Адамдын Асыл ойлору

Жаз келеерде көзүмө жылкычы чымчыктын элеси көрүндү, анан жылкычы чымчыктын өзү көрүндү, анан көп өтпөй жадыраган жаздын өзү көрүндү.

* * *

Чындыкка күбө болуп акыйкат турду, ал эми калпка күбө эч ким болгон жок. Анткени ал иш болгон эмес, жөн эле ойдон чыгарылган калп чыгарма.

* * *

Күлкүнүн эки эле түрү бар. Биринчиси чын, экинчиси жалган. Чын күлгөндө адамдын ажары төгүлүп турат.Жалган күлгөндө эки жүздүүлүктүн элеси көрүнүп турат.

* * *

Миң гүлдүн ыргалган кооздугун эч убакта бир гүл бере албайт. Анткени миң гүлдө миң ыргакжашап термелип турган.

* * *

Талаанын көркүн бир түрдүү гүлдөр эмес, ар түркүн гүлдөр чыгарып көрккө бөлөйт.

* * *

Улуу ачылышты ким жаратам десе, ал улуу тобокелчиликке

бара берсин.

* * *

Тантык адамдардын арасында сүйлөбөй койгонуң ал улуу жеңиш. Алар ошол жеңишке ичинен суктанат.

* * *

Ар бир ойчулдун сөзү,сен окуучу улуу китеп.

* * *

Жаз айы – жаш чагың, кыш – улгайган убагың. Экөөнүн ортосунда бир топ узак жылдар созулуп жатат.

* * *

Айрым адамдар ушактан жип ийрип килем токушат. Ал килем кимге эмнеге керек?

* * *

Рухубуз жаңырса, биздин жан дүйнөбүздө чоң майрам башталат.

* * *

Бул өмүрдө элдин ак эмгегин жегендер көп, бирөөнүн ак малын уурдагандар көп, муштуму чоң зөөкүрлөр андан көп, алаасынан бузулган адамдар мындан көп, сага айтаар кеңешим ошолорго кошулуп жаман адамдардын жалпы санын арбыта көрбө!

* * *

Сонун кереметтүү обондуу ырларда бут да, кол да, дене да жок, ал кармалбай эле биздин жан дүйнөбүзгө өзү эле кирип кетет…

* * *

Көл жээгине келип ыр жазып жатам, эч ким мага тоскоол болгон жок. Ак чардактар гана:

– «Акын ырыңды жаза бер бул жашоонун өзү ыр», – деп ары-бери кайкышат.

* * *

Ар бир адам өз көлөкөсүн көргөндөй өз кемчилигин көрсө, кандай сонун болоор эле. Анда бул дүйнөнүн асылдык жагы көбөймөк.

* * *

Көз ирмемдеги эрдик кылымга сакталып калат. Бирок ошол көз ирмем тарыхта унутулбай айтылып калат.

* * *

Бүткүл элдин сезин алган өрт, учкундан эле тутанган.

* * *

Туз ачуу, шекер таттуу.

Дардаңдап эбин таппай көөп турган адамга ачуу мамиле керек, ал эми ындыны сууп, кайраты чөгүп турган адамга таттуу мамиле керек.

* * *

Жоокердин жалаңдаган курч кылычына караганда кызыл тил андан миң эсе курчтук кылат.

* * *

Көл жээгине келип:

– Ырларым кандайсыңар? – дедим.

Толкундун арасынан ырлар башын чыгарып:

– Биз мындабыз, талантың болсо ылдам кармап ал, – дешти.

* * *

Бизге улуу адамдар көп жаралса, ал алтын кылым болот. Алтын кылым улуу адамдары менен даңазаланат.

* * *

Өмүр сага берилген асыл белек. Ошону кастарлап жакшы күтүп, сыйлап өт. Ал сага болочокто түшүмүн төгөт.

* * *

Сен бийликте жогору көтөрүлсөң жөнөкөй адамдарды жерде калды деп эсептебе, аларды бийиктен карабай жердегидей эле жапыздыктан кара. Акыры жерге түшөсүң.

* * *

Акын айтты:

– Түн жымжырттык, мен анын кулумун, кул болгон соң мен эмгектениш үчүн жаралгам, ошол үчүн кулумун.

* * *

Жер үстүндө акыйкат бирөө эле, экөө болсо анда кандай болот? Эки акыйкат болот деп бир жерден эч убакта уккан эмесмин.

* * *

Улуу Карамолдонун комуз күүлөрү бир сонундук, ал жүрөгүбүздүн тереңинде жаралып, чоң кубанычка оролгон керемет. Керемет күүнү жараткан Карамолдонун жүрөгү деле керемет.

* * *

Күн батып баратып айтты:

– «Адамдар эми жакшы калгыла! Бүгүн эмне бакыт, эмне кайгы таптыңар. Ал силердин тагдырыңар. Мен эртең кайра төрөлүп келем. Ага чейин жакшы калгыла!»

* * *

Ар бир адамдын жан дүйнөсүндө ынак тоосу болот, ал жүрөгүндө жанган үмүтү.

* * *

Адамдар бири-биринин жардамына бел байлап ары жол улайт. Демек жашоодо берилүүчү жардам түгөнбөйт.

* * *

Адам уйкуга киргенде чарчоодон, чаалыгуудан азап-тозоктон кутулат. Ал эми түбөлүк уйкуга киргенде, түбөлүк азап-тозок армандан кутулат. Экөө тең болуучу кубулуш.

* * *

Жеңилип бараткан адам чындык менен адилеттикке таянды эле, ал жеңишке оңой жетти.

* * *

Өмүрлүк жарым айтты:

– Биз бир китеп жаздыкпы? – деди.

–Ооба жаздык, ал жашоо, турмуш, махабат китеби болчу, – дедим.

* * *

Бул дүйнөдө жакшылык өтө көп, эгерде жамандык андан көп болсо, биз азап тартмакпыз.

* * *

Биз келечекке бел байлайбыз, ал өчпөс жашоого бел байлайт. Өмүрүбүз бири-бирине бел байлап уланып жүрүп олтурат.

* * *

Ар кандай кубаттуу таланттын эки жагы бар: Өлбөстүк жана улуулук. Чыныгы даңаза ошол экөөндө.

* * *

Чыныгы атанын мээримине бөлөнгөн бала ата мээримин сезбей да калышы ыктымал. Ал эми ата мээримин көрбөй өскөн бала ошол мээримди сагынып куса болушу ыктымал.

***

Кит чоң балык, майда чабак кичинекей балык, чоң менен кичиненин айырмасын ушул экөө айтып турат.

* * *

Бир үйдүн жарыгы ошол эле үйгө тиет. Күндүн жарыгы бүткүл ааламга тиет. Жакшы хандын жарыгы бүткүл элине тиет. Элинин жарыгы ханга тиет.

* * *

Алысты көргөн көздө умтулуу ошончолук терең болот.

Ал улуулукту көрө билүүнүн негизги башаты.

* * *

Керексиз чыгармалардын унутулуп калышы арман. Анткени аларды автор керектүү болсун деп жаратпады беле. Демек керектүү деген нерсенин керексиз болуп жаралышы дагы арман.

* * *