Щит веры – воину-защитнику в помощь

О, свящéннейшая главó, пáстырю дóбрый словéсных овéц Христóвых, священному́чениче Христóв Харалáмпие, вели́кий о нас засту́пниче в скóрбех и бедáх и во всех ну́ждах! Услы́ши нас, грéшных и недостóйных раб твои́х, моля́щихся тебé, да твои́ми всеси́льными моли́твами Всеблаги́й Госпóдь избáвит ны от вся́каго злáго обстоя́ния, прости́т вся согрешéния, вóльная и невóльная, сподóбит ны прóчая лéта жи́зни нáшея скончáти в соблюдéнии зáповедей Егó и покая́нии. Испроси́, угóдниче Бóжий, да пребу́дет благословéние Царя́ Небéснаго над благословéнною Им Росси́ею. Ты бо прия́л еси́ ещé в житии́ своéм от Гóспода си́лу всем притекáющим к тебé с мольбо́ю подавáти потрéбное, тéмже и стáрцы, и вóзрастнии, и дéти приимáху исцелéния рáди ходáтайства твоегó, угóдниче, пред Престóлом Гóспода. Егдá же на мéчное тя усечéние осуди́ша, слы́шал еси́ превожделéнный и сладчáйший глас Гóспода, глагóлющ к тебé сицевáя: прииди́, Харалáмпие, дру́же Мой, мнóгая рáди И́мене Моегó претерпéвый, проси́ у Менé, чесó хóщеши, дам ти. Ты же, вели́кий свети́льниче, рекл еси́ Ему́ усты́ свои́ми: Гóсподи, áще угóдно Тебé есть, молю́ Тя, даждь слáву И́мени Твоему́, идéже положены́ бу́дут моя́ мóщи и пáмять моя́ и́мать почитáтися, да не бу́дет на мéсте том глад и мор или́ тлетвóрный возду́х, погубля́ющ плоды́, но да бу́дет пáче на мéстех тех мир, телесéм здрáвие и душáм спасéние, изоби́лие же пшени́цы, винá и скотóв умножéние на потрéбу человéком. И отвещá тебé глас Госпóдень: бу́ди по прошéнию твоему́, преслáвный Мой вóине. И тáко по прошéнию твоему́ прия́л еси́ от Гóспода вéлию благодáть. На твоя́ молéния, на тя, священному́чениче Христóв Харалáмпие, уповáем, получи́ти вéлию ми́лость от Гóспода в безконéчный век. Ами́нь.

Молитва Архангелу Михаилу, Грозному Воеводе Небесных сил

Гóсподи, Бóже Вели́кий, Царю́ Безначáльный! Пошли́, Гóсподи, Архáнгела Твоегó Михаи́ла на пóмощь рабу́ Твоему́ (имя рек), изъя́ти мя от враг мои́х ви́димых и неви́димых. О Госпóдень Вели́кий Архáнгеле Михаи́ле, излéй ми́ра благáго на рабá Твоегó (имя рек).

О, Госпóдень Вели́кий Архáнгеле Михаи́ле, дéмонов сокруши́телю, запрети́ всем врагáм, борю́щимся со мнóю, и сотвори́ их я́ко óвцы, и сокруши́ их я́ко прах пред лицéм вéтра. О, Госпóдень Вели́кий Архáнгеле Михаи́ле, шестокрилáтый пéрвый кня́же и воевóдо Небéсных сил, Херуви́м и всех святы́х.

О, чу́дный Архáнгеле Михаи́ле, Храни́телю неизречéнных, бу́ди ми вели́кий помóщник во всем — в оби́дах, в скóрбях, в печáлях, в пусты́нях, и на рекáх, и на моря́х — ти́хое пристáнище.

Избáви мя, Вели́кий Михаи́ле Архáнгеле, от вся́кия прéлести диáвольския и услы́ши грéшнаго рабá твоегó (имя рек), моля́щагося тебé и призывáющаго и́мя твоé святóе, ускори́ на пóмощь мою́ и услы́ши молитву мою́.

О, Вели́кий Архáнгеле Михаи́ле, победи́ вся проти́вящияся мне си́лою Честнáго и Животворя́щаго Крестá Госпóдня, моли́твами Пресвяты́я Богорóдицы, и святы́х Ангел, и святы́х Апóстол, и святáго вели́каго Николáя Чудотвóрца, святáго прорóка Илии́, и святы́х великому́ченик Ники́ты и Евстáфия, и преподóбных отéц, и святи́телей, и му́чеников и му́чениц, и всех святы́х Небéсных сил. Ами́нь.

О Вели́кий Архáнгеле Михаи́ле! Помози́ мне, грéшному рабу́ Твоему́ (имя рек), избáви мя от тру́са, потóпа, огня́ и мечá, от напрáсныя смéрти и от вся́каго зла, и от врагá льсти́ваго, и от бу́ри наноси́мыя, и от лукáваго избáви мя, Вели́кий Михаи́ле Архáнгеле Госпóдень — всегдá, ны́не и при́сно и во вéки векóв. Ами́нь.