Том 5 (XIII век, литература трагического века)

Въ лето 6733. При великом князе Георгии Всеволодовичи Владимерском, и при великом князе Ярославе Всеволодовичи Ноугородцкомъ, и сыне его князе Алексанъдре Ярославичи Невском[186], и при Рязанском великом князе Юрьи Ингоревиче, принесенъ бысть чюдотворный образ великаго чюдотворца Николы Корсунскаго Заразскаго из преименитаго града Херсони в пределы резаньскыа во область благоверна князя Федора Юрьевичя Резанскаго. А стоялъ чюдотворный образ во граде Корсуни посреди града близ церкви апостола Иякова брата Богословле. А у сего бо апостола Иякова крестися самодержавный и великий князь Владимер Святославич Киевской[187] и все Руси. А полата была болшая краснаа у чюдотворцева храма сзади олтаря, в ней же гречестии цари веселяшася Василей, Костянтинъ Парфиенитос[188] — православный. Сии бо цари даша сестру свою Анну за великаго князя Володимера Святославича Киевъского и прислаша ю во град Корсунь. Благоверная царица Анна не сочтася брака со Владимером Святославичем и нача его молити быти крестьяна. Князь велики Владимеръ Святославичь возлюби совет православныа царицы невесты своея и призва епископа Анастаса Корсуньскаго и повеле себя просвятити святым крещением. И по Божию строению в то время разболеся Владимеръ очима и ничто же не видяше. Епископъ Анастас с попы царьцыны вне града Херусони крестиша Владимера и погрузиша его въ святей купили и абие прозре. И виде Владимеръ, яко воскоре исцеле, и прослави Бога, и рек: «Во истину велий Богъ христьянескъ и чюдна веря ся». Не токма очима прозре и душевныма очима позна Творца своего. Тогда бысть радость велия во граде Корсуни о крещении благовернаго великаго князя Владимера Святославича.