Библия (на цсл. гражданским шрифтом)

34 И бысть егда воздвизаху кивот, и рече моисей: востани, Господи, и да разсыплются врази твои, и да бежат вси ненавидящии тебе.

35 И в поставлении (кивота) рече: возвращай, Господи, тысящы тем во израили.

36 И облак Господнь бысть осеняющь над ними в день, егда воздвизахуся из полка.

Глава 11

1 И быша людие ропщуще злая пред Господем: и слыша Господь и разгневася гневом, и разгореся в них огнь от Господа и потреби часть некую от полка.

2 И возопиша людие к моисею: и помолися моисей к Господу, и преста огнь.

3 И прозвася имя месту тому запаление: яко разгореся в них огнь от Господа.

4 И общий народ иже в них похотеша похотением: и седше плакахуся сынове израилевы и рекоша: кто ны напитает мясы?

5 помянухом рыбы, яже ядохом в земли египетстей туне, и огурцы и дыни, лук и червленый лук и чеснок:

6 ныне же душа наша изсохла, ничтоже точию манна пред очима нашима.

7 Манна же бяше аки семя кориандрово, и вид ея яко вид кристалла:

8 и исхождаху людие и собираху, и меляху в жерновах и толцаху в ступах, и варяху в горшках и творяху из нея потребники: и бяше вкус ея, яко вкус муки пряжены с елеем:

9 и егда схождаше роса на полк нощию, схождаше манна нань.

10 И услыша моисей плачущихся их в сонмех своих, коегождо их пред своими дверми: и разгневася Господь гневом зело, и пред моисеом бяше зло.

11 И рече моисей ко Господу: вскую озлобил еси раба твоего? и почто не обретох благодати пред тобою, еже возложити устремление людий сих на мя?

12 еда аз во утробе зачах вся люди сия? или аз родих я? яко глаголеши ми: возми их в недра твоя, якоже доилица носит доимыя, в землю, еюже клялся еси отцем их:

13 откуду мне мяса дати всем людем сим? яко плачут на мя, глаголюще: даждь нам мяса, да ядим:

14 не возмогу аз един водити людий сих, яко тяжко мне есть слово сие:

15 аще же тако ты твориши мне, то убий мя убиением, аще обретох благодать пред тобою, да не вижу озлобления моего.

16 И рече Господь к моисею: собери ми седмьдесят мужей от старец израилевых, ихже ты сам веси, яко тии суть старцы людстии и книгочия их: и да приведеши я ко скинии свидения, и да станут тамо с тобою:

17 и сниду и возглаголю тамо с тобою, и уйму от духа, иже в тебе, и возложу на ня: да подимут с тобою устремление людий, и не будеши водити их ты един:

18 и людем речеши: очиститеся наутрие, и снесте мяса, яко плакастеся пред Господем, глаголюще: кто ны напитает мясы? яко добро нам бысть во египте: и даст Господь вам мяса ясти, и снесте мяса:

19 не един день ясти будете, ни два, ни пять дний, ни десять дний, ниже двадесять дний:

20 до месяца дний ясти будете, дондеже изыдет из ноздрий ваших: и будет вам в мерзость, яко не покористеся Господу, иже есть в вас, и плакастеся пред ним, глаголюще: вскую бе нам изыти из египта?

21 И рече моисей: шесть сот тысящ пеших людий, в нихже аз есмь, и ты рекл еси: мяса им дам ясти, и будут ясти месяц дний:

22 еда овцы и волы заколются им, и доволно будет им? или вся рыбы морския соберутся им, и доволно будет им?

23 И рече Господь к моисею: еда рука Господня не доволна будет? ныне уразумееши, аще постигнет тя слово мое, или ни.

24 И изыде моисей и глагола людем словеса Господня: и собра седмьдесят мужей от старец людских, и постави я окрест скинии.

25 И сниде Господь во облаце и глагола к нему: и уя от духа, иже на нем, и возложи на седмьдесят мужей старец: егда же препочи дух на них, и пророчествоваша, и ктому не приложиша.

26 И осташася два мужа в полце: имя единому елдад, и имя второму модад: и препочи на них дух. И сии беша от вписанных, и не приидоша ко скинии, и пророчествоваша в полце.

27 И притек юноша возвести моисею, и рече, глаголя: елдад и модад пророчествуют в полцех.

28 И отвещав иисус навин, предстояй моисею избранный ему, рече господи мой моисею, запрети им.

29 И рече ему моисей: еда ревнуеши ты мне? и кто даст всем людем Господним (быти) пророки, егда даст Господь Духа своего на них?

30 И иде моисей в полк сам и старцы израилтестии.

31 И дух изыде от Господа, и изведе крастели из моря и наведе на полк день ходу отсюду и день ходу отюнуду, окрест полка яко на два лактя от земли.

32 И воставше людие весь день и всю нощь, и весь день наутрие, и собраша крастели: иже мало, собра десять спуд: и иссушиша себе сушаницы окрест полка.

33 И мяса бяху им еще в зубех их, прежде оскудения, и Господь разгневася зело на люди, и порази Господь люди язвою великою зело:

34 и прозвася имя месту тому гробы похотения: яко тамо погребоша людий похотевших.

35 (И) воздвигошася людие от гробов похотения во асироф, и быша людие во асирофе.

Глава 12

1 И возглаголаста мариам и аарон на моисеа жены ради ефиопляныни, юже поя моисей, ибо жену поя ефиопляныню,

2 и рекоста: еда моисею единому глагола Господь? еда и нам не глаголаше? и услыша Господь.

3 И человек моисей кроток зело паче всех человек сущих на земли.

4 И рече Господь внезапу к моисею и аарону и мариаме: изыдите вы трие в скинию свидения.

5 И изыдоша трие в скинию свидения. И сниде Господь в столпе облачне ста над дверми скинии свидения: и призва аарона и мариам. И изыдоста оба.