Требник гражданским шрифтом

Влады́ко Го́споди Бо́же на́ш, все́х щадя́й, о все́х промышля́яй, та́йная ве́дый челове́ческая, и все́х ве́дение име́яй, очи́сти грехи́ на́шя, и беззако́ние прости́ твои́х рабо́в, призыва́яй я́ в покая́ние, подая́ и́м проще́ние прегреше́ний, грехо́в очище́ние, проще́ние беззако́ний во́льных же и нево́льных, ве́дый немощно́е челове́ческаго естества́, созда́телю, и соде́телю: и́же раа́ву блудни́цу прости́вый, и мытаре́во покая́ние прие́мый, не помяни́ грехо́в на́ших неве́дения от ю́ности. а́ще бо беззако́ния на́зриши Го́споди, Го́споди, кто́ постои́т тебе́? или́ ка́я пло́ть оправди́тся пред тобо́ю, ты́ бо еди́н еси́ пра́веден, безгре́шен, свя́т, многоми́лостив, многоблагоутро́бен, и ка́яйся о зло́бах челове́ческих. ты́ Влады́ко, присво́ивый рабы́ твоя́, и́мярек, и́мярек, соедини́ к дру́г дру́гу любо́вию: да́руй и́м мытаре́во обраще́ние, блудни́цы сле́зы, разбо́йниче испове́дание: да покая́нием от всего́ се́рдца своего́, во единомы́слии и ми́ре за́поведи твоя́ де́лающе, сподо́бятся и небе́снаго твоего́ Ца́рствия.

Я́ко ты́ еси́ строи́тель все́х, и тебе́ сла́ву возсыла́ем:

Свяще́нник: Ми́р все́м.

Диа́кон: Главы́ ва́шя Го́сподеви приклони́те.

И моли́тву сию́:

Го́споди Иису́се Христе́, сло́ве Бо́жий, вознесы́йся на честне́м и животворя́щем кресте́, и е́же на ны́ рукописа́ние растерза́вый, и наси́лия диа́воля избавле́й на́с, очи́сти беззако́ния рабо́в твои́х: зане́ зно́я и тяготы́ дневны́я, и плотска́го разжже́ния не могу́ще понести́ во второ́е бра́ка обще́ние схо́дятся: я́коже законоположи́л еси́ сосу́дом избра́ния твоего́ па́влом, реки́й на́с ра́ди смире́нных: лу́чше е́сть о Го́споде посяга́ти, не́жели разжиза́тися. са́м я́ко бла́г и человеколю́бец, поми́луй и прости́, очи́сти, осла́би, оста́ви до́лги на́шя: я́ко ты́ еси́ неду́ги на́шя на ра́мена взе́мый: никто́же бо бы́сть безгре́шен, а́ще и еди́н де́нь живота́ его́ е́сть, или́ кроме́ поро́ка, то́кмо ты́ еди́н еси́ пло́ть нося́й безгре́шно, и ве́чное на́м дарова́вый безстра́стие.

Я́ко ты́ еси́ Бо́г, Бо́г ка́ющихся, и тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.

Лю́дие: Ами́нь.

Го́споду помо́лимся.

Свяще́нник моли́тву:

Бо́же святы́й, созда́вый от пе́рсти челове́ка, и от ребра́ его́ возсозда́вый жену́, и спряги́й ему́ помо́щника по нему́, за е́же та́ко уго́дно бы́сть твоему́ вели́честву, не еди́ному бы́ти челове́ку на земли́: са́м и ны́не Влады́ко, низпосли́ ру́ку твою́ от свята́го жили́ща твоего́, и сочета́й раба́ твоего́ сего́, и́мярек, и рабу́ твою́ сию́, и́мярек, зане́ от Тебе́ сочетава́ется му́жеви жена́: сопрязи́ я́ во единому́дрии, венча́й я́ в пло́ть еди́ну, да́руй и́ма пло́д чре́ва, благоча́дия восприя́тие.

Я́ко твоя́ держа́ва, и твое́ е́сть Ца́рство и си́ла:

И взе́м венцы́, венча́ет жениха́, глаго́ля:

Венча́ется ра́б Бо́жий и́мярек, рабе́ Бо́жией, и́мярек, во и́мя Отца́, и Сы́на, и Свята́го Ду́ха.

Подо́бне венча́ет и неве́сту, глаго́ля:

Венча́ется раба́ Бо́жия, и́мярек, рабу́ Бо́жию, и́мярек, во и́мя Отца́, и Сы́на, и Свята́го Ду́ха.

Та́же благословля́ет я́, глаго́ля три́жды:

Го́споди Бо́же на́ш, сла́вою и че́стию венча́й я́.

Та́же глаго́лет Апо́стол и Ева́нглие, я́коже написа́ся в пе́рвом венча́нии.

Та́же диа́кон:

Рце́м вси́ от всея́ души́:

Го́споди вседержи́телю Бо́же оте́ц на́ших:

Поми́луй на́с Бо́же:

Еще́ мо́лимся о ми́лости, жи́зни, ми́ре, здра́вии, спасе́нии, посеще́нии рабо́в Бо́жиих и́мярек, и помина́ет и́хже хо́щет.

Возгла́сно: Я́ко ми́лостив:

Диа́кон: Го́споду помо́лимся.

Свяще́нник моли́тву сию́:

Го́споди Бо́же на́ш, во спаси́тельном твое́м смотре́нии, сподо́бивый в ка́не галиле́йстей честны́й показа́ти бра́к, твои́м прише́ствием: са́м и ны́не рабы́ твоя́ и́мярек и и́мярек, я́же благоволи́л еси́ сочетава́тися дру́г дру́гу, в ми́ре и единомы́слии сохрани́: честны́й и́х бра́к покажи́, нескве́рное и́х ло́же соблюди́: непоро́чное и́х сожи́тельство пребыва́ти благоволи́, и сподо́би я́ в ста́рости масти́тей дости́гнути, чи́стым се́рдцем де́лающя за́поведи твоя́.

Ты́ бо еси́ Бо́г на́ш, Бо́г е́же ми́ловати и спаса́ти, и тебе́ сла́ву возсыла́ем, со безнача́льным твои́м отце́м, и всесвяты́м, и благи́м и животворя́щим твои́м ду́хом, ны́не и при́сно, и во ве́ки веко́в, ами́нь.

Диа́кон: Заступи́, спаси́, поми́луй:

Дне́ всего́ соверше́нна, свя́та:

А́нгела ми́рна, ве́рна:

Проще́ния и оставле́ния грехо́в:

До́брых и поле́зных душа́м:

Про́чее вре́мя живота́ на́шего:

Христиа́нския кончи́ны живота́:

Соедине́ние ве́ры, и прича́стие:

Свяще́нник возглаша́ет:

И сподо́би на́с Влады́ко: Ли́к: О́тче на́ш:

Свяще́нник: Я́ко твое́ е́сть Ца́рство: Ами́нь.

Свяще́нник: Ми́р все́м.

Главы́ ва́шя Го́сподеви приклони́те.

Та́же прино́сится о́бщая ча́ша, и благословля́ет ю́ свяще́нник, и глаго́лет моли́тву сию́:

Бо́же, вся́ сотвори́вый кре́постию твое́ю, и утверди́вый вселе́нную, и украси́вый вене́ц все́х сотворе́нных от Тебе́: и ча́шу о́бщую сию́ подава́яй сочетава́ющымся ко обще́нию бра́ка, благослови́ благослове́нием духо́вным.

Возгла́сно: Я́ко благослови́ся твое́ и́мя, и просла́вися твое́ Ца́рство: