Том 6 (XIV - середина XV века, литература времени национального подъема)

В лето 6773-е. Побишася Литва межи собою[66] некиа ради нужа, блаженый же князь Домантъ съ друженою своею и съ всем родомъ своимъ оставль отечьство свое, землю Литовскую, и прибеже в Плесков.[67] Си бысть князь Домонт от племени литовского,[68] прьвее имеа ко идоломъ служение[69] по отцю преданию, егда Богь восхоте избрати собе люди новы, и вдохну в онь благодать Святого Духа, и възбнувся, яко от сна, от идолского служениа и помысли своими бояры креститися во имя Отца и Сына и Святого Духа. И крещен бысть въ соборной церкви, въ святей Троици,[70] и наречено бысть имя ему въ святомъ крещении Тимофей. И бысть радость велика во Плескове, и посадиша его мужи псковичи на княжение въ граде Пскове.

По неколицехъ днехъ помысли ехати съ мужи псковичи, съ 3-ми девяносты,[71] и плени землю Литовскую, и отечьство свое повоева, и княгиню Герденевую[72] полони и дети ея, и все княжение его повоева, и възратися съ множеством полона ко граду Плескову. Перебродився Двину, и отъеха за 5 верстъ, и ста шатры на бору чисте, а стражи постави на реце на Двине Давыда Якуновича, внука Жаврова, с Лувою с Литовникомъ. Две же девяносте мужь отпровади с полономъ, а во едином девяносте сам ся оста, жда по собе погони.

Герденю же съ своими князи дома не бывшю, и приехаше в домы своя, аже домове их и земля их вся пленена. Ополчився Гордений и Гойтортъ и Люмби и Югайло и прочии князи, в семисотъ погнаша в след Домонта, хотяще его руками яти и лютой смерти продати, а мужи псковичи мечи иссечи, и пребродившеся Двину реку и сташа на брезе. И стражи же, видевше рать велику, пригнавше, поведавше Домонту: рать перебродилася Двину. Домонтъ же рече Давыду и Луве: «Помози вама Богъ и святаа Троица, оже еста устерегла рать велику, полезьта доловъ». И рече Давыдъ и Лува: «Не лезова доловъ, хотя животъ свой дати на славе и кровь свою пролити с мужи съ псковичи за святую Троицу и за вся церкви святыа. А ты, господине княже, поеди борзо с мужи съ псковичи на поганую Литву». Домонт же рече псковичемъ: «Братьа мужи псковичи, кто старъ, то отець, а кто млад, той братъ! Слышалъ есмь мужество ваше во всех странах, се же, братья, нам предлежитъ животъ и смерть. Братья мужи псковичи, потягнете за святую Троицу и за святыа церкви, за свое отечьство!»

Тогда же бе приспелъ день великого и славнаго воеводы, мученика Христова Леонтиа,[73] и рече Тимофей князь: «Святаа Троица, и святый великий воевода Леонтий, и благоверный княже Всеволоде,[74] помози намъ в час сий на супротивныя врагы». И ехав, князь Домонтъ с мужи псковичи Божиею силою и святаго Христова мученика Леонтиа одиномъ девяностомъ 7 сот победи. Тогда же убиенъ бысть князь великий литовский Гойтортъ, и инехъ князей много избиша; а инаа Литва въ Двине истопоша, а инехъ Двина изверже 70 их на островъ Гоидовъ, а инии на прочаа островы извержени быша, а инии вниз по Двине поплыша. Тогда же убиенъ бысть Онтонъ един псковитинъ, сынъ Лочков, брат Смолигов, а инии вси без вреда съхранени быша молитвою святого Христова мученика Леонтиа. И възвратишася с радостию великою ко Пскову граду съ многою користию, и бысть радость и веселие велико въ граде во Пскове о пособии святыа Троица, и славнаго великого Христова мученика Леонтиа, и благовернаго князя Всеволода, ихъ молитвами на супостатыа победа.

И паки же по томъ времени, в лето 6775-е, великий князь Дмитрий Олександровичь... съ зятемъ своимъ с Домонтомъ[75] и с мужи с новогородци и со псковичи и иде к Раковору,[76] и бысть сеча велика[77] с погаными немци на поле чисте, и помощию святыа Софиа[78] Премудрости божиа и святыа Троици немецкиа полкы победиша февраля 18 суботу сыропусную.[79] И прошед горы непроходимаа, и иде на вируяны,[80] и плени землю их и до моря, и повоева Поморье,[81] и паки возвратився, и исполни землю свою множеством полона. И славна бысть вся земля ею во всехъ странах страхом грозы храборства великого князя Дмитрея, и зятя его Домонта, и мужь ею новогородцовъ и псковичь.

И по томъ по неколицех днехъ останок собравше поганое латины,[82] и пришед тайно, и взяша с украины неколико псковскых селъ, и възвратишася вскоре. И боголюбивы же князь Домонтъ не стерпе обидиме быти земли и дому святыа Троица от нападениа поганыхъ немець, выехавъ в погоню с малою дружиною в пяти насадах[83] с шестьюдесятью мужь псковичь, Божиею силою 8 сотъ немец победи на реце на Мироповне,[84] а два насада бежаше в ыныа островы. Боголюбивый же князь Домонтъ, ехав и зажже островъ, и пожже ихъ под травою, а инии побегоша, а власи их зажжени горятъ, а иных иссече, а инии истопоша в воде пособием святыа Троици, и славнаго великого воина Георгиа,[85] и молитвою благовернаго князя Всеволода, месяца априля в 23 день, на память святого славнаго мученика Христова Георгиа. И възвратишася с радостию великою въ град во Псковъ, и бысть радость и веселие въ граде во Пскове о пособии Святыа Троица и святого воина великого Христова мученика Георгиа.