Беседы на Евангелия. В 2-х книгах

Во время оно, Петр же востав тече ко гробу и приник виде ризы едины лежащя, и отиде, в себе дивяся бывшему. И се, два от них беста идущия в тойже день в весь отстоящу стадий шестьдесят от Иерусалима, ейже имя Эммаус. И та беседоваста к себе о всех сих приключшихся. И бысть беседующема има и совопрошающемася, и Сам Иисус приближився идяше с нима. Очи же ею держастеся, да Его не познаета. Рече же к нима: что суть словеса сия, о нихже стязаетася к себе идуща, и еста дряхла; отвещав же един, емуже имя Клеопа, рече к нему: ты ли един пришлец еси во Иерусалим, и не уведел бывших в нем во дни сия; и рече има: киих; она же реста Ему: яже о Иисусе Назаряни́не, Иже бысть муж Пророк, силен делом и словом пред Богом и всеми людми: како предаша Его Архиерее и князи наши на осуждение смерти и распяша Его. Мы же надеяхомся, яко сей есть хотя избавити Израиля, но и над всеми сими, третий сей день есть днесь, отнелиже сия быша. Но и жены некия от нас ужасиша ны, бывшия рано у гроба: и не обретшя телесе Его, приидоша глаголюще, яко и явление Ангел видевша, иже глаголют Его жива. И идоша нецыи от нас ко гробу и обретоша тако, якоже и жены реша: Самого же не видеша. И той рече к нима: о, несмысленная и косная сердцем, еже веровати о всех, яже глаголаша Пророцы. Не сия ли подобаше пострадати Христу и внити в славу свою; и начен от Моисея и от всех Пророк, сказаше има от всех Писаний, яже о Нем. И приближишася в весь, в нюже идяста: и Той творяшеся далечайше ити. И нуждаста Его, глаголюще: облязи с нама, яко к вечеру есть, и приклонился есть день. И вниде с нима облещи. И бысть яко возлеже с нима, (и) приим хлеб благослови, и преломив даяше има. Онема же отверзостеся очи, и познаста Его: и Той невидим бысть има. И рекоста к себе: не сердце ли наю горя бе в наю, егда глаголаше нама на пути и егда сказоваше нама Писания; и воставша в той час, возвратистася во Иерусалим и обретоста совокупленых единонадесяте и иже бяху с ними, глаголющих, яко воистинну воста Господь и явися Симону. И та поведаста, яже быша на пути, и яко познася има в преломлении хлеба.