Православная энциклопедия

Аще кий приидет хульный помысл на коего святаго, читай сие: Моли Бога о мне грешнем, святый (имя), яко аз по Возе к тебе прибегаю, скорому помощнику и молитвеннику о душах наших. И сотвори поклонов по силе, глаголя: Святый (имя), моли Бога о мне, грешнем.

* * *

Аще приидет хульный помысл на какую икону, сотвори пред тою иконою поклонов 15, или колико можеши, молящися тому, иже на той иконе изображен, и тако хульныя мысли ни во чтоже вмениши Божиею помощию. Аминь.

Молитвы на отгнание злых духов и о сохранении от диавола

Три молитвы, приносимые в начале дня

Молитва первая

Тебе, Богу и Творцу моему, в Троице Святей славимому Отцу, и Сыну, и Святому Духу, поклонятся и вручаю душу и тело мое, и молюся: Ты мя благослови, Ты мя помилуй, и от всякаго мирскаго, диавольскаго и телеснаго зла избави. И даждъ в мире без греха прейти день сей, в славу Твою, и во спасение души моея. Аминь.

Молитва вторая

В руце Твоего превеликого милосердия, о Боже мой, вручаю душу и тело мое, чувства и глаголы моя, советы и помышления моя, дела моя и вся тела и души моея движения. Вход и исход мой, веру и жительство мое, течение и кончину живота моего, день и час издыхания моего, преставление мое, упокоение души и тела моего. Ты же, о Премилосердие Боже, всего мира грехами непреодолеваемая Благосте и Незлобие, Господи, мене, паче всех человеков грешнейшаго, приими в руце защищения Твоего и избави от всякаго зла, очисти многое множество беззаконий моих, подаждь исправление злому и окаянному моему житию и от грядущих грехопадений лютых всегда восхищай мя, да ни в чемже когда прогневаю Твое человеколюбие, имже покрывай немощь мою от бесов, страстей и злых человеков. Врагом видимым и невидимым запрети, руководствуя мя спасенным путем, доведи к Тебе, пристанищу моему и желаний моих краю. Даруй ми кончину христианску, непостыдну, мирну, от воздушных духов злобы соблюди, на Страшном Твоем Суде милостив рабу Твоему буди и причти мя одесную благословенным Твоим овцам, да с ними Тебе, Творца моего, славлю во веки. Аминь.

Молитва третья

Слава Тебе, Царю, Боже Вседержителю, Иже Божественным Твоим и человеколюбным промыслом, сподобил мя еси, грешнаго и недостойнаго, от сна встати и получити вход святаго дому Твоего: приими, Господи, и глас моления моего, якоже святых и умных Твоих сил, и благоволи сердцем чистым, и духом смиренным приносити ся Тебе хвалу от скверных устен моих, яко да и аз общник буду мудрым девам, со светлою свещею души моея, и славлю Тя во Отце и Дусе славимаго Бога Слова. Аминь.

Молитва преп. Нектария Оптинского