Святой флотоводец России. Жизнь и деяния святого праведного воина Федора Ушакова, адмирала непобедимого

И ныне, Богородичен, глас тойже:

Радуйся, Богородице Дево, радуйся, похвало всея вселенныя, радуйся, Пречистая Мати Божия, Благословенная.

На стиховне стихиры, глас вторый. Подобен: Доме Евфратов:

Дом добродетелей Святаго Духа поспешением благодати Феодор явися: темже ныне сошедшеся, тому воспоим.

Стих: Возвеселится праведник о Господе и уповает на Него.

Радуйся, воевод русских похвало и воинов соблюдение, варваров побеждение, сирот и вдов заступниче и страны нашея утверждение.

Стих: Блажен муж, боящийся Господа, в заповедях Его восхощет зело.

Приими ныне пение последователей твоих, о воине, и молящим ти ся у Христа испроси на сопостаты одоление, да ублажаем тя присно.

Слава, глас тойже:

Пристанище тя небурное и стену необоримую стяжахом, вернии, яко флотоводца изрядна и военачальника предивна, Феодоре.

И ныне, Богородичен, глас тойже:

Тайно воспеваем Тя, Мати Божия, гласы православными, яко церковь блюдома есть молитвами Твоими.

Тропарь, глас первый:

Державе Российстей архистратиг непобедимый явился еси, агарянскую злобу нивочтоже вменив и разорив: ни славы мирския, ниже богатсва взыскуя, но Богу и ближнему послужил еси. Моли, святе Феодоре, воинству нашему даровати на врага одоление, Отечеству во благочестии непоколебиму пребыти и сыновом российским спастися.

Слава, и ныне, Богородичен, глас тойже. На велицей вечерни. Блажен муж: 1-й антифон. На Господи, воззвах: стихиры на 8, глас вторый. Подобен:

Киими похвальными венцы венчаим праведнаго Феодора; людей благоверных защитника и воевод православных похвалу, дивнаго в подвизех, бесплотных сожителя, источника божественных дарований неисчерпаемаго, егоже ради Христос земли Российстей дарует мир и велию милость.

Киими похвальными венцы увязем праведнаго Феодора; градов мудраго здателя и управителя, храмов Божиих светлаго украсителя, врача премудраго и богоприятна, исцеляюща недуги и болезни наша, егоже ради врагов шатания Христос низложи, имеяй велию милость.

Киими смиренными устами воспоем Феодора премудраго; солнца светлейша молитвенника, печальных утешение и порабощенных свободителя, похвалу народов православных, реку милости и больных врача безмездна, душу свою за други полагающа о Христе, подающего нам велию милость.

Киими духовными песньми воспоем преславного воина; архистратига искуснаго и непобедимаго, врагом безбожным страшнаго, правды правило, веселие земли Российския, крепость Отечества нашего и забрало, сирот питателя, обидимых заступника, столпа пресветлаго, просвещающаго нас благодатей светлостьми и подающа велию милость.

Слава, самогласен, глас четвертый:

Людие и князи, вкупе богатии и убози, радуйтеся, светлое днесь торжество празднующе непобедимаго воеводы, праведнаго Феодора: воспевайте убо, правовернии воини и простии людие, общаго предстателя и помощника и молебника о душах наших.

И ныне, Богородичен, глас тойже: Иже тебе ради: Вход. Прокимен дня. И чтения три: Премудрости Соломоновы чтение:

Праведных души в руце Божией, и не прикоснется их мука. Непщевани быша во очесех безумных умерети, и вменися озлобление исход их: И еже от нас шествие сокрушение: они же суть в мире. Ибо пред лицем человеческим аще и муку приимут, упование их бессмертия исполнено. И вмале наказани бывше, великими благодетельствовани будут, яко Бог искуси я и обрете их достойны Себе. Яко злато в горниле, искуси их и, яко всеплодие жертвенное, прият я. И во время посещения их воссияют и, яко искры по стеблию, потекут. Судят языком и обладают людьми, и воцарится Господь в них во веки. Надеющиися нань разумеют истину, и вернии в любви пребудут Ему, яко благодать и милость в преподобных Его и посещение во избранных Его.

Премудрости Соломоновы чтение:

Праведник аще постигнет скончатися, в покои будет. Старость бо честна не многолетна, ниже в числе лет иссчитается. Седина же есть мудрость человеком, и возраст старости житие нескверное. Благоугоден Богови быв, возлюбен бысть и живый посреде грешник преставлен бысть. Восхищен бысть, да не злоба изменит разум его или лесть прельстит душу его. Рачение бо злобы помрачает добрая, и парение похоти пременяет ум незлобив. Скончався вмале, исполни лета долга: Угодна бо бе Господеви душа его. Сего ради потщася от среды лукавствия. Людие же видевше и не разумевше, ниже положише в помышлении таковое, яко благодать и милость в преподобных Его и посещение во избранных Его.

Премудрости Соломоновы чтение: