САҤА КЭС ТЫ

¹ Айыы Тойоммут Иисус Христос кэлэрин, биһиги Киниэхэ түмсэрбитин этэр буоллахха, бырааттарым, эһигиттэн көрдөһөбүт: ² Христос Күнэ хайыы-үйэ үүннэ диэн ханнык да тыын, хайа да тыл, биһигиттэн диэн ааттаах сурук да кэлэн, өйгүтүн кэбэҕэстик бутуйбатын, симитиннэрбэтин. ³ Ким даҕаны эһигини хайдах да быһыылаахтык сыыһа үктэппэтин: Таҥараттан аккаастаныы буола илигинэ, аньыы-хара киһитэ, өлүү уола биллэ илигинэ, ол күн үүнүө суоҕа. ⁴ Ол туохтан да, Таҥараттан да, бары сибэтиэйтэн-ытыктан да үрдүктүк туттар, утарылаһар киһи кэлэн, Таҥарабын диэн, Таҥара курдук[469] Кини Дьиэтигэр киирэн олоруоҕа. ⁵ Мин урут эһиэхэ тиийэ сылдьан, бу туһунан эппиппин өйдүүр инигит? ⁶ Итиэннэ кэмэ кэлэн, билигин дьоҥҥо биллиэҕин-көстүөҕүн кинини туох тутарын эһиги билэҕит. ⁷ Хара дьай хайыы-үйэ кистэлэҥинэн дьайа турар; ол эрээри маҥнай кинини харгыстаһааччы эйгэттэн ылыллыахтаах. ⁸ Хара дьайдаах киһи кимэ-туга дьэ оччоҕо биллиэҕэ. Айыы Тойон Иисус кэлэн, кинини уоһун тыынынан самнарыаҕа, килбиэннээх сыдьаайынан суох оҥоруоҕа. ⁹ Оттон ол хара дьайдаах киһи кэлэрэ – сатана үлэтин түмүгэ; ол киһи араас күүстээх дьайыылары, сөҕүмэр бэлиэлэри, албын дьиктилэри оҥорон биллиэҕэ, ¹⁰ өлөн эрэр дьону эҥин-араас ааһар албастарынан үктэтиэҕэ, ити барыта – кинилэр быыһаныахтарын баҕарбакка, кырдьыкка тапталы ылымматахтарыттан буолуо. ¹¹ Ол иһин Таҥара мунуу-тэнии дьайыытын ыыттаҕына, кинилэр сымыйаны итэҕэйиэхтэрэ. ¹² Бу барыта – кырдьыгы итэҕэйэр оннугар аньыыны-хараны оҥороллорун ордорооччулар дьүүллэнэллэрин туһугар буолуоҕа.

Халбаҥнаабат чиҥ буолуҥ

¹³ Оттон эһиги тускутугар, бырааттарбыт, Айыы Тойон таптыыр дьоно, биһиги өрүү Таҥараҕа махтана сылдьыах тустаахпыт. Таҥара эһигини, сибэтии гынар Тыынын дьайыытынан, дьиҥ кырдьыкка итэҕэлинэн быыһанаргытыгар анаан, хара маҥнайгыттан талан ылбыта. ¹⁴ Ол туһугар Кини, биһиги биллэрэр Евангелиебытын иһитиннэрэн, эһигини Айыы Тойон Иисус Христос килбиэннээх сырдыгар ыҥырбыта. ¹⁵ Онон, бырааттарым, чиҥник үктэнэн туруҥ, эһиэхэ тылбытынан да, сурукпутунан да тириэрпит үөрэхпитин тутуһуҥ. ¹⁶ Айыы Тойоммут Иисус Христос уонна биһигини таптаан, илгэлээх үтүөтүнэн хаһан да ааспат уоскулаҥы, үтүө эрэли биэрбит Таҥара, биһиги Аҕабыт, ¹⁷ эһиги сүрэххитин уоскутуохтуннар, эһиэхэ өрүүтүн үтүөнү оҥорор, үтүөнү этэр күүһү биэриэхтиннэр.

