Библия (на цсл. гражданским шрифтом)

10 И видяху вси людие столп облачный стоящь пред дверми скинии: и ставше вси людие, поклонишася кийждо из дверий кущи своея:

11 и глагола Господь к моисею лицем к лицу, якоже аще бы кто возглаголал к своему другу, и отпущашеся в полк: слуга же иисус, сын навин, юноша не исхождаше из скинии.

12 И рече моисей ко Господу: се, ты мне глаголеши: изведи люди сия: ты же не явил ми еси, кого послеши со мною: ты же мне рекл еси: вем тя паче всех и благодать имаши у мене:

13 аще убо обретох благодать пред тобою, яви ми тебе самаго, да разумно вижду тя, яко да обрет буду благодать пред тобою, и да познаю, яко людие твои язык велик сей.

14 И глагола (ему Господь): аз сам предиду пред тобою и упокою тя.

15 И рече к нему моисей: аще сам ты не идеши с нами, да не изведеши мя отсюду:

16 и како ведомо будет воистинну, яко обретох благодать у тебе аз же и людие твои, точию идущу ти с нами? и прославлен буду аз же и людие твои паче всех язык, елицы суть на земли.

17 Рече же Господь к моисею: и сие тебе слово, еже рекл еси, сотворю: обрел бо еси благодать предо мною, и вем тя паче всех.

18 И глагола моисей: покажи ми славу твою.

19 И рече (Господь к моисею): аз предиду пред тобою славою моею и воззову о имени моем, Господь пред тобою: и помилую, егоже аще милую, и ущедрю, егоже аще щедрю.

20 И рече: не возможеши видети лица моего: не бо узрит человек лице мое, и жив будет.

21 И рече Господь: се, место у мене, и станеши на камени:

22 егда же прейдет слава моя, и положу тя в разселине камене, и покрыю рукою моею над тобою, дондеже мимоиду:

23 и отиму руку мою, и тогда узриши задняя моя: лице же мое не явится тебе.

Глава 34

1 И рече Господь к моисею: истеши себе две скрижали каменны, якоже и первыя, и взыди ко мне на гору: и напишу на скрижалех словеса, яже бяху на скрижалех первых, яже сокрушил еси:

2 и буди готов заутра, и взыдеши на гору синайскую и предстанеши мне тамо на версе горы:

3 и да никтоже взыдет с тобою, ниже да явится на всей горе: и овцы и говяда да не пасутся близ горы тоя.

4 И истеса две скрижали каменны, якоже и первыя: и утренневав моисей заутра, взыде на гору синайскую, якоже завеща ему Господь: и взя моисей с собою две скрижали каменныя.

5 И сниде Господь во облаце, и предста ему тамо моисей, и призва именем Господним.

6 И мимоиде Господь пред лицем его и воззва: Господь, Господь Бог щедр и милостив, долготерпелив и многомилостив и истинен,

7 и правду храняй, и творяй милость в тысящы, отемляй беззакония и неправды и грехи, и повиннаго не очистит, наводяй грехи отцев на чада, и на чада чад, до третияго и четвертаго рода.

8 И потщався моисей, приник на землю, поклонися Богу

9 и рече: аще обретох благодать пред тобою, да идет Господь мой с нами: людие бо жестоковыйнии суть: и отимеши ты грехи нашя и беззакония наша, и будем твои.

10 И рече Господь к моисею: се, аз полагаю тебе завет пред всеми людьми твоими, и сотворю славная, яже не быша по всей земли и во всех языцех: и узрят вси людие, в нихже еси ты, дела Господня, яко чудна суть, яже аз сотворю тебе:

11 внемли ты вся, елика аз заповедаю тебе: се, аз изжену пред лицем вашим аморреа и хананеа, и хеттеа и ферезеа, и евеа и гергесеа и иевусеа:

12 внемли себе, да не когда завещаеши завет седящым на земли, в нюже внидеши, да не будет соблазн в вас:

13 капища их разорите и кумиры их сокрушите, и дубравы их посецыте, и изваяная богов их сожжите огнем,

14 не бо поклонитеся богом иным: ибо Господь Бог ревниво имя, Бог ревнив есть:

15 да не когда завещаеши завет седящым на земли, и соблудят вслед богов их, и пожрут богом их, и призовут тя, и снеси от жертв их:

16 и поймеши от дщерей их сыном твоим, и от дщерей твоих даси сыном их, и соблудят дщери твоя вслед богов их, и сынове твои соблудят вслед богов их:

17 и богов слияных да не сотвориши себе:

18 и праздник опресночный да сохраниши: седмь дний да яси опресноки, якоже заповедах тебе, во время в месяце новых плодов: в месяце бо новых плодов изшел еси от земли египетския:

19 всяко разверзающее ложесна мужеск мне пол (да будет), всяко первородное телца и первородное овцы:

20 и первородное осляте искупиши овцею: аще же не искупиши е, цену да даси его: всякаго первенца от сынов твоих да искупиши, да не явишися предо мною тощь:

21 в шесть дний да делаеши, в седмый же день да почиеши, от сеятвы и жатвы да почиеши,

22 и праздник седмиц да сотвориши ми, начало жатвы пшеницы, и праздник собрания посреде лета:

23 в три времена лета да явится всяк мужеск пол твой пред Господем Богом израилевым:

24 егда бо изжену языки от лица твоего и разширю пределы твоя, никтоже возжелает земли твоея, егда приидеши явитися пред Господем Богом твоим в три времена лета:

25 да не заколеши с квасом крове жертв моих, и да не прележит до утрия жертва праздника пасхи:

26 первородная жит земли твоея да внесеши в дом Господа Бога твоего: да не свариши агнца во млеце матере его.

27 И рече Господь к моисею: напиши себе словеса сия, в словесех бо сих положих тебе завет и израилю.