Требник гражданским шрифтом

Иере́й:

Бо́же, трудо́м челове́ческим и безслове́сными живо́тными благоде́йствовати ве́дый, и неизрече́нным милосе́рдием твои́м саме́х пче́л плоды́ и дела́ к ну́ждам на́шым употребля́ти научи́вый, смире́нно мо́лимся вели́чествию твоему́: пче́лы сия́ благослови́ти изво́ли, и к приобре́тению челове́ческому ро́ду умно́жи я́, снабдева́я и́х, и препитава́я: да ки́йждо на вели́чество твое́ и безме́рныя щедро́ты твоя́ упова́яй, в хране́нии же си́х живо́тных тружда́яйся, трудо́в свои́х оби́льныя плоды́ сподо́бится восприя́ти, и небе́снаго благослове́ния испо́лнится, о Христе́ Иису́се Го́споде на́шем, ему́же че́сть и сла́ва во ве́ки веко́в, ами́нь.

И па́ки окропля́ет ме́сто пче́л, и чте́т ева́нглие от луки́, зача́ло 114.

Во вре́мя о́но, воскре́с Иису́с от ме́ртвых, ста́ посреде́ учени́к свои́х, и глаго́ла и́м: ми́р ва́м. убоя́вшеся же и пристра́шни бы́вше, мня́ху ду́х ви́дети. И рече́ и́м: что́ смуще́ни есте́? и почто́ помышле́ния вхо́дят в сердца́ ва́ша? Ви́дите ру́це мои́ и но́зе мои́, я́ко са́м а́з е́смь: осяжи́те мя́ и ви́дите: я́ко ду́х пло́ти и ко́сти не и́мать, я́коже мене́ ви́дите иму́ща. И сие́ ре́к, показа́ и́м ру́це и но́зе. Еще́ же не ве́рующым и́м от ра́дости и чудя́щымся, рече́ и́м: и́мате ли что́ сне́дно зде́? Они́ же да́ша ему́ ры́бы печены́ ча́сть, и от пче́л со́т. И взе́м пред ни́ми яде́. Рече́ же и́м сия́ су́ть словеса́, я́же глаго́лах к ва́м, еще́ сы́й с ва́ми, я́ко подоба́ет сконча́тися все́м напи́санным в зако́не моисе́ове и проро́цех и псалме́х о мне́.

По Ева́нглии же глаго́лет сие́:

Си́ми ева́нгльскими словесы́, да очи́стятся грехи́ на́шя, и разоря́тся и поги́бнут вся́ обая́ния, а́ще ка́я су́ть на ме́сте се́м: да сни́дет же на не́ благослове́ние всемогу́щаго Бо́га Отца́, и Сы́на, и Свята́го Ду́ха, ами́нь.

И па́ки кропи́т ме́сто пче́л, и быва́ет отпу́ст.

Глава 34. Благослове́ние ро́ев пче́льных, во у́лия но́ва всажде́нных

Нача́ло я́коже и в предъиду́щей главе́, по псалме́х же моли́тва сия́:

Бо́же всемоги́й, предве́чный, содержа́й го́рстию всю́ тва́рь, облада́яй не́бом и земле́ю, и все́ми я́же на ни́х, вся́кому же созда́нию, е́же на по́льзу бы́ти ще́дро подая́й: умиле́нно мо́лим ти ся всебла́же, я́коже дре́вле изра́ильтяном зе́млю ме́дом и млеко́м теку́щую дарова́ти, в пусты́ни Иоа́нна крести́теля твоего́ ди́виим ме́дом воспита́ти благоизво́лил еси́: та́кожде ны́не призре́ния твоего́ благоволе́нием к живопита́нию на́шему. се́й пче́льник и его́ у́лия благослови́, умножа́я преумно́жи в не́м пче́лы, и благода́тию твое́ю я́ соблюда́ющи, ту́чнаго на́с ме́да испо́лни: да ника́ко се́й пче́льник созда́ний твои́х пче́льных лише́н, но всегда́ преиспо́лнен со́ты ме́да бу́дет: и по премно́гой благосты́ни и непобеди́мей кре́пости твое́й, да яви́тся неподви́жимь мно́гими лука́вствы, и непоколеби́мь зазо́рными обая́нии, но твое́ю всеси́льною огражде́н держа́вою, и остене́н ополче́нием, от вся́каго кова́рства волше́бнаго сохране́н, и всегда́ в твое́й Христе́ рукоя́ти невреди́мь пребу́дет. Твое́ бо е́сть, е́же ми́ловати и спаса́ти ны́ Христе́ Бо́же на́ш, и тебе́ сла́ву возсыла́ем, со отце́м и святы́м ду́хом, во ве́ки, ами́нь.

И кропи́т иере́й пче́л и у́лия водо́ю свяще́нною:

Во и́мя Отца́, и Сы́на, и Свята́го Ду́ха, ами́нь.

Посе́м глаго́лет обы́чный дневны́й отпу́ст.

Глава 35. Моли́тва, е́же освяти́ти како́е ли́бо благово́нное зе́лие

По нача́ле обы́чном, трисвято́м и возгла́се, рече́т иере́й: Го́споду помо́лимся.

Ли́к: Го́споди поми́луй.

И чте́тся моли́тва сия́:

Го́споди Бо́же вседержи́телю, сло́вом твои́м вся́ческая испо́лнивый, и возрасти́ти повеле́вый земли́ вся́ плоды́ во своя́ времена́, и дая́ти я́ в ра́дость и в живо́т челове́ком: ты́ са́м, всеблаги́й Влады́ко, и се́мена сия́, с разли́чными зе́лиями принесе́нныя во святы́й хра́м се́й, благослови́ и освяти́ ду́хом твои́м святы́м, и рабо́в твои́х си́х, прие́млющих зе́лия сия́ с се́менами, от вся́кия скве́рны очи́сти, и до́мы и́х вся́каго благово́ния испо́лни, во е́же бы́ти си́м и все́м ве́рою храня́щым я́, и кадя́щымся и́ми в соблюде́ние и изба́ву от все́х вра́жиих прило́гов и во отгна́ние вся́каго мечта́ния, от де́йства диа́воля находя́щаго, дневна́го и нощна́го, на благослове́ние же душа́м и телесе́м, ве́рным твои́м лю́дем и ското́м, домово́м же и ме́стом. Я́ко да вси́, прие́млющии сия́ зе́лия, восприи́мут себе́ покро́в души́ и те́ла, и да бу́дет на́шему спасе́нию врачевство́ твоея́ благода́ти та́инство: да в ко́ем ли́бо ме́сте возло́жится, или́ на ко́ем употребля́емо бу́дет, во е́же получи́ти благослове́ние, вся́ [проти́вной си́ле отту́ду прогна́нней] десни́ца твоя́ да покры́ет, во сла́ву Пресвята́го, великоле́паго и всепокланя́емаго и́мене твоего́. Ему́же подоба́ет вся́кая сла́ва че́сть и поклоне́ние, со отце́м и святы́м ду́хом, ны́не и при́сно, и во ве́ки веко́в, ами́нь.

И окропля́ются свято́ю водо́ю три́жды, с обы́чными слова́ми окропле́ния и освяще́ния, и отпу́ст.