Том 12 (XVI век, литература «обобщающих предприятий»)

Видевъ же старецъ усердие отрока и многиа слезы, введе его в келию свою и начатъ увещавати его, глаголя: «Не скорби убо о сем, чадо, еже изрекох ти: не мала убо есть вещь — дело инока. Иноцы бо самоволнии мученицы именуются, и мучение ихъ сугубейше есть, мученицы бо мнози, во единемъ часе временне страдавше, скончашася, иноких же житие по вся дни страдание имать, аще и от мучитель мучениа не приемлютъ, но убо внутрь от естества плоти своея и от враговъ мысленыхъ ратуеми, и до последняго издыханиа стражуть». Посемъ же глагола ему: «Сыне, аще приходиши работати Господеви, уготови душю свою воеже терпети искушениа и страданиа, наводимая от враговъ, да претерпевъше сихъ, приимеши мъздовоздаяние на небеси велие».

Отрокъ же поверже себе на ногу старчю, аки камень, безгласенъ пребысть, ничтоже ино могый провещати, токмо «помилуй мя». Старецъ же воздвиже его: «Востани, — рече, — чадо, Господь наставит тя на путь заповедей своихъ.[108] Сего убо ради изрекох ти сия, понеже мужъ грешенъ есмь, аще и дело Божие восприяхъ строити. Днесь убо желание твое исполнится». И се рекъ, сътворь молитву и облече его во святый аггельскый образъ.

Учаше же его добродетелемъ и наказоваше страданиемъ еже по Бозе, мужества и крепости смыслъ его исполняше, и въ всемъ собою образъ показоваше ему. Блаженный же Никонъ пребываше у него прочее, упражняющеся въ молитвахъ, преспеваше добродетельми, постомъ же, и бдениемъ, и чистотою, бяше бо нравомъ смиренъ и образомъ кротокъ, и въ Божественыхъ Писаниих трудолюбне поучашеся, и всемъ умомъ сих испытааше. Помысломъ же на болшая внимаше, и целомудровати произволяше, все еже тщание сотворяетъ о добродетелнем поучении; и о семъ всегда тщашеся, и зело болезноваше, да како исправитъ и прочаа добродетели.

Афонасий же видевъ его в тацемъ прилежании суща, зело внимаше о семъ, и полагаше сия въ сердцы своемъ, и отечески съблюдаше его, и на предняя воздвизаше, и ко всякому делу и разуму благочестно и удобно возводя, искуснейша сего показуя всему иноческому житию. Егда же достигшу ему совершеннаго возраста, тогда дивный онъ мужъ Афонасей с советомъ братиа священьства саном почте его и яко достойна предстоятеля Богу того представи. Доблий же Никонъ по поставлении на священьство болшей благодати сподобися и больше къ благым усердьствуяше, и в себе размышляя, како толикыя благодати достоиньство приемлетъ, еже не земнымъ точию, но и небеснымъ силамъ страшно. И сихъ ради размышлений умъ ему на лучшая восхождааше и Богу прилепляшеся, емуже беседуя пении и молитвами николиже престаяше.

Пребысть же неколико время во обители тъй, абие желание велие подвижетъ его видети великаго старца преподобнаго Сергия и благословитися от него, бе бо в немъ со иными добродетелми и разумъ известенъ ко исканию онех, иже с трудомъ о благомъ поучениа сотворьшихъ. Моление велие простираетъ ко Афонасию, еже молитвы сподобитися от него, — и с миромъ отпустися. Сему же бывшю, в чюднаго Сергиа лавру приходит, егда же узре великаго отца, и от многаго желаниа и любве весь слезенъ бысть, тепле припадает къ честнымъ его ногамъ, благословения прося. Святый же въззре нань радостнымъ лицемъ и глагола ему: «Добре пришелъ еси, чадо Никоне!» Онъ же любочестивейше противъ званиа смиреный образъ показуя, таже и в келию к нему проходит, радуяся оному повелевшю, и лобзанию оного сподоблься, со страхом прикоснуся честным святаго удесем, и любезне благословенъ бысть от него. Не угости же его нымало, якоже обычай имяше преподобный прочая приходящаа угощати, но скоро всяческы и любезне приятъ бысть от него и повелеваетъ ему служити братии съ всяцемъ прилежаниемъ.

Пребываше же убо блаженный Никонъ, всяку службу манастырьскую творя, и сицевыми труды и подвиги вседеньствуя, к Богу молитвою беседоваше, нощию же паче по реченному делу касашеся, и сна мало приимаше, усерднейше же священная пениа сътворяше. О сихъ же паче възлюби его преподобный Сергие и зело услаждаашеся житиемъ его, телесных бо ради деланий и от духовных рачений образехъ извещение о немъ восприятъ. И повелевает ему во единой келии съ собою пребывати, яко да и причастника того сътворит деланий духовныхъ въсхождения; и повсегда сладце и любезне наказуя того добродетелемъ и многодушевное показуя любомудрие о нем.

Целомудренный же послушникъ привязася оному союзомъ духа, вождениемъ того и образомъ последуя, в совершеннейшая добродетели вперяшеся и, того житию ревнуя, к подобнымъ того готовяшеся въспоминаниемъ. Не мякко бо, ниже слабо явы душевное предстояние, но мужествено всячески и непоколебимо основание жизни своей положи, еже есть послушание и смирение, и сие себе приобретение велие имяше.