САҤА КЭС ТЫ

⁹ Церковка суруйбутум гынан баран, бастыыр баҕалаах Диотреф биһигини билиммэт. ¹⁰ Чэ, тиийдэхпинэ, тугу оҥорбутун санатыам. Биһигини кырыктаах тылынан үөҕэригэр сөп буолбакка, өссө бырааттарбытын киллэрбэтин таһынан, киллэрэр баҕалаахтары кытта бобор, бэл, церковтан үүртэлиир.

¹¹ Таптыыр оҕом, эн куһаҕан холобуру батыһыма, үтүө холобуру батыс. Үтүөнү оҥорор киһи – Таҥара киһитэ, оттон куһаҕаны оҥорор киһи Таҥараны билбэт.

¹² Димитрий туһунан ким барыта, оннооҕор дьиҥ кырдьык бэйэтинэн туоһулаабыта; биһиги эмиэ туоһулуубут, оттон биһиги этэрбит кырдьыктааҕын эһиги бэйэҕит билэҕит.

¹³ Бэрт элбэҕи суруйуом этэ гынан баран, бөрүөнэн-чэрэниилэнэн кэпсэтиэхпин баҕарбаппын; ¹⁴ сотору бэйэҕэр тиийэн, сирэй көрсөн олорон сэһэргэһиэм диэн эрэл санаалаахпын.

¹⁵ Эйиэхэ эйэни баҕара хаалабын. Доҕотторуҥ эҕэрдэлэрин ыыталлар; эн эмиэ доҕотторбутугар бука барыларыгар эҕэрдэтэ тириэрт. Аминь[343].

СИБЭТИЭЙ ИУДА [344] АПОСТОЛ ИЛДЬИТ СУРУГА

1

¹ Аҕа Таҥара сибэтии гыммыт[345], Иисус Христос араҥаччылаабыт ыҥырыылаах дьонугар – Иисус Христос кулута, Иаков быраата Иудаттан.

² Эһиэхэ Таҥара аһыныгас санаата, эйэтэ, таптала үүнэ-үксүү туруохтун!

Сымыйанан үөрэтээччилэр

³ Таптыыр бырааттарым! Эһиэхэ барыбыт быыһаныыбыт туһунан суруйардыы ис сүрэхпиттэн соруна сылдьан, сибэтиэйдэргэ[346] биирдэ букатыннаахтык бэриллибит итэҕэл иһин туруулаһаргытыгар ыҥыран суруйары уталыппат сөп дии санаатым. ⁴ Былыр-былыргыттан бу Дьүүлгэ анаммыт, Таҥараны билиммэт дьон биһиги кэккэбитигэр биллибэтинэн-көстүбэтинэн өтөн киирдилэр. Кинилэр содур олохторун көмүскэнэн, Таҥарабыт илгэлээх үтүө тапталын токурутан кэпсииллэр, соҕотох Улуу Баһылык Таҥараны[347], Айыы Тойоммутун Иисус Христоһу, билиммэттэр.

⁵ Төһө да итини хайыы-үйэ билбиккит иһин, мин эһиэхэ биир суолу санатыахпын баҕарабын: Айыы Тойон Бэйэтин норуотун Египет сириттэн быыһаан таһааран баран, итэҕэйбэтэхтэри кэлин имири эспитэ; ⁶ оттон дьоһун былаастарын харыстаабакка, олорор эйгэлэрин хаалларан барбыт аанньаллары, Дьүүл улуу Күнэ үүнүөр диэри, алларааҥҥы им-балай түгэҕэр үйэлэр тухары сыаптаан сытыарар. ⁷ Кинилэр курдук эмиэ содур быһыыламмыт, түктэри дьалыҥҥа ылларбыт Содом, Гоморра уонна ол эргиннээҕи куораттар олохтоохторо, сэттэригэр умуллубат уокка умайаннар, сэрэтэр холобур буолбуттара.

