Типикон

На повечерии, по трисвятом глаголем кондак Богородицы собору: Иже прежде денницы: На полунощнице глаголем кафисмы обычныя. По 1–м трисвятом вместо, Се жених: тропарь праздника: рождество твое Христе Боже наш: По 2–м трисвятом кондак собору Богородицы, глас 6: Иже прежде денницы: Таже: Господи помилуй 12, и отпуст. молитвы же, Помяни Господи в надежди, не глаголем. На Утрени, на Бог господь, тропарь праздника трижды, и обычныя кафисмы: и седальны праздника, и чтем слово епифаниа, архиепископа кипрскаго, похвалу пресвятыя Богородицы, на 3 части. Каноны праздника оба, якоже на самый праздник: ирмосы обою канонов по дважды: тропари на 12. Катавасиа, ирмосы обою канонов. По 3–й песни кондак, и икос, и впакои праздника. По 6- й песни,

Кондак, глас 6: Иже прежде денницы от отца без матере родивыйся, на земли без отца воплотися днесь из тебе: темже звезда благовествует волхвом, ангели же с пастырьми поют несказанное рождество твое благодатная.

И икос, и чтем пролог. На 9–й песни, честнейшую не поем: но поем припевы, якоже на самый праздник. Светилен праздника, трижды. На хвалитех, Всякое дыхание: Стихиры праздника на 4, глас 4, самогласны: Веселитеся праведнии: Писаны на праздник. Слава: глас 6: Днесь невидимое естество: И ныне, глас 2: Днесь Христос в вифлееме: Славословие великое. По трисвятом тропарь праздника. ектении, и отпуст, и час 1. На часех, тропарь праздника: кондак же глаголем Богородицы: Иже прежде денницы: На Литургии, блаженна от канонов праздника, песнь 3–я и 6–я. По входе: спаси ны сыне Божий, рождейся от девы, поющия ти: аллилуиа. Сице поем и до отдания праздника. Тропарь праздника: Слава, и ныне, кондак: Иже прежде денницы: Таже трисвятое. Прокимен, глас 3, песнь Богородицы: Величит душа моя Господа: Стих: яко призре на смирение рабы своея: Апостол ко евреем, зачало 307: святяй и освящаемии: Аллилуиа, глас 8: воскресни Господи в покой: евангелие матфеа, зачало 4: отшедшим волхвом: Причастен: Избавление посла Господь людем своим. Аллилуиа, трижды. Вестно буди, яко в попразднстве Христова рождества и богоявления, повечерия поются малая, без канона богородична.

[Смотри] Подобает ведати, яко аще случится рождество христово в неделю, не совершаем памяти святых богоотец во грядущую неделю: занеже начало прияти ианнуарию месяцу, и праздник Христова рождества уже отдастся: но совершаем сию неделю в 27 день декемвриа месяца, наутрие праздника, в понедельник.