Библия (на цсл. гражданским шрифтом)

12 Страх Господень возвеселит сердце и даст веселие и радость и долгоденствие.

13 Боящемуся Господа благо будет на последок, и в день скончания своего обрящет благодать. Страх Господень дар от Господа и на стезях любления поставляет.

14 Любление Господа преславная премудрость, и имже является, разделяет себе в ведение его.

15 Начало премудрости боятися Господа, и с верными в ложеснех создася им: с человеки основание века угнезди и с семенем их уверится.

16 Исполнение премудрости еже боятися Господа, и упоит их от плодов ея:

17 весь дом их исполнит желаний своих и сосуды от жит ея.

18 Венец мудрости страх Господень, возцветаяй мир и здравие изцеления: обоя же суть дары Божии, и разширяет веселие любящым его.

19 И виде и сочте ю: художество и ведение разума одожди, и славу держащих ю вознесе.

20 Корень премудрости еже боятися Господа, и ветви ея долгоденствие.

21 Страх Господень отреяет грехи: пребываяй же в нем отвращает гнев.

22 Не может ярость неправедная оправдитися: устремление бо ярости его падение ему.

23 До времене стерпит долготерпеливый, и последи воздаст ему веселие:

24 до времене скрыет словеса своя, и устне верных исповедят разум его.

25 В сокровищих премудрости притча ведения: мерзость же грешнику Богочестие.

26 Возжелев премудрости, соблюди заповеди, и Господь подаст ю тебе:

27 премудрость бо и наказание страх Господень, и благоволение его вера и кротость.

28 Не сумневайся о страсе Господни и не приступи к нему сердцем раздвоеным.

29 Не лицемерствуй пред усты человеческими и устнам твоим вонми.

30 Не возносися, да не падеши и наведеши души твоей безчестие, и открыет Господь тайная твоя и посреде сонма низложит тя: яко не приступил еси во истине ко страху Господню, и сердце твое исполнено лукавства.

Глава 2

1 Чадо, аще приступаеши работати Господеви Богу, уготови душу твою во искушение:

2 управи сердце твое и потерпи, и не скор буди во время наведения:

3 прилепися ему и не отступи, да возрастеши на последок твой.

4 Все елико аще нанесено ти будет, приими и во изменении смирения твоего долготерпи:

5 яко во огни искушается злато, и человецы приятни в пещи смирения.

6 Веруй ему, и заступит тя, и управи пути твоя и уповай нань.

7 Боящиися Господа, пождите милости его и не уклонитеся, да не падете.

8 Боящиися Господа, веруйте ему, и не имать отпасти мзда ваша.

9 Боящиися Господа, надейтеся на благая и на веселие века и милости.

10 Воззрите на древния роды и видите, кто верова Господеви и постыдеся? или кто пребысть во страсе его и оставися? или кто призва его, и презре и?

11 Зане щедр и милостив Господь, и оставляет грехи, и спасает во время скорби.

12 Горе сердцам страшливым и рукам ослабленым, и грешнику ходящу на две стези.

13 Горе сердцу ослаблену, яко не верует: сего ради покровено не будет.

14 Горе вам погубльшым терпение: и что сотворите, егда посетит Господь?

15 Боящиися Господа не сумневаются о глаголголех его, и любящии его сохранят пути его.

16 Боящиися Господа поищут благоволения его, и любящии его исполнятся закона.

17 Боящиися Господа уготовят сердца своя и пред ним смирят душы своя, (глаголюще:)

18 да впадем в руце Господни, а не в руце человечески, яко бо величество его, тако и милость его.

Глава 3

1 Мене отца послушайте, чада, и сице творите, да спасетеся:

2 Господь бо прослави отца на чадех и суд матере утверди на сынех.

3 Чтый отца очистит грехи,

4 и яко сокровищствуяй прославляяй матерь свою.

5 Чтый отца возвеселится о чадех и в день мольбы своея услышан будет.

6 Прославляяй отца долгоденствовати будет, и послушаяй Господа упокоит матерь свою.

7 Бояйся Господа почтит отца и яко владыкам послужит родившым его.

8 Делом и словом чти отца твоего и матерь, да найдет ти благословение от них.

9 Благословение бо отчее утверждает домы чад, клятва же матерня искореняет до основания.

10 Не славися в безчестии отца твоего, несть бо ти слава отчее безчестие:

11 слава бо человеку от чести отца его, и поношение чадом мати в безславии.

12 Чадо, заступи в старости отца твоего и не оскорби его в животе его:

13 аще и разумом оскудевает, прощение имей и не обезчести его всею крепостию твоею.

14 Милость бо отча не забвена будет, и противу грехов присозиждется тебе:

15 в день скорби твоея воспомянет тя: якоже лед от зноя, тако растают греси твои.

16 Коль хулен оставляяй отца, и проклят Господем раздражаяй матерь свою.

17 Чадо, в кротости дела твоя препровождай, и человеком приятным возлюблен будеши.

18 Елико велик еси, толико смиряйся, и пред Господем обрящеши благодать.

19 Мнози суть высоцы и славни: но кротким открываются тайны,

20 яко велия сила Господня, и смиренными славится.

21 Вышших себе не ищи и крепльших себе не испытуй.

22 Иже ти повеленна, сия разумевай: несть бо ти потреба тайных.

23 Во избытцех дел твоих не любопытствуй: вящшая бо разума человеческаго показана ти суть:

24 многи бо прельсти мнение их, и мнение лукавно погуби мысль их.

25 И любяй бедство впадет в не:

26 сердце жестоко озлобится на последок:

27 сердце жестоко отяготится болезньми, и грешник приложит грехи на грехи.