Творения

Глава 15. О поставлении во епископство блаженнейшаго отца Варсонофия славному граду Тфери.

Потом же Божиим смотрением, по повелению самодержца государя царя и великаго князя Иоанна Васильевича всеа России, в лето седмь тысящь седмдесять[35] Афанасием, митрополитом Московским и всея России, поставляется на епископство славному граду Тфери, на Акакиево место преподобнаго епископа, сему убо ко Господу отшедшу: жившу на епископстве сорок лет, и добре Богу угодив, преставися. Сему же преподобному Варсонофию еще диакону сущу у преподобнаго Акакиа живущу ему, якоже сам поведа учеником своим, и многащи к нему Акакию глаголати, за многая лета преставления своего: яко быти тебе, рече, Варсонофие, зде Тфери епископом по моем к Богу отшествии и правити люди Божия; еже и бысть. И добре пасяше словесное стадо Христовых овец, паче убо и паче протяг усердие к подвигу, и множа умножи талант господина своего, и пребывая в посте и молитвах, и слезах, и во всенощном стоянии молитву принося выну к Богу. И прият от Бога благодать разсуждения; разсуждение бо, рекоша отцы, корень всем добродетелем. К сему же и врачебней хитрости преподобный Варсонофий искусен бе, и во имя Господне многия болящия телесне уврачева, еще жив сый, мзды же не приемля, якоже и прежнии святии врачеве не приемляху мзды, но туне врачеваху: кая бо потреба, рече, та стяжати, яже не можем с собою взяти; болных же паче врачеваше Духа Святаго благодатию душевныя страсти, врачь бо бе искусен по Господни благодати обоим сим врачеваниемь; псалмы же Давыдовы непрестанна бе молитва к Богу из уст его; ручное же бе ему делати клобуки гречестии, еже ношаху святителие; то бо делаше, и посылаине братии своей, и моляше их молити о нем Бога, то бо бе за рукоделие нетленная мзда ему.

Глава 16. О преставлении преблаженнаго великаго архиереа Варсонофия, епископа Тферскаго, Казанскаго чудотворца.

Егда же бе преподобный Варсонофий во глубочайшей старости, оставляет паству, и преселяется паки в созданный им монастырь, во обитель боголепнаго Спасова Преображения, ея же сам состави, в ново просвещенной град Казань; и паки касается делу своему, емуже бе обыкл, угождая Богу постом, и молитвою, и бдением, и милостынею, и всенощным стоянием, и труды ко трудом прилагая; и возлагает на себе великий образ. Скорбию же многою преподобный и болезнию дряхлствуя другим бываше, правила же своего не пременяше никогдаже; к церковною пению старости ради и многих ради болезней не можаше уже ходити, но ученицы его к церкви вожаху его на колесцах, дондеже изнеможе зело, и нача конечно болети; и познав от мира сего отшествие свое к Богу, и причастився божественных и животворящих Христовых Таин, отъиде ко Господу, егоже возлюби. Преставися же преподобный Варсонофий, епископ Тферский, в лето 7084 [1576], априлия месяца 11 дня, на память священномученика Антипы, епископа Пергама Асийскаго, и погребен бысть честно в созданем от него монастыре, боголепнаго Спаса Господня Преображения, архиепископом Тихоном первым, по числу же пятым, близ преподобнаго Гуриа архиепископа. Тогоже лета, иуниа в 14 день, архиепископ Тихон ко Господу отходит, и повеле положити себе в монастыре святыя и живоначалныя Троицы, иже внутрь града Казани близ двора архиепископля. И о сем до зде.

Глава 17. Месяца октовриа в 4 день сказание о обретении мощей, иже во святых отец наших, Гуриа перваго архиепископа Казанскаго, и епископа Варсонофиа Тферскаго, Казанских чудотворцов, в лето 7104 [1595].