Том 11 (XVI век, сочинения Ивана Грозного и Андрея Курбского)

Царю, от Бога препрославленому, паче же во православии пресветлу явльшуся, ныне же грех ради наших сопротивне обретеся,[7] разумеваа да разумеет, совесть прокаженну имуща, якова же ни в безбожных языцех обретается. И болши сего о сем глаголати вся по ряду не попустих языку моему, но гонения ради прегорчайшаго от державы твоея и ото многиа горести сердца поущаюся мало изрещи ти.

Про что, царю, силных во Израили побил еси, и воевод, от Бога данных ти на враги твоя, различными смертми разторгнул еси,[8] и победоносную святую кровь их въ церквах Божиях пролиал еси, и мученическими кровми праги церковныя обагрил еси,[9] и на доброхотных твоих, душа своя за тя полагающих,[10] неслыхованные от века муки, и смерти, и гонениа умыслил еси,[11] изменами, и чародействы, и иными неподобными облыгаа православных[12] и тщася со усердиемъ свет во тму преложити, и тму в свет, и сладкое горко прозвати, и горкое сладко?[13] А что провинили пред тобою и чем прогневаша тя христианстии предстатели?[14] Не прегордыя ли царства разорили и подручны во всем тебе их сотворили,[15] у нихже преже в работе были праотцы наши?[16] Не претвердыя ли грады германскиа тщанием разума их от Бога тебе даны быша?[17] Сия ли нам, бедным, воздал еси, всеродно погубляя нас?[18] Или безсмертен, царю, мнишися и в небытную ересь прелщен еси, аки не хотя уже предстати неумытному Судии[19] и надежде христианстей, богоначалному Исусу, хотящему судити вселенней в правду,[20] паче же не обинуяся прегордым гонителем, и хотяще я истязати до влас прегрешениа их, якоже словеса глаголют?[21] Онъ есть Христос мой, седяй на престоле херувимсте одесную Силы величествиа въ превысоких,[22] — судитель межу тобою и мною.

И коего зла и гонениа от тебе не претерпех! И коих бед и напастей на мя не подвигнул еси! Коих лжей и измен на мя не возвел еси! А вся приключившаа ми ся от тебе различныя беды по ряду, за множество их, не могу изрещи, понеже горестию еще душа моя объята бысть. Но вкупе вся реку конечно: всего лишен бых и от земля Божиа туне тобою отогнан есмъ.[23] И за благаа моя воздал ми еси злаа, и за возлюбление мое — непримирителную ненавесть.[24] Кровь моя, яко вода пролита за тя, вопиет на тя Богу моему.[25] Богъ — сердцам зритель: во уме моем прилежне смышлях, и совесть мою сведетеля представлях, и исках, и зрех, смышленно обращаася, и не свем себе, и не наидох в чем пред тобою виновата и согрешивша.[26] Пред войском твоим хождах и исхождах, и никоегоже тебе бещестиа не приведох, но разве победы пресветлы помощию аггела Господня въ славу твою поставлях и никогдаже полков твоих чюжим полкомъ хребтом обратих, но паче одолениа преславнаа на похвалу тебе сотворях. И сие не во едином лете, ни во двою, но во многих летех потрудихся многими поты и терпением,[27] яко мало и рожшеа мя зрех,[28] и жены моея не познах,[29] и отечества своего остах, но всегда в далних и околных градех твоих против врагов твоих ополчахся и претерпевах естественыя болезни, имже Господь мой Исус Христос сведетель; паче же учащаем бых ранами от варварских рук в различных битвах, сокрушено же ранами все тело мое имею.[30] И тебе, царю, вся сиа ни во что же бысть.

Но хотех рещи вся по ряду ратныя дела моя, ихже сотворих на похвалу твою, но сего ради не изрекох, занеже лутче Богъ весть. Он бо есть всем симъ мздовоздаатель, и не токмо сим, но и за чашу студеныя воды.[31] Еще, царю, сказую ти к тому: уже не узриши лица моего до дни Страшнаго суда.[32] И не мни мене молчаща ти о сем: до дни скончяниа живота моего буду непрестанно вопити на тя со слезами пред безначалной Троицею, в неяже верую, и призываю в помощь херувимскаго Владыки Матерь, надежду мою и заступницу Владычицу Богородицу, и всех святых, избранных Божиих, и государя моего князя Федора Ростиславича.[33]

Царю, не помышляй и не мудръствуй мысльми, аки уже погибших и избиенных от тебе неповинно и заточенных, и прогнанных без правды.[34] Не радуйся о сем, аки хваляся сим: разсеченыя тобою у престола предстоят Владычня; отомщения на тя просят, заточенныя же и прогнанныя тобою без правды от земля Богу вопиют на тя день и нощь![35] Аще и тмами хвалишися в гордости своей и при временном сем скоротекущем веце умышляеши на христианский род мучителныя сосуды, паче же наругаешися, попирающи аггелский образ,[36] согласующим ти ласкателем и товарыщем трапезы, бесогласным твоим боляром и губителемъ души твоей и телу, и детми своими паче же Кроновых жерцов действуют.[37] О сем даже до зде.