Скифская история

И сице о турках, и султанах их, и о бранех их со окрестными государи, елико возмогох во историах обрести, написах на уведение люботрудному желателному читателю, дабы той желанием множайшим возбужден будущи, множае потщался написати и историю распространит, ибо по соделанной лествице на высоту возшедши, множае мощно в далечайшия места зрети и о оных ведение сотворити.

Глава 7

О пространстве обладателства турецкаго, и о богатствах и доходах государственных, и о суде, и о воинской можности государства того

Обладатели турецкия объяша властию своею множайшия части трех частей сего света, то есть Европы, Асии и Африки.

В Европе убо имеют весь брег морской наченши от пределов Ракусских даже до устия реки Тада названныя, и от Будина города Венгерскаго даже до Константинополя, и от праваго брега вниз идущи реки Днестра даже до реки Савы.

Сие все или совершенно под их обладателством, или под воеводами, подданными их: под мултанским, волосским или молдавским, под седмиградским [в котором месте лучшая часть Венгерския земли]. Тамо босны, се́рбы, болгары, Македония, Фракия, Эпирус, Аханиа, Аммория и море, еже блиско Константинополя, названное Архипелях, со всеми многими островы.

Во Асии содержат Анатолию, Сирию, Палестину или Святую землю, даже до реки Нила и до Александрии Египетской, и прочия области, обретающияся блиско Понтийскаго моря, и в средину земли даже до Персиды.

Во Африке имеют Египетской страны в долготу пятьсот верст, такожде брега моря Междуземнаго на осмь тысящ верст, и в среду земли до Нумидии и Ефиопии и даже до моря Чермнаго.

Величество же обладателства их может познатися от пространства частей государства их. Море Меотское, его же вкруг тысяща верст, такожде море Понтийское, его же две тысящи седмъсот верст, все в их области. От града Тевриса или Тауриса, иже в Персидской стране, до Будина града венгерскаго ехать их государством… болши чаю 3000 верст; такожде от Дербента Персидскаго града до государства Аден названнаго, иже блиско Персидскаго Чермнаго моря, столко же верст; от Белзеры до града Трамиссен мало менши четырех тысящ верст.

На мори же Междоземном имеют знаменитая островы: Кипр, Родис, Нигропонт, Самос, Схио, Мителин, Сталимен, Кандию или Критской остров и прочих множество.

Яко пределы всего того Туре<ц>каго государства граничатся от востоку с Персидою в долготу чертою, юже достоит мыслию содержат: от Таурис города нововзятаго у персов даже до Барре́ры, и с португалницами отногою или заливою морскою Персидскаю. От полудня с теми же портогалцами Чермным морем, и с Попои́ном, то есть Абисси́нским царством. От запада з государством Фесским, его же ныне Серйфом называют, и с кралевством Неаполитанским, иже под державою испанскаго краля. От полу нощи с поляки, чрез волохи и мултаны, и с княжением Ракусским, иже есть область дому цесарей христианских.

В сих же помянутых пределех обретаются страны, премного исполнены людми и всякими потребными, ибо которая страна обрестися может доволнее во пшеницу над Египет, Африку, Сирию и Асию, или которая область богатее во всякая сокровища паче Греческия, Венгерския и Фракийския области?!

Во всем Турецком государстве суть четыре града, неисчетных богатств исполнены. Яко Константинополь – многолюдственный город во всей Европе, мнят бо в нем народа милионов седмь и вящши. И аще то тако есть, то может учинити яко два Парижа, иже во Францыи.

Алепп – есть величайший град от всеа Сирии и воистинну средина, в него же привозятся вся купецкия вещи из всея Асии.

Каир– первое место имеет междо всеми прочими городами Африцкими, яко тамо несть инаго, иже бы могл прировнятися с ним [аще неции и равняют ему въправду великий город, названный Како], ибо Каир есть пристанищем не токмо богатств египетских и немалыя части африцких, но и индейских многих, отнюду же богатства, привезенныя Чермным морем, развожены бывают на верблюдах во страны, стоящия на море Междуземном.

Таурис– величайший град в государстве Персидском, его же взят Амурат султан лета 7095-го, и имеет в себе до двадесяти тысящ народа и богатства безчисленныя.

Сие государство Турецкое, от малых начатков поскочивши, тако высоко возрасте, яко зело браней ради страшно бысть христианом. Ему же благополучны войны бывают за причинами, данными от несогласий государей христианских, которыя причины умели они ко прибытку своему употребляти.

Вымыслы воинския, обыкновенныя турком, сия суть. Быти всегда готовым на войну. Упредити супостата. Употребляти прудкости дивной в наступлении, имети яко бы в руках силы готовыя. Не покушатися во едино время о войнах разных, не простирати войны нигде на долгое время. Не истощевати время и сокровищ на войны малопотребныя. Не обладати ничим прескачющи, но порядком: от места до места, от града до града.