Библия (на цсл. гражданским шрифтом)

4 И взя от рук их и слия их делом литым, и сотвори им телца литаго. И рекоша: сии бози твои, израилю, иже изведоша тя из земли египетския.

5 И видев аарон, созда олтарь прямо ему, и проповеда аарон, глаголя: праздник Господнь утре.

6 И обутреневав наутрие, вознесе всесожжения и принесе жертву спасения. И седоша людие ясти и пити и восташа играти.

7 И рече Господь к моисею глаголя: иди скоро, сниди отсюду, беззаконноваша бо людие твои, ихже извел еси из земли египетския:

8 преступиша с пути скоро, егоже заповедал еси им: сотвориша себе телца, и поклонишася ему, и пожроша ему, и реша:

9 сии бози твои, израилю, иже изведоша тя из земли египетския:

10 и ныне остави мя, и возярився гневом на ня, потреблю их, и сотворю тя в язык велик.

11 И помолися моисей пред Господем Богом и рече: вскую, Господи, яришися гневом на люди твоя, ихже извел еси из земли египетския крепостию великою и мышцею твоею высокою?

12 да не когда рекут египтяне, глаголюще: с лукавством изведе их погубити в горах и потребити их от земли: утоли гнев ярости твоея и милостив буди о злобе людий твоих,

13 помянув авраама и исаака и иакова, твоя рабы, имже клялся еси собою, и рекл еси к ним, глаголя: зело умножу семя ваше, яко звезды небесныя множеством, и всю сию землю, юже рекл еси дати семени их, и обладают ею во веки.

14 И умилостивися Господь о зле, еже рече сотворити людем своим.

15 И возвратився моисей, сниде с горы: и две скрижали свидения в руку его, скрижали каменны написаны от обою страну их, сюду и сюду быша написаны:

16 и скрижали дело Божие быша, и написание, написание Божие изваяно на скрижалех.

17 И услышав иисус глас людий кричащих, рече к моисею: глас ратный в полце.

18 И рече моисей: несть глас начинающих одолевати, ниже глас начинающих бежати, но глас начинающих напиватися вином аз слышу.

19 И егда приближашеся к полку, узре телца и лики: и возярився гневом моисей, поверже из руку своею обе скрижали, и сокруши я под горою:

20 и взем телца, егоже сотвориша, сожже его во огни и сотре его подробну, и разсыпа его по воде, и напои ею сыны израилевы.

21 И рече моисей аарону: что сотвориша тебе людие сии, яко навел еси на них грех велик?

22 И рече аарон к моисею: не гневайся, господине: ты бо веси людий сих устремление.

23 Глаголаша бо ми: сотвори нам боги, иже пойдут пред нами: моисей бо сей человек, иже изведе ны от египта, не вемы, что бысть ему:

24 и рекох им: иже имать злато, измите: и изяша, и даша мне, и ввергох е во огнь, и излияся телец сей.

25 Видев же моисей люди, яко разделишася, раздели бо их аарон в порадование супостатом их:

26 ста же моисей во вратех полка и рече: аще кто есть Господнь, да идет ко мне. Снидошася убо к нему вси сынове левиины.

27 И рече им: сия глаголет Господь Бог израилев: препояшите кийждо свой мечь при бедре и пройдите, и возвратитеся от врат до врат сквозе полк, и убийте кийждо брата своего и кийждо ближняго своего и кийждо соседа своего.

28 И сотвориша сынове левиины, якоже глагола им моисей: и паде от людий в той день до трех тысящ мужей.

29 И рече им моисей: наполнисте руки вашя днесь Господу, кийждо в сыне своем и в брате своем, да дастся на вас благословение.

30 И бысть на утрие, рече моисей к людем: вы согрешисте грех велик: и ныне взыду к Богу, да умолю о гресе вашем.

31 И возвратися моисей ко Господу и рече: молюся ти, Господи: согрешиша людие сии грех велик и сотвориша себе боги златы:

32 и ныне, аще убо оставиши им грех их, остави: аще же ни, изглади мя из книги твоея, в нюже вписал еси.

33 И рече Господь к моисею: аще кто согреши предо мною, изглажу его из книги моея:

34 ныне же иди, сниди и возведи люди сия на место, еже рех тебе: се, ангел мой предидет пред лицем твоим: в оньже день присещу, наведу на них грех их.

35 И порази Господь люди за сотворение телца, егоже сотвори аарон.

Глава 33

1 И рече Господь к моисею: предиди, взыди отсюду ты и людие твои, ихже извел еси от земли египетския на землю, еюже кляхся аврааму и исааку и иакову, глаголя: семени вашему дам ю:

2 и послю купно ангела моего пред лицем твоим, и изженет хананеа, аморреа и хеттеа, и ферезеа и гергесеа, и евеа и иевусеа:

3 и введу тя в землю текущую млеком и медом: сам бо не пойду с тобою, яко людие жестоковыйнии суть, да не убию тебе на пути.

4 И услышавше людие слово сие страшное, восплакашася в плачевных (ризах).

5 И рече Господь к моисею: глаголи сыном израилевым: вы людие жестоковыйнии, блюдитеся, да не язву другую наведу на вы и потреблю вы: ныне убо сымите ризы славы вашея и утварь, и покажу, яже сотворю вам.

6 И отяша сынове израилевы утварь свою и ризы от горы хорива.

7 И взем моисей кущу свою, потче ю вне полка, далече от полка, и прозвася скиния свидения: и бысть, всяк взыскуяй Господа исхождаше в скинию, яже вне полка.

8 Егда же вхождаше моисей в скинию вне полка, стояху вси людие смотряще кийждо пред дверми кущи своея, и зряху отходящу моисею даже внити ему в скинию.

9 Егда же вниде моисей в скинию, сниде столп облачный и ста пред дверми скинии, и глагола (Господь) моисею.