⁸ Олор курдук бу «көрүүлэнээччилэр» эмиэ бэйэлэрин киртитэллэрин ааһан, Айыы Тойон былааһын билиммэттэр итиэннэ килбиэннээх Аанньаллары үөҕэллэр. ⁹ Бэл, Михаил Архангел өлбүт Моисей этин-сиинин туһуттан адьарайдыын мөккүһэллэригэр буруйдуур-хомуруйар тылы туттубатаҕа, арай: «Айыы Тойон эйигин бобуохтун!» – эрэ диэбитэ. ¹⁰ Балар буоллаҕына оннооҕор тугу билбэттэрин кытары үөҕэллэр; оттон дьиикэй кыыл курдук айылҕалара тардарынан эрэ билэр суоллара кинилэргэ алдьанар-сатарыйар төрүөттэрэ буолбут. ¹¹ Сор-муҥ күүтэр бу Каин суолун кэтэр, барыстанар баҕаттан Валаам курдук аньыыга-хараҕа батыллар, Корей курдук өрө туран өлөр дьону! ¹² Таптал Аһылыгар түмсэргитигэр кинилэр эһиэхэ моһол төрдө буолаллар; бу бэйэлэрин эрэ көрүнэр маныыһыттар, саатар диэни билбэккэ, эһиэхэ аһыы эрэ кэлэллэр. Бу – тыал кыйдыы сылдьар кураан былыттара, ас биэрбэтэх, икки төгүл өлбүт, төрдүлэриттэн түөрүллүбүт күһүҥҥү мастар; ¹³ сааттаах быһыыларынан күүгэн аллар байҕал суостаах долгуннара, үйэлэргэ халбарыйбат халыҥ хараҥа кэтэһэр муна-тэнэ сылдьар сулустара.

¹⁴ Бу кинилэр тустарынан Адам кэнниттэн сэттис сүһүөх Енох эмиэ өтө көрөн эппитэ: «Көр бу, Айыы Тойон аата-ахса биллибэт сибэтиэй Аанньалларыныын кэлэн иһэр! ¹⁵ Айыы Тойон тиийэн кэлэн, барыларын дьүүллүөҕэ, итиэннэ кинилэр ортолоругар баар суута-сокуона суох быһыыланааччылар Таҥараны билиммэккэ тугу быһыыламмыттарын, Кинини билиммэт аньыылаахтар туох дьэбир тылынан утаран саҥарбыттарын бүтүннүүтүн саралыаҕа!»

¹⁶ Бу биир кэм саҥалаах сылдьар, туохха да сөп буолбат, аньыылаах баҕаларын батыһар дьон дарбааннаахтык тыллаһаллар, туһанар баҕаттан сирэй көрбөх быһыыланаллар.

Ыйыы-кэрдии, сэрэтии

¹⁷ Оттон эһиги, таптыыр бырааттарыам, Айыы Тойоммут Иисус Христос Апостоллара тугу өтө көрөн эппиттэрин өйдүү сылдьыҥ. ¹⁸ Кинилэр: «Тиһэх кэм кэллэҕинэ, Таҥараны билиммэккэ, эҥин кыдьыктарын хоту кэрээнэ суох быһыыланар күлүү-элэк оҥостооччулар баар буолуохтара», – диэн эһиэхэ этэллэрэ. ¹⁹ Бу хайдыһыыны таһаарар, аньыылаах дойду сиэринэн олорор дьоҥҥо Таҥара Тыына суох.

²⁰ Оттон эһиги, таптыыр бырааттарым, сибэтиэй итэҕэлгитинэн бэйэҕитин бөҕөргөтүнэн, Сибэтиэй Тыынынан үҥэн, ²¹ Айыы Тойоммут Иисус Христос амарах санаатыттан биэрэр бараммат олоҕун кэтэһэн, Таҥара тапталыгар бигэ эрэлгитин энчирэппэккэ олоруҥ. ²² Сорохторго, өйдөөн-дьүүллээн туран, амарахтык сыһыаннаһыҥ, ²³ оттон сороҕу улуу сэрэҕинэн уоттан өрүһүйэн таһаарыҥ, кинилэр имэҥнээх эттэрэ киртиппит таҥаһын да таарыйартан дьиксинэн туран, аньыыларын саралыыр буолуҥ[348].

Алгыс