Послания

А что о летех еретици смущают простых людей, что уже нашей седмыя тысящи лета изошли, а иных вер еще лета не изошли — и они то лжут, а лета всех вер ровно пришли, а то неверныя з собою прикладывают. А у жидов каким летом и быти излишним? Ведь по всему свету острономиа однака. А то лета уставлены на седмь тысящь лет, да ни болше ни менше того не могли учинити, того ради понеже вначале самем богом уставлено седморичное число — в шесь бо ден мир сътвори бог, а в седмый почи от всех дел своих. Якоже писал есть Енох праведный: «Преж даже вся не быша постави бог века творного и потом сътвори всю тварь видимую и невидимую и по всем том създа человека в образ свой. И тогда раздели бо век человека ради на времена, и на лета, и на месяци, и на дни, и на часы, — и да разумеет человек времен премену и чтет своея жизни конець». Толко то и дано разумети, что коемуждо человеку знати своея жизни конець — сиречь колко лет жил и котораго лета преставися. А что в еуангельи писано: «О дни же том и часе никто же весь», а то и нынешние лета послушьствует еуангелии же, что седмь тысящь лет скончалось, а еуангелское слово, паче же христово, не мимо идет. А что Алексий протопоп, Ариев поборник, иже разседесь яко же Арий, той глагола: «Толко изойдут лета, и мы деи будем надобны», — ино он не дождал того! Бог его предал сатане, видя его необратну душю! Что было тому злодею чинити? Нечто было ему изнова небесное хожение уставити? А кругы небеснаго ходу солнечные и лунные и звездам шествие и индикты[1] как уставлено, ино тому измены нет. Да потому паскалиа и лунник учинено коловратно, на колико тысящь лет бог попустил жити. А иже ныне ищут скончаниа лет глаголющи: «Седмь тысящь изошла, а скончанию веку несть», а о том писал Амос пророк издалеча прозря, сице глаголет: «У, люте помышляющим день господень! Въскую же вам сие день господень? Се бо есть тма, а не свет!». Того ради нарече печали деля и бед, яже будет в той день безаконником.

Примечания

1 Испр.; ркп инди.