Библия (на цсл. гражданским шрифтом)

19 С яростивым не сварися и не иди с ним сквозе пустыню: пред очима бо его кровь яко ничтоже есть, и идеже несть помощи, тамо низложит тя.

20 С буим совета не твори: не возможет бо слова удержати.

21 Пред чужим не твори тайнаго: не веси бо, что родит ти.

22 Всякому человеку не являй сердца твоего, да не воздаст ти благодати ложныя.

Глава 9

1 Не ревнуй жене недра твоего, ниже научи на тебе самаго учению лукаву.

2 Не даждь жене души твоея, еже превзыти ей над крепость твою.

3 Не сретай жены блудницы, да не како впадеши в сети ея.

4 К спевающей не примешайся, да не како увязнеши в начинаниих ея.

5 Девы не назирай, да не когда соблазнишися в красоте ея.

6 Не даждь блудницам души твоея, да не погубиши наследия твоего.

7 Не обзирай стогн града и в пустых его не заблуждай.

8 Отврати око твое от жены красныя и не назирай чуждыя доброты:

9 добротою женскою мнози прельстишася, и от сея похоть яко огнь разгарается.

10 С мужатицею отнюд не седи и не медли с нею в вине:

11 да не когда приклонится душа твоя на ню, и духом твоим поползнешися в пагубу.

12 Не оставляй друга стараго, новый бо несть точен ему:

13 вино новое друг нов: аще обетшает, с веселием испиеши его.

14 Не ревнуй славе грешника: не веси бо, кое будет превращение его.

15 Не соизволи изволением нечестивых: помяни, яко даже до ада не оправдятся.

16 Далече отступи от человека, иже имать власть убивати, и не убоишися страха смертна:

17 и аще приступиши, не согрешай, да не отимет живота твоего:

18 познавай, яко посреде сетей минуеши и по забралом града ходиши.

19 По крепости твоей разсмотряй искренняго и со премудрыми советуй.

20 С разумивыми буди размышление твое, и вся повесть твоя в законе вышняго.

21 Мужие праведнии да вечеряют с тобою, и во страсе Господни буди хвала твоя.

22 От руки художников дело похвалено бывает, и вождь людий премудр в словеси своем.

23 Страшен во граде своем муж язычен, и дерзый в словеси своем возненавиден будет.

Глава 10

1 Премудр судия наказует люди своя, и владычество разумиваго благочинно будет.

2 Якоже судия людий своих, тако и слузи его, и якоже владыка града, тако и вси живущии в нем.

3 Царь ненаказаный погубит люди своя: и град населится премудростию сильных.

4 В руце Господни власть земли, и потребнаго воздвигнет во время на ней.

5 В руце Господни благое шествие мужа, и на лицы книжника возложит славу свою.

6 Во всяцей неправде не держи гнева на искренняго и не твори ни коего в делех досаждения.

7 Возненавидена пред Богом и человеки гордыня и от обоих сотворит неправедная.

8 Царство от языка в язык преводится, ради неправды и досаждения и имений льстивых.

9 Почто гордится земля и пепел?

10 Яко в животе извергох утробу его.

11 Долгую болезнь отсецает врачь:

12 и царь днесь, а утро умрет.

13 Ибо егда умрет человек, наследит гады и звери и червие.

14 Начало гордыни человеку отступление от Господа, и егда от сотворшаго и отвращается сердце его:

15 яко начало греха гордыня, и держай ю изрыгнет скверну.

16 Сего ради обезслави Господь в наведениих зол и низврати их до конца:

17 престолы князей низложи Господь и посади кроткия вместо их,

18 корения языков гордых исторже Господь и насади смиренныя вместо их,

19 страны языков низврати Господь и погуби их до основания земли,

20 изсуши от них и погуби их и потреби от земли память их.

21 Не создана бысть человеком гордыня, ни гнев ярости рождением жен.

22 Семя честное кое? семя человеческое. семя честное кое? боящиися Господа.

23 Семя безчестное кое? семя человеческое. семя безчестное кое? преступающии заповеди.

24 Посреде братии старейшина их честен, и боящиися Господа пред очима его.

25 Богат и славен и нищь, похвала их страх Господень.

26 Неправедно есть укоряти нища разумива, и не подобает славити мужа грешника.

27 Вельможа и судия и сильный славни будут, и несть от них ни един вящший боящагося Господа.

28 Рабу разумиву свободнии послужат, и муж хитр не поропщет наказуемь.

29 Не мудрися творити дела своего, и не слави себе во время туги твоея.

30 Лучше делаяй и изюбилуяй во всем, неже славяйся и лишаяйся хлеба.

31 Чадо, кротостию прослави душу твою и даждь ей честь по достоинству ея.

32 Согрешающаго на душу свою кто оправдит? и кто прославит безчествующа живот свой?

33 Нищий славимь есть вежества ради своего, и богатый славимь есть богатства ради своего.

34 Прославляемый же в нищете, а в богатстве кольми паче? безславный же в богатстве, а в нищете кольми паче?

Глава 11

1 Премудрость смиреннаго вознесет главу его и посреде вельмож посадит его.

2 Не похвали человека во красоте его, и не буди ти мерзок человек видением своим.

3 Мала есть в пернатых пчела, и начаток сладостей плод ея.

4 Во одеянии риз не похвалися и в день славы не превозносися: яко дивна дела Господня и тайна дела его пред человеки.

5 Мнози мучителие седоша на земли, нечаемый же увязеся венцем.

6 Мнози сильнии укорени быша зело, и славнии предани быша в руки инех.

7 Первее неже испытаеши, не порицай, уразумей прежде и тогда запрещай.

8 Прежде неже услышиши, не отвещавай, и не влагайся в среду беседы.