3

Биһиги туспутугар үҥүҥ

^1-2 Онон, бырааттарбыт, Айыы Тойон тыла манна эмиэ эһиэхэ курдук тарҕанарын, айхалланарын туһугар, биһиги хара санаалаах, уодаһыннаах дьонтон быыһанарбыт туһугар, үҥэ сылдьыҥ; итэҕэл киһиэхэ эрэ барытыгар баар буолбатах. ³ Ол гынан баран Айыы Тойон эрэбил: Кини эһигини бөҕөргөтөн, хара дьайдаахтан көмүскүөҕэ. ⁴ Тугу соруйбуппутун толороллор уонна толоруохтара да диэн, биһиги эһиэхэ Айыы Тойоммут иннигэр эрэллээхпит. ⁵ Айыы Тойон эһиги өйгүтүн-санааҕытын барытын Таҥара тапталыгар, Христос тулууругар салайыахтын.

Сүрэҕэ суох буолууттан сэрэтии

⁶ Бырааттарым, эһигини Айыы Тойон Иисус Христос аатыттан модьуйабыт: най баран иллэҥ сылдьар, биһигиттэн ылыммыт үөрэхтэрин тутуспат бырааттартан тэйэ туттуҥ. ⁷ Биһиги холобурбутун хайдах батыһыахтааххытын билэҕит. Эһиэхэ эрдэхпитинэ, биһиги хаһан да иллэҥ сылдьыбатахпыт, ⁸ ким да килиэбин босхо сиэбэтэхпит, хайаҕытыгар да сүгэһэр буолбат туһугар түүннэри-күннэри үлэлиирбит. ⁹ Ол көмө эрэйэр бырааба суохпутуттан буолбакка, эһиэхэ холобур буолаары, оннук олорбуппут. ¹⁰ Урут эһиэхэ да сылдьан этэрбит, билигин да этэбит: ким үлэлиэн баҕарбат – аһаабатын. ¹¹ Ол эрээри эһиги ортоҕутугар тугу да гыммат, кураанаҕынан сүпсүгүрэр эрэ иллэҥ дьон бааллар эбит. ¹² Оннуктары сиир килиэптэрин чуумпутук үлэлээн булуналларыгар Айыы Тойон Иисус Христос аатынан модьуйабыт. ¹³ Оттон эһиги, бырааттарбыт, үтүөнү оҥорортон сылайымаҥ. ¹⁴ Бу суруйбуппутун истибэт киһини болҕомтоҕо ылыҥ уонна, кыбыстарын туһугар, кинини кытта алтыһымаҥ; ¹⁵ ол эрээри өстөөххө холоомоҥ, бырааккытын өйдөтөрдүү сэрэтиҥ.

Түмүк тыл

¹⁶ Эйэ-ил Айыы Тойоно Бэйэтинэн эһиэхэ өрүүтүн туохха барытыгар эйэни биэриэхтин. Айыы Тойон эһигини барыгытын кытта бииргэ буолуохтун!

¹⁷ Мин, Павел, бу эҕэрдэбин бэйэм суруйабын. Бу хас биирдии сурукпар бэлиэм буолар: ¹⁸ Айыы Тойоммут Иисус Христос илгэлээх үтүөтэ эһигинниин барыгытыныын эҥээрдэһиэхтин. Аминь[470].

СИБЭТИЭЙ ПАВЕЛ АПОСТОЛ ТИМОФЕЙГА БАСТАКЫ ИЛДЬИТ СУРУГА

1

^1-2 Итэҕэлгэ дьиҥ чахчы уолум буолар Тимофейга – Быыһааччы Таҥарабыт уонна биһиги эрэлбит Айыы Тойон Иисус Христос соруйууларынан Апостол буолбут Павелтан.

Эйиэхэ Аҕа Таҥарабытыттан уонна Христос Иисус Айыы Тойоммутуттан бары илгэлээх үтүөнү кытта аһыныгас санаа, эйэ-ил тосхойо туруохтун!

Сымыйа үөрэхтэн сэрэтии