Смута в России. XVII век

Великий же государь царь и великий княз Михайло Федорович всеа Русии, по многовещателным и премудрым умилным словесем матери своея, великие государыни, старицы иноко Марфы Ивановны, аще и не хотяше на царьствие, милостивый серцем на прошение призирает, и на волю всемогущего Бога себя возлагает, прав милости своея преклоняет его истиннаго пастыря дело, еже полагати душа своя за овца; не сумневаетца о сем, яко расхищение до конца многими леты собранные царские хранилища, и тмочисленное воинство оскуде, и вся пространная и широкая царства Росийскаго в тесноте и в великом оскудении бысть, но на Бога сие надежу возлагает, ведый, яко вся возможна верующему в Ня. Повинуся воле Божии, со многим слесным рыданием и воплем глаголя: «Господи Боже мой милостивый, и прещедрый и человеколюбивый, царь царствующим и Господь господствующим! Аще угодная сия Твоему человеколюбию, Владыко, буди Твоя святая воля! Твой бо есми раб, спаси мя по милости Твоей, и соблюди по множеству щедрот Твоих; на Тя бо уповахом, спаси мя». И потом глагола к преосвященному архиепискупу Федориту и всему вселенскому собору, и боляром и всяким людем: «аще на то будет воля Божия, буди тако».

Святейший же архиепискуп Феодорит, и архимариты, и игумены и вес вселенский собор, и бояре, и весь царский синклит и все православные хрестьяне, слышавше милосердый царьский глагол, на землю падше, радостными слезами благодарственная всемилостивому Богу возсылаху: «слава и благодарение всещедрому и человеколюбивому Богу, не преэревшу моления и слез наших, послав святый Свой Дух в сердце великой государыне, старице иноко Марфе Ивановне и государю царю и великому князю Михайлу Федоровичю всеа Русии; сердца бо их в руце Божии». И благословил преосвященный архиепискуп Феодорит с архимариты и с ыгумены и со всем освященным собором, по благодати, данней им от пресвятаго и животворящего Духа, у чюдотворных образов на государство Владимерское, и Московское и на Ноугородцкое, и на царства Казанское, и Астороханское и на Сибирское, и на все великие государства Росийскаго царствия, честным и животворящим крестом великого государя, Богом дарованнаго, царя и великого князя Михаила Федоровича, всеа Русии самодержца.

И совершив молебная, преосвященный Феодорит, архиепискуп Резанский и Муромский, и архиепискупы, и епискупы и весь освященный собор, и боляре, и все христолюбивое воинство и все православные хрестьяне били челом великому государю царю и великому князю Михаилу Федоровичю всеа Русии и матери его, великой государыне, старице иноко Марфе Ивановне, дабы подвиг свой на свой царской престол в царствующий град Москву учинили вскоре, чтоб их государеким приходом в царствующем граде Москве их царские богомолцы митрополиты, и архиепискупы, и епискупы и весь освященный собор, и бояре, и околиичие, и чашники, и столники, и дворяне, и приказные люди, и дворяне ж из городов и дети боярские, и головы стрелетцкие, и атаманы, и казаки, и стрелцы и всякие служилые люди, и гости, и торговые, и всякие посадцкие и жилетцкие люди, все православные хрестьяне, от своих многих бед и скорбей в радость претворилася; а их бы государские недруги и изменники, слышев их царской приход на их царской престол, от его царского имени страшны были. Великий же государь царь и великий княз Михайло Федорович всеа Русии и мати его, великая государыня, старица иноко Марфа Ивановна богомолцом своим, Феодориту архиепискупу Резанскому и всему освященному собору, и боляром и всем православным хрестьяном милостивое свое слово о своем походе сказали, что поход их государской, для их моления и прошения, будет в царствующий град на Москву вскоре.

Архиепискуп же и весь освященный собор, и боляре, и все православные хрестьяне, всенародное множество з женами и з детми и с сущими младенцы, воздав всемогущему Богу хвалу о неисповедимом даре Его, отыидоша в домы своя с великою радостию, благодаряще Бога. А в царствующий град Москву к митрополитом и к архиепискупом, и епискупом и ко всему освященному вселенскому собору, и к боляром, и околничим, и к чашником, и к столником, и к дворяном, и к приказным людем, и к дворяном же из городов, и к детем боярским, и к выборным людем, которые съехалися из городов для государского обиранья, и к атаманом, и х казаком, и к стрелцом и ко всему христолюбивому воинству, и к гостем, и к торговым, и к посадцким и ко всяким жилетцким людем, и ко всем православным хрестьяном о таком великом неисповедимом даре Божии, что великий государь царь и великий княз Михайло Федорович всеа Русии нас пожаловал, на Московском государстве государем царем и великим князем всеа Русии по многом прошении и молении учинился, а мати его, великая государыня, старица иноко Марфа Ивановна сына своего, а нашего великого государя, царя и великого князя Михаила Федоровича всеа Русии, на Московское государство государем благословила, послаша грамоты того же часу.