моя, яко кадило пред лицем Твоим; сотвори, Владычице, рабов Твоих (имена) всегда разумети богоугодное Тебе и утверди сердца их во истенней любви к Тебе. Аминь.

Молитва девятнадцатая

О Пресвятая Госпоже, Владычице моя Богородице, Небесная Царице! Спаси и избави грешных рабов Твоих (имена) от напрасныя клеветы, от всякия беды и напасти и внезапныя смерти. Защити их, Владычице Богородице, от всех враг видимых и невидимых, и от всякаго злаго обстояния: (просьба), и на всяком месте и на всякое время буди им, Мати Преблагая, необоримая стена и крепкое заступление всегда, ныне и присно, и во веки веков. Аминь.

Молитва двадцатая

Пресвятая Дево, Мати Господа, покажи на мне, убозем, и рабах Божиих (имена) древния милости Твоя: (просьба), и низпосли дух разума и благочестия, дух милосердия и кротости, дух чистоты и правды. Ей, Госпоже Пречистая! Милостива им буди зде и на Страшном суде. Ты бо еси, Госпоже, слава небесных и упование земных. Аминь.

Молитвы ко Пресвятой Богородице на каждый день седмицы подвижника Нило-Сорской пустыни иеромонаха Нила

Молитва первая в день воскресный