Праздничная Минея (на цсл., гражданский шрифт, с ударениями)

Катавасия: Благослови́те, о́троцы, / Тро́ицы равночи́сленнии, / Соде́теля Отца́ Бо́га, / по́йте снизше́дшее Сло́во, / и огнь в ро́су претво́ршее, / и превозноси́те всем жизнь подава́ющаго / Ду́ха Всесвята́го во ве́ки.

На 9-й песни Честне́йшую: не поем, но поем припев праздника: Велича́й, душе́ моя́, / пречестны́й Крест Госпо́день. Таже ирмос 1-го канона: Та́ин еси́, Богоро́дице:

И другий лик подобне, припев и ирмос. И к прочим 6-ти стихом тойже припев поем.

Песнь 9

Припев: Велича́й, душе́ моя́, / пречестны́й Крест Госпо́день.

Ирмос: Та́ин еси́, Богоро́дице, рай, / невозде́ланно возрасти́вший Христа́, / И́мже кре́стное живоно́сное на земли́ насади́ся Дре́во. / Тем, ны́не возноси́му, / покланя́ющеся Ему́, Тя велича́ем.

Да возра́дуются древа́ дубра́вная вся, освяти́вшуся естеству́ их, / от Него́же изнача́ла насади́шася, / Христу́ распросте́ршуся на Дре́ве; / тем, ны́не возноси́му, / покланя́ющеся Ему́, Тя велича́ем.

Свяще́нный воста́ рог / и глава́ всем богому́дрым, Крест, / и́мже гре́шных мы́сленно стира́ются ро́зи вси; / тем, ны́не возноси́му, покланя́ющеся ему́, Тя велича́ем.

Другий припев: Велича́й, душе́ моя́, / животворя́щаго Креста́ Госпо́дня воздви́жение.

И ирмос: Сне́дию дре́ва ро́ду прибы́вшая смерть / Кресто́м упраздни́ся днесь, / и́бо прама́терняя всеро́дная кля́тва разруши́ся / прозябе́нием Чи́стыя Богома́тере, / Ю́же вся Си́лы Небе́сныя велича́ют.

И другий лик подобне, припев и ирмос. Тропари же 6 с симже припевом.

Го́рести уби́йственныя, я́же от дре́ва, не оста́вив, Го́споди, / Кресто́м бо сию́ соверше́нно истреби́л еси́. / Сего́ ра́ди и дре́вом услади́ иногда́ го́ресть вод Ме́рры: / прообразу́ющее Креста́ де́йство, / е́же вся Си́лы Небе́сныя велича́ют.

Непреста́нно гружа́емыя мра́ком пра́отца, Го́споди, / Кресто́м возвы́сил еси́ днесь, / я́ко бо ле́стию весьма́ неудержа́нно естество́ преднизведе́ся, / всеро́дне ны па́ки испра́ви свет Креста́ Твоего́, / его́же, ве́рнии, велича́ем.

Да о́браз пока́жеши мíру покланя́емый, Го́споди, Креста́, / во всех я́ко пресла́вный, на небесе́х изобрази́л еси́, / све́том безме́рным озаре́н, / царю́ всеору́жие непобеди́мое. / Тем Тя вся Си́лы Небе́сныя велича́ют.

Катавасия: Та́ин еси́, Богоро́дице, рай, / невозде́ланно возрасти́вший Христа́, / И́мже кре́стное живоно́сное на земли́ насади́ся Дре́во. / Тем, ны́не возноси́му, / покланя́ющеся Ему́, Тя велича́ем.

Другий: Сне́дию дре́ва ро́ду прибы́вшая смерть / Кресто́м упраздни́ся днесь, / и́бо прама́терняя всеро́дная кля́тва разруши́ся / прозябе́нием Чи́стыя Богома́тере, / Ю́же вся Си́лы Небе́сныя велича́ют.

С припевы. И поклон.

Светилен. Подобен: Ученико́м:

Крест, храни́тель всея́ вселе́нныя, / Крест красота́ Це́ркве, / Крест царе́й держа́ва, / Крест ве́рных утвержде́ние, / Крест А́нгелов сла́ва и де́монов я́зва. Дважды.

Слава, и ныне.Подобен: Жены́, услы́шите:

Крест воздвиза́ется днесь, и мíр освяща́ется: / И́же бо со Отце́м седя́й и Ду́хом Святы́м на сем ру́це распростре́, / мíр весь привлече́ к Твоему́, Христе́, позна́нию; / и́же у́бо на Тя наде́ющияся / боже́ственныя сподо́би сла́вы.

На хвалитех стихиры, на 4, глас 8. Самоподобен:

О, пресла́внаго чудесе́, / живоно́сный сад, / Крест пресвяты́й / на высоту́ возноси́мь явля́ется днесь. / Славосло́вят вси концы́ земни́и, / устраша́ются де́монския полки́. / О, каковы́й дар земны́м дарова́ся! / И́мже, Христе́, спаси́ ду́ши на́ша, / я́ко Eди́н Благоутро́бен. Дважды.

О, пресла́внаго чудесе́, / я́ко грозд, испо́лнен живота́, / понесы́й Вы́шняго, / от земли́ воздвиза́емь Крест ви́дится днесь, / и́мже вси к Бо́гу привлеко́хомся, / и поже́рта бысть до конца́ смерть. / О, Дре́во пречестно́е, / и́мже восприя́хом во Eде́ме безсме́ртную пи́щу, / Христа́ сла́вяще!

О, пресла́внаго чудесе́, / широта́ Креста́ и долгота́ / Небеси́ равна́ eсть, / я́ко Боже́ственною благода́тию освяща́ет вся́чeская. / О сем язы́цы ва́рварстии побежда́ются, / о сем ски́птры царе́й утвержда́ются. / О, боже́ственныя ле́ствицы, / éюже восхо́дим на Небеса́, / вознося́ще в пе́снех Христа́ Го́спода.

Слава, и ныне,глас 6: Днесь происхо́дит Крест Госпо́день, / и ве́рнии прие́млют того́ жела́нием, / и взе́млют исцелéния души́ же и те́ла / и вся́кия боле́зни. / Сего́ целу́им ра́достию и стра́хом: / стра́хом, греха́ ра́ди, я́ко недосто́йни су́ще; / ра́достию же, спасе́ния ра́ди, / éже подае́т мíру на том пригвозди́выйся Христо́с Бог, / име́яй ве́лию ми́лость.

И славословие великое тихо и согласно поют. [6]